ଲଣ୍ଡନ,୧୪।୩: ପ୍ରଥମଥର ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି)ରେ ଭାରତର ସ୍ଥାୟୀ ସଦସ୍ୟତାକୁ ସମର୍ଥନ କରିଛି ବ୍ରିଟେନ୍। ବ୍ରିଟେନ ସରକାର ସଂସଦରେ ଉପସ୍ଥାପିତ କରିଥିବା ପ୍ରତିରକ୍ଷା ଏବଂ ବୈଦେଶିକ ନୀତି ସମୀକ୍ଷା ରିପୋର୍ଟ ‘ଇଣ୍ଟିଗ୍ରେଟେଡ ରିଭ୍ୟୁ ରିଫ୍ରେସ ୨୦୨୩’ ରେ ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନଏସ୍ସି)ରେ ଭାରତର ସ୍ଥାୟୀ ସଦସ୍ୟତା ଏବଂ ୟୁଏନଏସ୍ସିରେ ସଂସ୍କାର ଆଣିବାକୁ ଯୁକ୍ତି ବାଢିଛନ୍ତି। ସୁରକ୍ଷା ପରିଷଦରେ ଭାରତର ସଦସ୍ୟତାକୁ ସମର୍ଥନ କରିବା ପାଇଁ ବ୍ରିଟେନ ସରକାରଙ୍କ ଏହା ହେଉଛି ପ୍ରଥମ ପ୍ରମୁଖ ପ୍ରତିବଦ୍ଧତା। ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନକଙ୍କ ବୈଦେଶିକ ବ୍ୟାପାର ମୁଖପାତ୍ର ଏହି ସୂଚନା ଦେଇଛନ୍ତି।
ଏହି ରିପୋର୍ଟରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ବ୍ୟାପକ ରଣନୀତିକ ଭାଗିଦାରୀ, ୨୦୩୦ ରୋଡମ୍ୟାପର କାର୍ଯ୍ୟକାରିତା, ଭାରତର ଜି-୨୦ ଅଧ୍ୟକ୍ଷତାର ସମର୍ଥନ, ମୁକ୍ତ ବାଣିଜ୍ୟ ସଂଳାପ, ପ୍ରତିରକ୍ଷା ଏବଂ ସୁରକ୍ଷା ସହଭାଗିତାକୁ ଦୃଢକରିବା, ଭାରତ-ପ୍ରଶାନ୍ତ ମହାସାଗରରେ ଟେକ୍ନୋଲୋଜି ଏବଂ ସାମୁଦ୍ରିକ ସୁରକ୍ଷା ଉପରେ ସହଯୋଗ ବୃଦ୍ଧି ବିଷୟରେ ଆଲୋକପାତ କରାଯାଇଛି।
