ଭୁବନେଶ୍ୱର, ୧୨।୧୦(କ୍ରୀଡ଼ା ପ୍ରତିନିଧି): ଭାରତ ଓ ଓଡ଼ିଶାରେ ପ୍ରଥମଥର ପାଇଁ ଆରମ୍ଭ ହୋଇଛି ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ। କଳିଙ୍ଗ ଷ୍ଟାଡିୟମରେ ମଙ୍ଗଳବାର ଅନୁଷ୍ଠିତ ପ୍ରଥମ ମ୍ୟାଚରେ ମରକ୍କୋକୁ ୧-୦ ଗୋଲରେ ହରାଇ ବିଜୟ ଅଭିଯାନ ଆରମ୍ଭ କରିଛି ଟାଇଟଲ ଫେଭ୍ରାଇଟ ବ୍ରାଜିଲ। ମ୍ୟାଚର ୫ମ ମିନିଟରେ ବ୍ରାଜିଲର ୯ ନମ୍ବର ଜର୍ସି ପରିହିତ ଖେଳାଳି ଜନସନ ସ୍କୋର କରିଥିବା ଗୋଲଟି ଶେଷରେ ନିର୍ଣ୍ଣାୟକ ହୋଇଥିଲା। ମ୍ୟାଚରେ ଉଭୟ ମରକ୍କୋ ଓ ବ୍ରାଜିଲ ୪-୫-୧ ଷ୍ଟାର୍ଟିଂ ଲାଇନ୍ଅପ୍ ନେଇ ଖେଳିଥିଲେ। ମ୍ୟାଚରେ ବଲ ମରକ୍କୋ ନିୟନ୍ତ୍ରଣରେ ୩ ଓ ବ୍ରାଜିଲ ନିୟନ୍ତ୍ରଣରେ ୬୬ ପ୍ରତିଶତ ରହିଥିଲା। ପ୍ରତିପକ୍ଷ ଗୋଲପୋଷ୍ଟକୁ ବ୍ରାଜିଲ ୧୮ଟି ଏବଂ ମରକ୍କୋ ୪ଟି ଶଟ୍ ମାରିଥିଲା। ଏଥିରୁ ବ୍ରାଜିଲ ଗୋଟିଏ ଗୋଲ କରିବାରେ ସକ୍ଷମ ହୋଇଥିଲା। ମରକ୍କୋ ୨ଟି କର୍ନର ପାଇଥିବାବେଳେ ବ୍ରାଜିଲ ୮ଟି କର୍ନର ଶଟ୍ ମାରିଥିଲା। ଫାଉଲ୍ କ୍ଷେତ୍ରରେ ମଧ୍ୟ ବ୍ରାଜିଲ ଆଗରେ ରହିଥିଲା। ଏହି ସଂଖ୍ୟା ମରକ୍କୋର ୯ ଓ ବ୍ରାଜିଲର ୧୨ ରହିଥିଲା। ଆକ୍ରମଣାତ୍ମକ ପ୍ରଦର୍ଶନ କ୍ଷେତ୍ରରେ ଉଭୟ ପ୍ରାୟତଃ ସମକକ୍ଷ ପ୍ରଦର୍ଶନ କରିଥିଲେ। ମରକ୍କୋ ୨୫ ଓ ବ୍ରାଜିଲ ୨୭ ପ୍ରତିଶତ ଆକ୍ରମଣ କରି ଖେଳିଥିଲା। ଉଭୟ ଦଳର ଖେଳାଳି ଗୋଟିଏ ଲେଖାଏ ହଳଦିଆ କାର୍ଡ ପାଇଥିଲେ।
ମ୍ୟାଚର ପ୍ରଥମ ମିନିଟରେ ଆକ୍ରମଣ କରିଥିଲା ମରକ୍କୋ। ୧ମ ମିନିଟରେ ମାସନାଉ ସମୟା ଶୁଟ୍ କରିଥିବା ଶଟ୍କୁ ବ୍ରାଜିଲ ଗୋଲ କିପର ଅଟକାଇ ଦେଇଥିଲେ। ମାତ୍ର ତତ୍କ୍ଷଣାତ ବ୍ରାଜିଲ ପ୍ରତିଆକ୍ରମଣ କରିଥିଲା। ୩ୟ ମିନିଟରେ ଜନସନଙ୍କ ଶଟ୍କୁ ମରକ୍କୋ ଗୋଲକିପର ରୋକିଥିଲେ। ତେବେ ୫ମ ମିନିଟରେ ଲାରାଙ୍କଠାରୁ ପାଇଥିବା ଶଟ୍କୁ ବାମ ପଟରୁ ଗୋଲରେ ପରିଣତ କରିବାରେ ସକ୍ଷମ ହୋଇଥିଲେ ଜନସନ। ୪୦ତମ ମିନିଟରେ ମରକ୍କୋର ୟାଶମିନ ଜୋଉହିରଙ୍କୁ ୟେଲୋ କାର୍ଡ ବ୍ୟତୀତ ପ୍ରଥମାର୍ଦ୍ଧରେ ଆଉ ସେପରି କିଛି ଘଟଣା ଘଟି ନ ଥିଲା। ବ୍ରାଜିଲ ୧-୦ ଗୋଲରେ ଅଗ୍ରଣୀ ରହିଥିଲା। ଲୋ ର଼୍ୟାଙ୍କ୍ପ୍ରାପ୍ତ ଦଳ ହୋଇଥିଲେ ହେଁ ମରକ୍କୋ ଶକ୍ତିଶାଳୀ ବ୍ରାଜିଲକୁ କଡ଼ା ଚ୍ୟାଲେଞ୍ଜ ଦେଇଥିଲା।
ଦ୍ୱିତୀୟାର୍ଦ୍ଧ ଆରମ୍ଭରେ ବ୍ରାଜିଲ ଆକ୍ରମଣକୁ ଜୋରଦାର କରିଥିଲା। ୪୯ତମ ମିନିଟରେ ଆନା ଜୁଲିଆ ଗୋଲ ଉଦ୍ୟମ କରିଥିଲେ ହେଁ ମରକ୍କୋ ଗୋଲକିପର ଦୋର୍ବାଲି ଲୋଇସା ବଲ୍କୁ ବାହାରକୁ ପଠାଇ ଦେବାରେ ସକ୍ଷମ ହୋଇଥିଲେ। ୫୬ତମ ମିନିଟରେ ଜନସନ ଓ ୫୭ତମ ମିନିଟରେ ଗୁଟାଙ୍କ ପ୍ରୟାସକୁ ମଧ୍ୟ ଲୋଇସା ସଫଳତାର ସହ ରୋକିଥିଲେ। ମରକ୍କୋ ପକ୍ଷରୁ ମଧ୍ୟ ଏକାଧିକ ପ୍ରୟାସ ହୋଇଥିଲା। ମାତ୍ର କୌଣସି ଦଳ ଆଉ ଗୋଲ କରିପାରି ନ ଥିଲେ। ମୋଟାମୋଟି ଭାବେ ଗୋଟିଏ ଗୋଲ ବରଣ କରିଥିଲେ ହେଁ ମରକ୍କୋ ଭଲ ଖେଳିଥିଲା। ଅନ୍ୟପକ୍ଷରେ ପ୍ରତିଷ୍ଠା ଅନୁସାରେ ବ୍ରାଜିଲ ପ୍ରଦର୍ଶନ କରିପାରି ନ ଥିଲା। ଦଳ ବିଜୟୀ ହୋଇଥିବାରୁ ଖୁସି ଆସିଥିଲେ ହେଁ ଦଳର ପ୍ରଦର୍ଶନରେ ସନ୍ତୁଷ୍ଟ ହୋଇ ନ ଥିଲେ ମୁଖ୍ୟ କୋଚ୍ ସିମୋନି। ଏକାଧିକ ସୁଯୋଗ ହାତଛଡ଼ା ହେଲା, ତେବେ ଆଗାମୀ ମ୍ୟାଚରେ ଦଳ ଉନ୍ନତ ପ୍ରଦର୍ଶନ କରିବ ବୋଲି ସେ ଆଶା ପ୍ରକାଶ କରିଛନ୍ତି।
