ବରଗଡ଼,୧୭।୬(ପ୍ରେମାନନ୍ଦ ଖମାରୀ):ବରଗଡ଼-ଭେଡ଼େନ କେନାଲରେ ବକ୍ସ କଣ୍ଡୁଇଟ୍ ନିର୍ମାଣରେ ହୋଇଥିବା ଅନିୟମିତତାକୁ ନେଇ ଚର୍ଚ୍ଚା ଥମିବାର ନାଁ ନେଉ ନାହିଁ। ଏହି ଅନିୟମିତତା ଧରାପଡ଼ିବା ପରେ ଗତ ୮ତାରିଖ ରାଜ୍ୟ ସରକାରଙ୍କ ଜଳସମ୍ପଦ ବିଭାଗ ପ୍ରକଳ୍ପ କାର୍ଯ୍ୟ ସମ୍ପାଦନରେ କର୍ତ୍ତବ୍ୟରେ ଘୋର ବିଶୃଙ୍ଖଳା ଏବଂ ଅବହେଳା କରିଥିବାରୁ ତତ୍କାଳୀନ ଅଧୀକ୍ଷଣ ଯନ୍ତ୍ରୀ ମଦନ ମୋହନ ସେଠୀ, ଭେଡ଼େନ ଜଳସେଚନ ସବ୍ ଡିଭିଜନର ସହକାରୀ ନିର୍ବାହୀ ଯନ୍ତ୍ରୀ ରାଜକୁମାର ମିଶ୍ର ଏବଂ ବରଗଡ଼ କେନାଲ ସେକ୍ସନର ସହକାରୀ ଯନ୍ତ୍ରୀ ରଞ୍ଜନ ପଟେଲଙ୍କୁ କାର୍ଯ୍ୟରୁ ନିଲମ୍ବିତ କରିଛି। ନିଲମ୍ବନ ହେବା ପରେ ବିଭାଗୀୟ ଯନ୍ତ୍ରୀଙ୍କ ଚେତା ପଶିଛି। ଯେଉଁ ଠିକାଦାରଙ୍କୁ ଉକ୍ତ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ସମାରୋହରେ ଫୁଲତୋଡ଼ା, ଉପାୟନ ଦେଇ ମଞ୍ଚାସୀନ କରିଥିଲେ, ସେହି ଠିକାଦାର ଅମରଦୀପ ଅଗ୍ରୱାଲଙ୍କ ବିରୋଧରେ ଏବେ ବରଗଡ଼ ଟାଉନ ଥାନାରେ ଏତଲା ଦେଇଛନ୍ତି। ତେବେ ଏତଲା ମଧ୍ୟ ସାଧାରଣ ନୁହେଁ। ସମ୍ପୃକ୍ତ ଠିକାଦାର ଅଗ୍ରୱାଲ ଓଡ଼ିଶା ଜଳସମ୍ପଦ ବିଭାଗର ସରକାରୀ ଜମିରେ ବିନା ଅନୁମତିରେ ଅବୈଧ ଖନନ କରି ସାଧାରଣ ଜନତାଙ୍କ ଜୀବନ ଓ ସୁରକ୍ଷା ପ୍ରତି ବିପଦ ସୃଷ୍ଟି କରିଥିବା ନେଇ ଉଲ୍ଲେଖ କରିଛନ୍ତି। ନିଲମ୍ବିତ ଯନ୍ତ୍ରୀ ପଟେଲ ଗତ ୯ତାରିଖରେ ଦେଇଥିବା ସେହି ଏତଲାକୁ ଭିତ୍ତି କରି ପୋଲିସ ଠିକାଦାର ଅଗ୍ରୱାଲଙ୍କ ବିରୋଧରେ ମଧ୍ୟ ଭାରତୀୟ ନ୍ୟାୟ ସଂହିତାର ଧାରା ୩୨୯(୩), ୩୨୬(ଏ), ପ୍ରିଭେନ୍ସନ ଅଫ୍ ଡେମେଜ୍ ଟୁ ପବ୍ଲିକ ପ୍ରପର୍ଟି ଆକ୍ଟ ୧୯୮୪ର ଧାରା-୩, ଓଡ଼ିଶା ଇରିଗେଶନ ଆକ୍ଟର ଧାରା-୩୯ରେ ଏକ ମାମଲା(ନଂ-୩୦୭/୨୬) ରୁଜୁ କରିଛି। ତେବେ ଗୋଟିଏ ପଟେ କାର୍ଯ୍ୟର ଶୁଭାରମ୍ଭ ସମାରୋହରେ ଫୁଲତୋଡ଼ା ସହିତ ମଞ୍ଚାସୀନ କରିବା ଏବଂ ଅନ୍ୟପଟେ ନିଲମ୍ବନ ହେବା ପରେ ସମ୍ପୃକ୍ତ ଠିକାଦାରଙ୍କ ବିରୋଧରେ ପୋଲିସରେ ଏତଲା ଏବେ ଚର୍ଚ୍ଚାର ବିଷୟ ହୋଇଛି।
କେବଳ ସେତିକି ନୁହେଁ, ନିଲମ୍ବନ ହେବା ପୂର୍ବରୁ କାହିଁକି ଓ କେଉଁ ସ୍ବାର୍ଥରେ ବିଭାଗୀୟ ଯନ୍ତ୍ରୀ ସବୁ ଜାଣିଶୁଣି ନୀରବ ରହିଥିଲେ ଏବଂ ନିଲମ୍ବନ ହେବା ପରେ ଏତଲା ଦେବା ପାଇଁ ଥାନାକୁ ଆଗେଇ ଆସିଲେ, ତାକୁ ନେଇ ମଧ୍ୟ ସାଧାରଣରେ ନାନା କଳ୍ପନାଜଳ୍ପନା ପ୍ରକାଶ ପାଇଛି। ସେହିପରି ଠିକାଦାରଙ୍କ ଉପରେ ସବୁ ଦୋଷ ଲଦି ସମ୍ପୃକ୍ତ ବିଭାଗୀୟ ଯନ୍ତ୍ରୀମାନେ ଏଭଳି ଏକ ବଡ଼ ଅନିୟମିତତାରୁ ଖସିଯିବାକୁ ଉଦ୍ୟମ କରୁଛନ୍ତି ନା ଜଣେ ନିଲମ୍ବିତ ଯନ୍ତ୍ରୀଙ୍କ ଦ୍ୱାରା ଏତଲା କରାଯାଇ ଏଥିରେ ପ୍ୟାଚଅପ୍ ମାରିବାକୁ ପ୍ରୟାସ କରାଯାଇଛି, ତାହା ଏବେ ଆଲୋଚନାର ବିଷୟ ପାଲଟିଛି। କଥା ସେତିକିରେ ସରି ନାହିଁ। ଏହି ଅନିୟମିତତାରେ ସମ୍ପୃକ୍ତ ଜଳସମ୍ପଦ ବିଭାଗର ୩ ଯନ୍ତ୍ରୀଙ୍କୁ ରାଜ୍ୟ ସରକାର ନିଲମ୍ବିତ କରି ସାରିଛନ୍ତି, ମାତ୍ର ଏତଲା ହେବାର ଏକ ସପ୍ତାହ ବିତି ଯାଇଥିଲେ ସୁଦ୍ଧା ପୋଲିସ ସମ୍ପୃକ୍ତ ଠିକାଦାରଙ୍କୁ ଗିରଫ କରିବା ତ ଦୂରର କଥା, ସେତେବେଳେ କେନାଲ ଖନନରେ ବ୍ୟବହୃତ ସାମଗ୍ରୀକୁ ମଧ୍ୟ ଏପର୍ଯ୍ୟନ୍ତ ଜବତ କରି ନ ପାରିବା ସମସ୍ତଙ୍କୁ ଚକିତ କରି ପକାଇଛି। ଅନ୍ୟପଟେ ମାଟି, ବାଲି, କଂକ୍ରିଟ୍ ଉଠାଯାଇଥିବା ସ୍ଥାନରେ ବାଲିବସ୍ତା ଦେଇ କାମଚଳା ମରାମତି କରାଯାଉ ଥିଲେ ମଧ୍ୟ ପାଣି ଛଡ଼ା ଗଲେ ଓ ବର୍ଷା ହେଲେ କେନାଲର ସ୍ଥାୟିତ୍ୱ ଏବଂ ସାଧାରଣ ଜନତାଙ୍କ ଜୀବନ ଓ ସୁରକ୍ଷା ପ୍ରତି ବିପଦ ସୃଷ୍ଟି ଆଶଙ୍କା ଏବେ ମଧ୍ୟ ରହିଛି।
ସୂଚନା ଅନୁଯାୟୀ, ପ୍ରାୟ ୧୦୦ କୋଟି ଟଙ୍କା ବ୍ୟୟ ଅଟକଳରେ ବରଗଡ଼-ଭେଡ଼େନ କେନାଲର ଆରଡ଼ି ୩୫୬୧ଏମ୍ଠାରୁ ୫୪୭୩ଏମ୍ ପର୍ଯ୍ୟନ୍ତ ବକ୍ସ କଣ୍ଡୁଇଟ୍ ନିର୍ମାଣ ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏହି ପ୍ରକଳ୍ପର ପ୍ରଥମ ପର୍ଯ୍ୟାୟରେ ବରଗଡ଼ ସହର ନିକଟସ୍ଥ ଉକ୍ତ କେନାଲର ଆରଡ଼ି ୪୧୪୫ଏମ୍ରୁ ଆର୍ଡି ୫୧୪୦ଏମ୍ ପର୍ଯ୍ୟନ୍ତ ଏହା ନିର୍ମାଣ ପାଇଁ ପ୍ରାୟ ୫୦କୋଟି ଟଙ୍କା ମଞ୍ଜୁର ହୋଇଥିଲା। ଗତମାସ ୧୭ତାରିଖ ସନ୍ଧ୍ୟାରେ ଏକ ବିଶାଳ ଶୋଭାଯାତ୍ରାରେ ବାହାରି ସ୍ଥାନୀୟ ବିଧାୟକ ଅଶ୍ୱିନୀ ଷଡ଼ଙ୍ଗୀ ବିଭାଗୀୟ ଯନ୍ତ୍ରୀ, ଅଧିକାରୀ ଏବଂ ହଜାର ହଜାର ଲୋକଙ୍କ ଉପସ୍ଥିତିରେ ଏହି ପ୍ରକଳ୍ପ ନିର୍ମାଣ କାର୍ଯ୍ୟର ଶୁଭାରମ୍ଭ କରିଥିଲେ। ସେତେବେଳେ ବିଭାଗୀୟ ଯନ୍ତ୍ରୀମାନେ ଠିକାଦାର ଅମରଦୀପ ଅଗ୍ରୱାଲଙ୍କ ସମେତ ଅନ୍ୟ ଅତିଥିଙ୍କୁ ଫୁଲତୋଡ଼ା ସହିତ ସମାରୋହରେ ମଞ୍ଚାସୀନ କରିଥିଲେ। ସମାରୋହ ପରେ କେନାଲରୁ ମାଟି, ବାଲି, କଂକ୍ରିଟ୍ ଉଠାଯାଇ ନିର୍ମାଣ କାର୍ଯ୍ୟ ମଧ୍ୟ ଜୋରସୋର୍ରେ ଚାଲିଥିଲା। ମାତ୍ର ଗତମାସ ୨୫ତାରିଖ ଝଡ଼ବତାସରେ ବରଗଡ଼ ଥାନାଛକସ୍ଥିତ ଧନୁଯାତ୍ରା ତୋରଣ ଭାଙ୍ଗିଯିବା ପରେ ବକ୍ସ କଣ୍ଡୁଇଟ୍ ନିର୍ମାଣରେ ହୋଇଥିବା ଅନିୟମିତତା ପଦାକୁ ଆସିଥିଲା। ସେତେବେଳେ ରାତାରାତି ନିର୍ମାଣ କାର୍ଯ୍ୟକୁ ବନ୍ଦ କରି ଦିଆଯିବା ସହିତ ବ୍ୟବହୃତ ମେଶିନ ଗୁଡ଼ିକୁ ଉଠାଇ ନିଆଯାଇ ଥିବାବେଳେ ହଠାତ୍ ଅଧୀକ୍ଷଣ ଯନ୍ତ୍ରୀ ସେଠୀଙ୍କୁ ମୁଖିଗୁଡ଼ାକୁ ବଦଳି ହୋଇଥିଲା। ତେବେ ସରକାରଙ୍କ ବିନା ଅନୁମୋଦନ ଓ ବିନା ଚୁକ୍ତିନାମାରେ ଏହାର ନିର୍ମାଣ କାର୍ଯ୍ୟ ଚାଲିଥିବା ନେଇ ବିଜେଡି ରାଜ୍ୟ ସରକାରଙ୍କଠାରେ ଅଭିଯୋଗ କରିବା ପରେ ରାଜ୍ୟ ସରକାରଙ୍କ ଜଳସମ୍ପଦ ବିଭାଗ ଏଠାରେ କାର୍ଯ୍ୟରତ ତତ୍କାଳୀନ ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ ଏବଂ ସହକାରୀ ଯନ୍ତ୍ରୀଙ୍କୁ ନିଲମ୍ବିତ କରିଥିଲେ।