ନବରଙ୍ଗପୁର,୩୦।୩(ବି.ପ୍ର.):ନବରଙ୍ଗପୁର ଜିଲାରେ ଖୁଲମଖୁଲା ଚାଲିଛି ବେଆଇନ ଇଟାଭାଟି। ରାଜସ୍ବ ବିଭାଗ ଜାଣିଶୁଣି ଚୁପ୍ ବସିଛି। ଗ୍ରାମୀଣ କ୍ଷେତ୍ରରେ କାମ କରିବା ଓ ରାଜସ୍ବ ଆଦାୟ ପାଇଁ ରାଜସ୍ବ ନିରୀକ୍ଷକ ଓ ଅତିରିକ୍ତ ରାଜସ୍ବ ନିରୀକ୍ଷକ ରହିଛନ୍ତି। ତହସିଲଦାରଙ୍କୁ ରାଜସ୍ବ ବିଭାଗ କର୍ମଚାରୀମାନେ ବେଆଇନ ଇଟାଭାଟି ସମ୍ପର୍କରେ ଜଣାଉନାହାନ୍ତି। କେତେଜଣ ରାଜସ୍ବ କର୍ମଚାରୀ ହାତଗୁଞ୍ଜା ନେଇ ବେଆଇନ ଇଟାଭାଟି ପାଇଁ ବେସରକାରୀଭାବେ ଅନୁମତି ଦେଇଥିବା ଅଭିଯୋଗ ହୋଇଛି।
ତହସିଲ ଅଧୀନ କୁସୁମଝର ଜଳଭଣ୍ଡାର ପରିସର ଖଣ୍ଡୁଗୁଡ଼ା ନିକଟରେ ୧୬ଟି, ନନ୍ଦାହାଣ୍ଡି ବ୍ଲକ ପୋଡ଼ାଲଗୁଡ଼ା ପଞ୍ଚାୟତ ଅଧୀନ ଗେଲା ଗାଦବାଗୁଡ଼ା ଗାଁ ନିକଟରେ ୧୦ ଇଟାଭାଟି ରହିଛି। ବାୟୁ ପ୍ରଦୂଷଣ ରୋକିବା ପାଇଁ ସରକାର ଅନେକ ଚିନ୍ତାରେ ରହିଛନ୍ତି। କୁସୁମଝର ଜଳଭଣ୍ଡାର ନିକଟରେ ନବରଙ୍ଗପୁର କେନ୍ଦ୍ରୀୟ ବିଦ୍ୟାଳୟ ଓ ହିର୍ଲି ପାହାଡ଼ ରହିଛି । ବେଆଇନ ଇଟାଭାଟି ଯୋଗୁ ବାୟୁ ପ୍ରଦୂଷଣ ବଢ଼ୁଛି। ଫଳରେ ସ୍କୁଲ ଛାତ୍ରୀଛାତ୍ର ପାଠ ପଢ଼ିବାରେ ସମସ୍ୟା ହେଉଥିବା ନେଇ ଜିଲାପାଳଙ୍କୁ ଲିଖିତଭାବେ ଜଣାଇଥିଲେ। ଗେଲାଗଦବାଗୁଡ଼ା ବେଆଇନ ଇଟା ଭାଟି ନିକଟରେ ଜିଲା ମୁଖ୍ୟ ଚିକିତ୍ସାଳୟ ରହିଛି। ଇଟା ପଡ଼ିବା ବେଳେ ତାହାର ପ୍ରଦୂଷଣ ଶିଶୁ ଓ ମାତୃ ଚିକିତ୍ସା ବିଭାଗକୁ ପ୍ରବେଶ କରୁଛି। ସରକାର ବେଆଇନ ଇଟାଭାଟି ବନ୍ଦ କରିବା ପାଇଁ ନିର୍ଦ୍ଦେଶ ଦେଇଥିଲେ ସୁଦ୍ଧା ନବରଙ୍ଗପୁର ଜିଲାରେ ଏହାର ଖୁଲମଖୁଲା ଉଲ୍ଲଂଘନ ହେଉଛି। ଫ୍ଲାଏଆଶ୍ ଇଟା ପ୍ରସ୍ତୁତ ପାଇଁ ଅନେକ ବ୍ୟବସାୟୀ ବ୍ୟାଙ୍କ ଲୋନ୍ କରି ପ୍ରକଳ୍ପଗୁଡ଼ିକ କ୍ଷତିରେ ଚଳାଇଛନ୍ତି । ସରକାର ମଧ୍ୟ ଫ୍ଲାଏଆଶ୍ ଇଟା ପ୍ରସ୍ତୁତ ପାଇଁ ପ୍ରୋତ୍ସାହନ ଯୋଗାଉଥିଲେ ମଧ୍ୟ କେତେକ ରାଜସ୍ବ କର୍ମଚାରୀଙ୍କ ଯୋଗୁ ବେଆଇନ ଇଟାଭାଟି ଚାଲିବା ଦ୍ୱାର ଫ୍ଲାଏଆଶ୍ ଇଟା ବ୍ୟବସାୟୀ କ୍ଷତି ସହି ପ୍ରକଳ୍ପ ବନ୍ଦ କରିବା ସ୍ଥିତିକୁ ଆସିଲେଣି। ଏନେଇ ନବରଙ୍ଗପୁର ତହସିଲଦାର ଜୟଦେବ ରଥ ଆଚାର୍ଯ୍ୟଙ୍କୁ ପଚାରିବାରୁ ମୁଁ ନୂଆରେ ଜଏନ କରିଛି। ରାଜସ୍ବ ନିରୀକ୍ଷକମାନେ କିଭଳି ବେଆଇନ ଇଟାଭାଟି ସମ୍ପର୍କରେ ଜଣାଉ ନାହାନ୍ତି ତାହା ଏବେ ଜାଣିଲି। ଏନ୍ଫୋର୍ସ ଟିମ୍ କରାଯାଇ ବେଆଇନ ଇଟାଭାଟିଗୁଡ଼ିକ ଉପରେ ଚଢ଼ାଉ କରାଯିବ ବୋଲି ସେ କହିଛନ୍ତି।
