ନୂଆଦିଲ୍ଲୀ,୧୩।୮ : ଭାରତୀୟମାନେ କ୍ରମାଗତ ଭାବେ ଖାଲିସ୍ତାନୀଙ୍କର ଟାର୍ଗେଟ ହେବାରେ ଲାଗିଛନ୍ତି। ଏଭଳି ପରିସ୍ଥିତିରେ ବ୍ରିଟିଶ ସୁରକ୍ଷା ମନ୍ତ୍ରୀ ଟମ ଟୁଗେନହାଟ ସ୍ପଷ୍ଟ କରିଛନ୍ତି ଲଣ୍ଡନରେ ଭାରତୀୟ ଉଚ୍ଚ ଆୟୋଗ ଏବଂ ଏହାର କର୍ମଚାରୀଙ୍କ ସୁରକ୍ଷା ପାଇଁ ବ୍ରିଟେନ ଆବଶ୍ୟକ ପଦକ୍ଷେପ ନେଉଛି।
ଉଲ୍ଲେଖନୀୟ କଥା ହେଉଛି, ବ୍ରିଟିଶ ସୁରକ୍ଷା ମନ୍ତ୍ରୀ ଟୁଗେନହାଟ ଅଗଷ୍ଟ ୧୦ରୁ ୧୨ରୁ ତିନି ଦିନିଆ ଗସ୍ତରେ ଆସି କୋଲକାତାରେ ଜି-୨୦ ଦୁର୍ନୀତି ନିବାରଣ ମନ୍ତ୍ରୀ ବୈଠକରେ ଭାଗ ନେଇଥିଲେ। ସେ ଦିଲ୍ଲୀରେ ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସହ ଆଲୋଚନା କରିଥିଲେ।
ବର୍ତ୍ତମାନ ବରିଷ୍ଠ ମନ୍ତ୍ରୀ ଟୁଗେନହାଉଟ କହିଛନ୍ତି ଖାଲିସ୍ତାନ ସମର୍ଥକ ଉପାଦାନଗୁଡ଼ିକର କାର୍ଯ୍ୟକଳାପ ଉପରେ ବ୍ରିଟିଶ ସରକାର ଭାରତର ଚିନ୍ତାକୁ ହୃଦୟଙ୍ଗମ କରିଛନ୍ତି। ବ୍ରିଟେନରେ ଏଭଳି ଦଳଙ୍କୁ ମୂଳୋତ୍ପାଟନ କରାଯିବ। ସେ କହିଛନ୍ତି ମୁଁ ସ୍ପଷ୍ଟ କରିବାକୁ ଚାହୁଁଛି ଯଦି ବ୍ରିଟେନରେ କୌଣସି ନାଗରିକଙ୍କର କିଛି ସମସ୍ୟା ଥାଏ, ତେବେ ଏହା ଅନ୍ୟ କେଉଁ ଦେଶର ଚିନ୍ତା ନୁହେଁ ବରଂ ବ୍ରିଟେନ ସମସ୍ୟା। ସରକାର ଏନେଇ କଠୋର ପଦକ୍ଷେପ ଗ୍ରହଣ କରିବେ।
ଲଣ୍ଡନରେ ଭାରତୀୟ ଲୋକମାନେ ନିରାପଦରେ ଅଛନ୍ତି। ଖାଲିସ୍ତାନ ସମର୍ଥକଙ୍କ ସହ ମୁକାବିଲା କରିବା ପାଇଁ ବ୍ରିଟେନର କ୍ଷମତା ବୃଦ୍ଧି ପାଇଁ ସରକାର ୯୫ ହଜାର ପାଉଣ୍ଡର ସହାୟତା ଘୋଷଣା କରିଛନ୍ତି ବୋଲି ସେ କହିଛନ୍ତି।
