ନୂଆଦିଲ୍ଲୀ,୩୦।୧୦: ଦୀପାବଳି ପୂର୍ବରୁ ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ଚିନ୍ତାଜନକ ହୋଇଛି। ଶୁକ୍ରବାର ଦିଲ୍ଲୀର ବୱାନା ଅଞ୍ଚଳରେ ବାୟୁ ଗୁଣବତ୍ତର ସୂଚକାଙ୍କ(ଏକ୍ୟୁଆଇ) ଚଳିତ ସିଜିନ୍ରେ ରେକର୍ଡ ଭାଙ୍ଗିଛି। ପ୍ରଦୂଷଣ ସ୍ତର ୪୪୭ରେ ପହଞ୍ଚିଛି। ଏଠାରେ ରହୁଥିବା ଏବଂ ଏହି ଅଞ୍ଚଳ ଦେଇ ଯାଉଥିବା ଲୋକମାନେ କହୁଛନ୍ତି, ପ୍ରଦୂଷଣ ଯୋଗୁ ଆଖି ଜଳୁୁଛି। ଏଥି ସହିତ ସ୍ବାସ୍ଥ୍ୟ ବିଶେଷଜ୍ଞ କହିଛନ୍ତି ଯେ, ୪୦୦ରୁ ଅଧିକ ପ୍ରଦୂଷଣ ସ୍ତର ହୃଦୟ ଏବଂ ଫୁସଫୁସ ପାଇଁ ଅତ୍ୟନ୍ତ ମାରାତ୍ମକ ଅଟେ। ଦିଲ୍ଲୀ-ଏନସିଆରରେ ବୃଦ୍ଧି ପାଉଥିବା ପ୍ରଦୂଷଣକୁ ନେଇ ସୁପ୍ରିମକୋର୍ଟ ଏକ ବଡ ମନ୍ତବ୍ୟ ଦେଇଛନ୍ତି। ନଡାପାଳ ପୋଡିବା ଯୋଗୁ ଦିଲ୍ଳୀ ଏବଂ ପଡୋଶୀ ରାଜ୍ୟଗୁଡିକରେ ପ୍ରଦୂଷଣ ବଢିବା ସଂକ୍ରାନ୍ତରେ ଶୁଣାଣି କରି ପ୍ରଧାନ ବିଚାରପତି ଜଷ୍ଟିସ ଏସ. ବୋବଡେ କହିଛନ୍ତି ଯେ କେତେକ ବିଶେଷଜ୍ଞ ମୋତେ କହିଛନ୍ତି ଯେ ପ୍ରଦୂଷଣର କାରଣ କେବଳ ନଡାପାଳ ପୋଡିବା ଯୋଗୁ ନୁହେଁ, ଯାନବାହନ ଧୂଆ ଯୋଗୁ ମଧ୍ୟ ପରିବେଶ ପ୍ରଦୂଷଣ ହେଉଛି। ଲୋକମାନେ ଲମ୍ବା ସୁନ୍ଦର ଯାନରେ ବୁଲିବା ବନ୍ଦ କରି ସାଇକେଲ ଚଲାଇବାରେ ଅଭ୍ୟସ୍ତ ହେବାକୁ ପଡିବ। ପ୍ରଧାନ ବିଚାରପତି ଆସନ୍ତା ଶୁକ୍ରବାର ପର୍ଯ୍ୟନ୍ତ ଶୁଣାଣି ସ୍ଥଗିତ ରଖିଛନ୍ତି। ପ୍ରଦୂଷଣର ମୁକାବିଲା ପାଇଁ କେନ୍ଦ୍ର ସରକାର ମଧ୍ୟ ଏକ ନିର୍ଦ୍ଦେଶନାମା ଜାରି କରିଛନ୍ତି। ସମସ୍ତ ପକ୍ଷ ଏହି ନିୟମକୁ ସଠିକ ଭାବରେ ପଢିବ ଉଚିତ୍। ଯାହା ପରେ ଶୁଣାଣି ହେବ ବୋଲି କୋର୍ଟ କହିଛନ୍ତି। ସୂଚନାଯୋଗ୍ୟ, ଦିଲ୍ଲୀ-ଏନ୍ସିଆର୍ରେ ବାୟୁ ପ୍ରଦୂଷଣ ସମସ୍ୟାକୁ ମୁକାବିଲା କରିବା ପାଇଁ କେନ୍ଦ୍ର ସରକାର ଅଧ୍ୟାଦେଶ ମାଧ୍ୟମରେ ଏକ ନୂଆ ଆଇନ ଆଣିଛନ୍ତି। ନୂଆ ଆଇନ ଅଧୀନରେ ପ୍ରଦୂଷଣକାରୀଙ୍କୁ ୫ ବର୍ଷ ଜେଲ୍ ଦଣ୍ଡ ଏବଂ ୧ କୋଟି ଟଙ୍କା ଜରିମାନା କରାଯିବ।
