ଚମ୍ପୁଆ, ୮ା୧୦(ମହେଶ୍ୱର ଦାସ)ଅଧିକ ଅମଳ ଆଶାରେ ଉନ୍ନତ ମାନର ବିହନ ଚାଷ କରିଥିଲେ। ଧାନ ପାଚିବା ସମୟରେ ଫସଲରେ ଶୋଷକ ପୋକ ଲାଗି ଫଳରୁ ରସ ଶୋଷି ଅଗାଡ଼ି କରିଦେଉଛନ୍ତି। ଗଛ ସତେଜ ଥିବା ବେଳେ ଧାନ ଭିତରେ ମଞ୍ଜି ରହୁନାହିଁ। କେନ୍ଦୁଝର ଜିଲା ଚମ୍ପୁଆ ଏନ୍ଏସି ୧୩ ନମ୍ବର ୱାର୍ଡ ନୂଆଗାଁର ଚାଷୀ କୃଷ୍ଣ ଚନ୍ଦ୍ର ସୁଣ୍ଡିଙ୍କ ଧାନ କ୍ଷେତରେ ଏଭଳି ସମସ୍ୟା ଦେଖାଦେଇଛି । ଦିନକୁ ଦିନ ଏହି ରୋଗ ବଢ଼ିବାରେ ଲାଗିଥିବାରୁ ଫସଲ ଉଜୁଡ଼ିବା ଚିନ୍ତାରେ ଚାଷୀ ମୁଣ୍ଡରେ ହାତ ଦେଇଛନ୍ତି।
ଅନୁଯାୟୀ, କୃଷ୍ଣ ଉନ୍ନତ ମାନର ହାଇବ୍ରିଡ୍ ଧାନ ବିହନ ଆଣି ପ୍ରାୟ ୨ ଏକର ଜମିରେ ଚାଷ କରିଥିଲେ। ଅଧିକ ଅମଳ ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବା ସହ ରୋଗପୋକ ଦାଉରୁ ରକ୍ଷା ପାଇଁ କୀଟନାଶକ ବ୍ୟବହାର କରିଥିଲେ। ମାତ୍ର କିଛି ଦିନ ହେବ କଞ୍ଚା ଧାନଗୁଡ଼ିକ ଶୁଖିଯାଉଥିବା ଦେଖି କୃଷି ବିଭାଗ ସହ ଯୋଗାଯୋଗ କରିଥିଲେ। ଶୁଖିଯାଉଥିବା ଧାନ ଭିତରେ ମଞ୍ଜି ନ ଥିବା ବେଳେ ଏହି ରୋଗ ବଢ଼ିବାରେ ଲାଗିଛି। ଚାଷ ଜମିରେ ଚକଡ଼ା ଚକଡା ସ୍ଥାନରେ ଏଭଳି ପରିସ୍ଥିତି ଦେଖିବାକୁ ମିଳିଛି। ଖବର ପାଇ କୃଷି ବିଭାଗ ପକ୍ଷରୁ ଉକ୍ତ ଜମିକୁ ଯାଇ ଘଟଣାର ତଦନ୍ତ କରାଯିବାରୁ ଗଛଗୁଡ଼ିକ ସତେଜ ରହିଥିବା ବେଳେ ଧାନ ଶୁଖିଯାଇଥିବା ଏବଂ ଭିତରେ ଧାନ ମଞ୍ଜି ନ ଥିବା ଜଣାପଡ଼ିଥିଲା। କୃଷି ବିଭାଗ ପକ୍ଷରୁ ଏହା ଏକ ଶୋଷକ ଜାତୀୟ ପୋକ ଦ୍ୱାରା ପ୍ରଭାବିତ ହୋଇଛି। ପୋକ ଧାନ କାଣ୍ଡରେ ରହି ଆବଶ୍ୟକ କ୍ଷୀର ଶୋଷି ନେଉଥିବାରୁ ଧାନ ଭିତରେ ମଞ୍ଜି ହୋଇପାରୁ ନ ଥିବା ଏବଂ ଧାନ ଗୁଡ଼ିକ ଅଗାଡ଼ି ହେଉଯାଉଥିବା ଜଣାଯାଇଛି। ଏ ନେଇ ଚମ୍ପୁଆ କୃଷି ଅଧିକାରୀ ନୀଳମାଧବ ଦାସ କହିଛନ୍ତି, ଏ ପ୍ରକାର ରୋଗ ଧୀରେ ଧୀରେ ବ୍ୟାପିଥାଏ। ଏହାର ପ୍ରତିଶେଧକ ପାଇଁ ଚାଷୀଙ୍କୁ କୀଟନାଶକ ସିଞ୍ଚନ ପାଇଁ ପରାମର୍ଶ ଦେଇଛୁ। ଏହା ୩ ଦିନ ଛିଞ୍ଚତ୍ବା ଆବଶ୍ୟକ ରହିଛି। ଯଦି ଏଥିରେ ସୁଧାର ନ ଆସିଲା ତେବେ ଅନ୍ୟ କୀଟନାଶକ ବ୍ୟବହାର କରିବାକୁ ପରାମର୍ଶ ଦିଆଯିବ। କୃଷି ବିଭାଗ ପକ୍ଷରୁ ଏହି ରୋଗ ପୋକକୁ ନିୟନ୍ତ୍ରଣ ପାଇଁ ନଜର ରଖାଯିବ ବୋଲି ସେ ମତ ଦେଇଛନ୍ତି।
