ଚେନ୍ନାଇ,୧୮।୩: ବୋଲର ବୋଲିଂ କରିବା ପୂର୍ବରୁ ନନ୍ ଷ୍ଟ୍ରାଇକ୍ର ଏଣ୍ଡ୍ରେ ରନ୍ ଆଉଟ୍ ଉପରେ ଏମ୍ସିସିର ନିଷ୍ପତ୍ତିକୁ ସ୍ବାଗତ କରିଛନ୍ତି ଭେଟେରାନ ଭାରତୀୟ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ। ଏବେ ଏହା ଖଳୁଆଡ଼ ମନଭାବ ବିରୋଧରେ ନ ଥିବାରୁ ନନ୍ ଷ୍ଟ୍ରାଇକରଙ୍କୁ ମଙ୍କଡ୍ ଆଉଟ୍ କରିବା ପୂର୍ବରୁ ବୋଲରମାନଙ୍କୁ ଦ୍ୱିତୀୟ ଚିନ୍ତା କରିବା ଦରକାର ନାହିଁ ବୋଲି ସେ କହିଛନ୍ତି।
କ୍ରିକେଟରେ ପ୍ରଚଳିତ ନିୟମର ତଦାରଖ କରୁଥିବା ମାରିଲେବୋନ କ୍ରିକେଟ କ୍ଲବ ଚଳିତ ମାସରେ ବିବାଦୀୟ ରନ୍ ଆଉଟ୍କୁ ଉଚିତ ବୋଲି ଦର୍ଶାଇଥିଲା। ଏଥିସହିତ କ୍ରିକେଟର ନିୟମରେ ୯ଟି ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରାଯାଇଥିଲା। ନୂଆ ନିୟମ ଆସନ୍ତା ଅକ୍ଟୋବରରୁ ଲାଗୁ ହେବ।
“ମୋ ସାଥି ବୋଲରମାନେ ବୁଝିବାକୁ ଚେଷ୍ଟା କରନ୍ତୁ। ନନ୍ ଷ୍ଟ୍ରାଇକର ନେଉଥିବା ଅତିରିକ୍ତ ଷ୍ଟେପ୍ ତୁମ ପୂରା କ୍ୟାରିୟରକୁ ଶେଷ କରିଦେଇପାରେ। ନନ୍ ଷ୍ଟ୍ରାକର ସେହି ଅତିରିକ୍ତ ଷ୍ଟେପ୍ ଯୋଗୁ ଷ୍ଟ୍ରାଇକ୍ରେ ପହଞ୍ଚିପାରେ, ତେବେ ସେ ପରବର୍ତ୍ତୀ ବଲରେ ଛକା ମାରି ପାରନ୍ତି। କିନ୍ତୁ ସେତେବେଳେ ଷ୍ଟ୍ରାଇକରେ ଥିବା ବ୍ୟାଟର ଆଉଟ୍ ହୋଇପାରେ। ଯଦି ତୁମେ ଉଇକେଟ ନିଅ, ତେବେ ତୁମ କ୍ୟାରିୟର ଆଗକୁ ବଢ଼ିବ। ତା’ର ବିପରୀତ ପୂର୍ବରୁ ନନ୍ ଷ୍ଟ୍ରାଇକର ଥିବା ବ୍ୟାଟର ଛକା ମାରିଲେ, ବୋଲରଙ୍କ କ୍ୟାରିୟର ନିମ୍ନଗାମୀ ହୋଇପାରେ। ସେହି ଅତିରିକ୍ତ ଷ୍ଟେପ୍ର ଖୁବ୍ ପ୍ରଭାବ ରହିଛି। ଏଣୁ ମୋ ମତରେ ବଲ ପକାଇବା ପୂର୍ବରୁ ନନ୍ ଷ୍ଟ୍ରାଇକର କ୍ରିଜ ଛାଡ଼ିଲେ ବୋଲରଙ୍କୁ ଦ୍ୱିତୀୟ କିଛି ଚିନ୍ତା ନ କରି ରନ୍ ଆଉଟ୍ କରିବା ଉଚିତ” ବୋଲି ଅଶ୍ୱିନ କହିଛନ୍ତି।
