ବାରିପଦା ଅଫିସ,୨୨।୩: ମୟୂରଭଞ୍ଜ ଜିଲା ବାଙ୍ଗିରିପୋଷି ଥାନା ଅନ୍ତର୍ଗତ ବ୍ରାହ୍ମଣଗାଁ ପଞ୍ଚାୟତ ବେଗୁନିଆବନ୍ଧ ଗ୍ରାମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ପାରିବାରିକ କଳହକୁ ନେଇ ଭଉଣୀଙ୍କୁ ପିଟିପିଟି ମାରି ଦେଇଛନ୍ତି ଭାଇ ଓ ଭାଉଜ । ଖବରପାଇ ବାଙ୍ଗିରିପୋଷି ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ଭାଇ ଓ ଭାଉଜଙ୍କୁ ଥାନାରେ ଅଟକ ରଖିଛି । ବାରିପଦାରୁ ସାଇଣ୍ଟିଫିକ୍ ଟିମ୍ ପହଞ୍ଚି ରକ୍ତ ନମୁନା ସଂଗ୍ରହ କରୁଥିବା ବେଳେ ପୋଲିସ ଅଧିକ ତଦନ୍ତ ଜାରି ରଖିଛି । ମୃତଦେହ ବ୍ୟବଚ୍ଛେଦ ପାଇଁ ବାରିପଦା ପିଆରଏମ୍ ମେଡିକାଲ ପଠା ଯାଇଛି । ମୃତକ ଜଣକ ହେଲେ ଜବା ବାସ୍କେ ।
ଘଟଣା ଅନୁଯାୟୀ, ଜମିବାଡି ଗଣ୍ଡଗୋଳକୁ ନେଇ ଦୀର୍ଘଦିନ ହେଲା ଉଭୟ ପରିବାର ମଧ୍ୟରେ ଝଗଡ଼ା ଲାଗିରହିଥିଲା । ଏହାକୁ ସମଧାନ କରିବାକୁ ଯାଇ ମଙ୍ଗଳବାର ଉଭୟ ପରିବାରକୁ ନେଇ ଗେଗୁନିଆବନ୍ଧ ଗ୍ରାମରେ ଗ୍ରାମ ମୁଖିଆଙ୍କ ତତ୍ୱବାଧାନରେ ଏକ ବୈଠକ ବସିଥିଲା । ସେହି ସମୟରେ ବିଧବା ଭଉଣୀ ଜବା ହଠାତ ଭାଇମାନଙ୍କ ଉପରେ ରାଗିଯିବା ସହ ବୈଠକ ସ୍ଥାନରେ ଛେପ ପକାଇ ଗାମୁଛା ଫୋପାଡ଼ି ପଳାଇ ଆସିଥିଲେ। ଯାହାକୁ ନେଇ ଭାଇ ବୁଢ଼ାନ ହେମ୍ବ୍ରମ ଏବଂ ଭାଉଜ ମାଳତୀ ହେମ୍ବ୍ରମ ଜବାକୁ ଧରି ଏକ ବାଡ଼ିରେ ନିସ୍ତୁକ ପିଟିଥିଲେ । ଏହାଦେଖି ଗ୍ରାମବାସୀ ବିରୋଧ କରିବାରୁ ଉଭୟ ଭଉଣୀକୁ ସେଠାରୁ ଜୋର ଜବରଦସ୍ତ ଚଲେଇ ଚଲେଇ ବ୍ରାହ୍ମଣଗାଁକୁ ନେଇ ଯାଉଥିଲେ । ନେବା ବାଟରେ ଜବାଙ୍କ ମୃତ୍ୟୁ ଘଟିଥିଲା ।
