ଭୁବନେଶ୍ୱର, ୧୨।୩(ବ୍ୟୁରୋ): କୋଭିଡ୍ ସମୟରେ ପାଠ ଛାଡ଼ିଥିବା ପିଲାଙ୍କୁ ତୁରନ୍ତ ସ୍କୁଲ (ସରକାରୀ ଓ ବେସରକାରୀ) ଫେରାଇ ଆଣିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ଓଡ଼ିଶା ମାନବାଧିକାର କମିଶନ(ଓଏଚ୍ଆର୍ସି)। ଏଥିସହିତ ୨୬ ତାରିଖ ସୁଦ୍ଧା ଏ ନେଇ ରିପୋର୍ଟ ଦେବା ପାଇଁ ମଧ୍ୟ କମିଶନ କହିଛନ୍ତି। ଏ ସଂକ୍ରାନ୍ତରେ ଗତ ଜାନୁୟାରୀ ୧୦ରେ ଓଡ଼ିଶା ଅଭିଭାବକ ମହାସଂଘ ପକ୍ଷରୁ ଓଏଚ୍ଆର୍ସିଙ୍କ ନିକଟରେ ଏକ ପିଟିଶନ ଦାଏର ହୋଇଥିଲା। କମିଶନ ଅଧ୍ୟକ୍ଷ ଜଷ୍ଟିସ ବିଜୟ କ୍ରିଷ୍ଣ ପଟେଲ ଓ ସଦସ୍ୟ ଅସୀମ ଅମିତାଭ ଦାଶଙ୍କୁ ନେଇ ଗଠିତ ବେଞ୍ଚ ଏହାର ବିଚାର କରି ସ୍କୁଲ୍ ଛାଡ଼ିଥିବା ପିଲାଙ୍କୁ ତୁରନ୍ତ ମିଶନ ମୋଡ୍ରେ ଫେରାଇ ଆଣିବାକୁ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା, ଅନୁସୂଚିତ ଜାତି ଓ ଜନଜାତି ଏବଂ ଲେବର ଓ ଇଏସ୍ଆଇ ବିଭାଗକୁ ନିର୍ଦ୍ଦେଶ ଦେଇଛନ୍ତି।
ରାଜ୍ୟରେ ପ୍ରାୟ ୮ ଲକ୍ଷ ପିଲା ପାଠ ଛାଡ଼ି ଓଡ଼ିଶା ତଥା ରାଜ୍ୟ ବାହାରେ କାମ କରୁଛନ୍ତି। ସରକାରୀ ସ୍କୁଲ ବନ୍ଦ ଥିଲାବେଳେ ଏହାର ଠିକ୍ ହିସାବ ମିଳିବା କଷ୍ଟକର ଥିଲା। ଏବେ ସ୍କୁଲ ଖୋଲିବା ପରେ ସ୍ପଷ୍ଟ ଚିତ୍ର ମିଳିପାରିଛି। ତେଣୁ ସେମାନଙ୍କୁ ପୁଣି ଫେରାଇ ଆଣି ସ୍କୁଲରେ ନାମ ଲେଖାଇବା ସହ ସେମାନଙ୍କ ରହିବା ପାଇଁ ଉପଯୁକ୍ତ ବ୍ୟବସ୍ଥା କରିବାକୁ ମହାସଂଘ ଅଧ୍ୟକ୍ଷ ବାସୁଦେବ ଭଟ୍ଟ ଓ ଉପଦେଷ୍ଟା ମନୋଜ ଜେନା ତାଙ୍କ ପିଟିଶନରେ କମିଶନଙ୍କ ଦୃଷ୍ଟି ଆକର୍ଷଣ କରିଥିଲେ। ତେବେ ଏହାର ଶୁଣାଣି ସମୟରେ ମହାସଂଘର ସହ ଅଧ୍ୟକ୍ଷ ପ୍ରସନ୍ନ ବିଶୋୟୀ ଓ ସଙ୍ଗଠନ ସମ୍ପାଦକ ରମେଶ ଭାରତୀ ଉପସ୍ଥିତ ରହି ତଥ୍ୟ ଉପସ୍ଥାପନ କରିଥିଲେ। ପିଲାଙ୍କ ସ୍ଥିତି ଜାଣିବାକୁ ମହାସଂଘ ସଦସ୍ୟ ସାରା ଓଡ଼ିଶା ଗସ୍ତ କରିଥିଲେ। ଏହି ସମୟରେ ଯେଉଁ ଢାବା, ଲଜ୍, ଛୋଟ ବଡ଼ ବ୍ୟବସାୟ ଅନୁଷ୍ଠାନକୁ ଗଲେ ସବୁଠି ସାନ ପିଲାମାନେ ମଜଦୁରି କାମରେ ଲାଗିଥିବା ଦେଖିବାକୁ ପାଇଥିଲେ। ଅଧିକାଂଶ କରୋନା କାଳରେ ସ୍କୁଲ୍ ଛାଡ଼ିଥିବା ଜଣାପଡିଥିଲା। ସେମାନଙ୍କ ସଂଖ୍ୟା ଅନୁମାନ କଲେ ପ୍ରାୟ ୮ ଲକ୍ଷ ହେବ। ବିଶେଷ ଭାବେ କଳାହାଣ୍ଡି, ବଲାଙ୍ଗୀର, ବରଗଡ଼, ନୂଆପଡ଼ା, ସୋନପୁର, କନ୍ଧମାଳ, ଗଞ୍ଜାମ, ଗଜପତି, କୋରାପୁଟ, ରାୟଗଡ଼ା, ମାଲକାନଗିରି, ନବରଙ୍ଗପୁର, ମୟୂରଭଞ୍ଜ, କେନ୍ଦୁଝର, ଦେବଗଡ଼, ବାଲେଶ୍ୱର ଓ ଅନ୍ୟାନ୍ୟ ପାଖାପାଖି ଜିଲାରୁ ପିଲାମାନେ ଅନ୍ୟ ଜିଲାକୁ ପଳାଇଥିବା ଦେଖାଯାଇଥିଲା। ବିଶେଷ ଭାବେ ବଲାଙ୍ଗୀର, କଳାହାଣ୍ଡି, ନୂଆପଡ଼ା ଓ ଗଜପତି ଜିଲାରୁ ପିଲାମାନେ ସେମାନଙ୍କ ପରିବାର ସହ ବାହାରକୁ ଇଟା ଭାଟିରେ କାମ କରିବାକୁ ଯାଇଥିବା ଜାଣିବାକୁ ପାଇଥିଲେ। ସେମାନେ ଏବେ ନ ଆସିଲେ ଆଉ ପାଠ ପଢ଼ିବେ ନାହିଁ, ଯାହାକି ଆମ ପାଇଁ ସବୁଠାରୁ ବଡ଼ କ୍ଷତି ହେବ। ସେଥିପାଇଁ ସେମାନଙ୍କୁ ତୁରନ୍ତ ସ୍କୁଲ ଫେରାଇ ଆଣିବା ପାଇଁ ମହାସଂଘ ପକ୍ଷରୁ ଅନୁରୋଧ କରାଯାଇଥିଲା।
