ପାଟଣା,୨୪।୧(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଥାନା ଅଞ୍ଚଳର ଜଣେ ଯୁବକ ତାଙ୍କ ପ୍ରେମିକାଙ୍କ ତଣ୍ଟି ଚିପି ହତ୍ୟା କରିଥିବା ଅଭିଯୋଗରେ ରବିବାର ଠାକୁରମୁଣ୍ଡା ପୋଲିସ ତାଙ୍କୁ ଗିରଫ କରିଛି। ସେ ହେଲେ ପାଟଣା ମଝି ସାହିର ତପନ କୁମାର ମହାରଣା। ତପନ କେନ୍ଦୁଝର ଜିଲା ତୁରୁମୁଙ୍ଗା ଥାନା ବଡ଼ ଗମ୍ଭାରୀଆ ଗାଁର ମୃଦୁହାସିନୀ ପାତ୍ରଙ୍କୁ ପ୍ରେମ କରୁଥିଲେ। କରଞ୍ଜିଆ ଏସ୍ଡିପିଓ ସୁଦର୍ଶନ ଗଙ୍ଗେଇଙ୍କ ସୂଚନା ଅନୁଯାୟୀ, ମୃଦୁହାସିନୀ ପାଟଣା ବଜାରରେ ଥିବା ଏକ ଡ୍ରେସ ଦୋକାନକୁ ଡିସେମ୍ବରରେ ମାର୍କେଟିଙ୍ଗ କରିବାକୁ ଆସିଥିବା ବେଳେ ତାଙ୍କର ତପନଙ୍କ ସହ ଦେଖାହୋଇଥିଲା। ତପନ ବିବାହିତ ଥିବାରୁ ପ୍ରଥମ ସ୍ତ୍ରୀଙ୍କୁ ଛାଡ଼ପତ୍ର ଦେବାକୁ ମୃଦୁହାସିନୀ ଚାପ ପକାଉଥିଲେ। ଗତ୧୯ ତାରିଖରେ ଠାକୁରମୁଣ୍ଡା ଥାନା ଅଞ୍ଚଳର ଭୀମକୁଣ୍ଡ ରାସ୍ତା ଖଣ୍ଡବନ୍ଧ ଗାଁ ଜଙ୍ଗଲରୁ ମୃଦୁହାସିନୀଙ୍କ ମୃତଦେହ ଜବତ ହୋଇଥିଲା। ଠାକୁରମୁଣ୍ଡା ଥାନା ଅଧିକାରୀ ପ୍ରେମଦା ନାଏକ ଏହି ଘଟଣାର ତଦନ୍ତ ଆରମ୍ଭ କରିଥିଲେ। ଗତ ୧୮ ତାରିଖରେ ଚୁନିରେ ତଣ୍ଟି ଚିପି ହତ୍ୟା କରିଥିବା ତପନ ପୋଲିସ ସମ୍ମୁଖରେ ସ୍ବୀକାର କରିଛନ୍ତି। ପୋଲିସ ଏନେଇ ଏକ ହତ୍ୟାଜନିତ (ନଂ.୧୨/୨୨) ମାମଲା ରୁଜୁ କରି ସୋମବାର ତପନଙ୍କୁ କୋର୍ଟ ଚାଲାଣ କରାଯିବ ବୋଲି ସୂଚନା ଦେଇଛି।
