ମୋହନା,୭ା୮(ମନ୍ମଥ ମିଶ୍ର): ସରକାର ଗରିବ ଅସହାୟମାନଙ୍କ ପାଇଁ ପକ୍କାଘର ନିର୍ମାଣ ଲାଗି ଅର୍ଥ ପ୍ରଦାନ କରୁଛନ୍ତି। ହେଲେ କିଛି ଦୁର୍ନୀତିଗ୍ରସ୍ତ ଅଧିକାରୀମାନଙ୍କ ପାଇଁ ଗରିବ ଲୋକେ ଯୋଜନାର ସୁଫଳ ନପାଇ ଅଧାପନ୍ତରିଆ ଅବସ୍ଥାରେ ସରକାରୀ ଅର୍ଥକୁ ଚାହିଁ ବସିଛନ୍ତି। କାରଣ ୫ ହଜାର ନଦେଲେ ହେଉନି ବିଲ୍। ଏଭଳି ଅଭିଯୋଗ କରିଛନ୍ତି ମୋହନା ବ୍ଲକର କାମିଲି ଗୁଡା ଗ୍ରାମର ସୁବାସ ମଳିକ। ଅଧାପନ୍ତରିଆ ଅବସ୍ଥାରେ ଆବାସ ଘରଟି ଅଛି, ଛାତ ପଡିପାରୁନାହିଁ। ଘର ସମ୍ମୁଖରେ ବାଲି ସହ ଗୋଡି ବି ଗଚ୍ଛିତ କରି ରଖାଯାଇଛି। ଛାତ ପଡିବ। ସେଥିପାଇଁ ଗୋଟିଏ ବଖରା ସମ୍ପୂର୍ଣ୍ଣ ସେଣ୍ଟ୍ରିଂ କାମ ସରିଥିବା ବେଳେ ସାମ୍ନା ବଖରାଟିର ସେଣ୍ଟ୍ରିଂ କିଛି ବାକି ରହିଛି।
ସୁବାସଙ୍କ କହିବା ଅନୁଯାୟୀ, ୨୦୧୭ରେ ସରକାରୀ ଯୋଜନାରେ ଘର ନିର୍ମାଣ ପାଇଁ କାର୍ଯ୍ୟାଦେଶ ପାଇଥିଲେ। କିନ୍ତୁ ଅର୍ଥ ଅଭାବରୁ ଦୀର୍ଘ ୫ ବର୍ଷ ମଧ୍ୟରେ ସେ ଏବେ ଧୀରେ ଧୀରେ ନିଜର ସ୍ବପ୍ନର ଘରକୁ ସମ୍ପୂର୍ଣ୍ଣ କରିବା ପାଇଁ ଚେଷ୍ଟା କରି ସରକାରଙ୍କ ତରଫରୁ ଦୁଇଟି କିସ୍ତିରେ ଟଙ୍କା ମଧ୍ୟ ପାଇଛନ୍ତି। କିନ୍ତୁ ଏବେ ଛାତ ପକାଇବା ପାଇଁ ତୃତୀୟ କିସ୍ତି ମିଳିବ। ସେଥିପାଇଁ ଧାର କରଜ କରି ସବୁ କାମ ସାରିବା ପରେ, ଛାତ ପକାଇବା ଉଦ୍ଦେଶ୍ୟ ନେଇ ତୃତୀୟ କିସ୍ତି ବିଲ୍ ପାଇଁ ପଞ୍ଚାୟତକୁ ଦୌଡୁଛନ୍ତି। କାରଣ ଛାତ ପକାଇବା ପାଇଁ ତୃତୀୟ କିସ୍ତି ପାଇଲେ ସେ ଲୁହା, ସିମେଣ୍ଟ କିଣି ଛାତ ପକାଇବେ। ହେଲେ ପଞ୍ଚାୟତର ପିଇଓ ପ୍ରକାଶ ମିଶ୍ର ବିଲ୍ ପାସ୍ କରାଇବା ପାଇଁ ୫ ହଜାର ଟଙ୍କା ଦାବି କରୁଛନ୍ତି। ଟଙ୍କା ଯୋଗାଡ଼ କରି ନ ଦେଇପାରିବାରୁ ୨ ରୁ ୩ ମାସ ହେବ ଦୌଡାଉଥିବା ଅଭିଯୋଗ କରିଛନ୍ତି ହିତାଧିକାରୀ ସୁବାସ। ଏ ନେଇ ଲିଲିଗଡ ପଞ୍ଚାୟତର ପିଇଓଙ୍କୁ ପଚାରିବାରୁ ସେମାନଙ୍କ ଅଭିଯୋଗ ଭିତ୍ତିହୀନ, ଦୁଇରୁ ତିନି ଦିନ ମଧ୍ୟରେ ତାଙ୍କର ବିଲ୍ ହୋଇଯିବ ବୋଲି କହିଛନ୍ତି।
