ହାଙ୍ଗଝୋ,୧।୧୦: ଶନିବାର ଏସିଆନ୍ ଗେମ୍ସ ୨୦୨୩ର ଟେନିସ୍ ମିକ୍ସଡ ଡବଲ୍ସରେ ଭାରତର ରୋହନ ବୋପାନ୍ନା ଓ ଋତୁଜା ଭୋସ୍ଲେଙ୍କୁ ସ୍ବର୍ଣ୍ଣ ପଦକ ମିଳିଛି। ଶନିବାର ଅନୁଷ୍ଠିତ ଫାଇନାଲରେ ଭାରତୀୟ ଯୋଡି ୨-୬, ୬-୩ ଓ ୧୦-୪ ସେଟ୍ରେ ଚାଇନିଜ୍ ତାଇପେର ସୁଙ୍ଗ ହାଓ ହୁଆଙ୍ଗ ଓ ଏନ୍ ଶୁଓ ଲିଆଙ୍ଗଙ୍କୁ ପରାସ୍ତ କରିଛନ୍ତି। ଟୁର୍ନାମେଣ୍ଟରେ ଦ୍ୱିତୀୟ ସିଡ୍ର ମାନ୍ୟତା ପାଇଥିବା ଭାରତୀୟ ଯୋଡି ଆରମ୍ଭରୁ ପଛୁଆ ରହିଥିଲା। ପ୍ରଥମ ସେଟ୍କୁ ୨-୧ରେ ହାରିବା ପରେ ପରବର୍ତ୍ତୀ ଦୁଇ ସେଟ୍କୁ ଦଳ ସହଜରେ ଜିତି ନେଇଥିଲା। ଆରମ୍ଭରୁ ଋତୁଜାଙ୍କ ସର୍ଭିସ୍ ଠିକ୍ ନ ଥିବା ବେଳେ ଦ୍ୱିତୀୟ ସେଟ୍ରୁ ସେ ଚମତ୍କାର ପ୍ରଦର୍ଶନ କରିଥିଲେ। ତେବେ ବୋପାନ୍ନାଙ୍କ ଅଭିଜ୍ଞତା ଭାରତ ପାଇଁ ବେଶ୍ ଲାଭଦାୟକ ହୋଇଥିଲା। ଏହା ସହିତ ଭାରତ ଟେନିସ୍ ଇଭେଣ୍ଟରେ ଦ୍ୱିତୀୟ ପଦକ ହାସଲ କରିଥିବା ବେଳେ ଗୋଟିଏ ଲେଖାଏ ସ୍ବର୍ଣ୍ଣ ଓ ରୌପ୍ୟ ସହିତ ଅଭିଯାନ ଶେଷ କରିଛି। ଏହା ପୂର୍ବରୁ ସାକେତ ମାଇନେନି ଓ ରାମକୁମାର ରାମନାଥନ ଭାରତ ପାଇଁ ପୁରୁଷ ଡବଲ୍ସରେ ରୌପ୍ୟ ପଦକ ଜିତିଥିଲେ। ପ୍ରଥମ ସେଟ୍ରେ ଋତୁଜାଙ୍କ ରିଟର୍ନରେ ସମସ୍ୟା ରହିଥିବା ବେଳେ ଦ୍ୱିତୀୟ ସେଟ୍ରେ ବୋପାନ୍ନା ଉଭୟଙ୍କ ସାଇଡ୍ ପରିବର୍ତ୍ତନ କରିଥିଲେ। ସାଇଡ୍ ଚେଞ୍ଜ ହେବା ପରେ ୨୭ ବର୍ଷୀୟା ଋତୁଜା ଚମତ୍କାର ପ୍ରଦର୍ଶନ କରିଥିଲେ। ପ୍ରଥମ ଦୁଇ ସେଟ୍ ପରେ ମ୍ୟାଚ୍ ୧-୧ରେ ରହିଥିବା ବେଳେ ଅନ୍ତିମ ସେଟ୍ ଟାଇବ୍ରେକରରେ ଫଇସଲା ହୋଇଥିଲା। ଭାରତୀୟ ଯୋଡି ଏଥିରେ ୧୦-୪ରେ ବାଜି ମାରି ନେଇଥିଲେ। ଉଭୟ ନିଜର ଖେଳ ଶୈଳୀ ସହିତ ଅଭ୍ୟସ୍ତ । ତେଣୁ ପ୍ରଥମ ସେଟ୍ ହାରିବା ପରେ ସାଇଡ ବଦଳେଇବାକୁ ନିଷ୍ପତ୍ତି ନେଇଥିଲୁ, ଯାହା ଫଳପ୍ରଦ ହୋଇଥିଲା ବୋଲି ମ୍ୟାଚ ପରେ ପ୍ରତିକ୍ରିୟାରେ କହିଛନ୍ତି ରୋହନ ବୋପାନ୍ନା। ସମ୍ଭବତଃ ନିଜ କ୍ୟାରିୟରର ଅନ୍ତିମ ଏସିଆନ୍ ଗେମ୍ସ ଖେଳୁଥିବା ବୋପାନ୍ନା ବର୍ତ୍ତମାନ ଭାରତ ଓ ପାକିସ୍ତାନ ମଧ୍ୟରେ ଖେଳାଯିବାକୁ ଥିବା ହକି ମ୍ୟାଚ୍ ଦେଖିବେ ବୋଲି କହିଛନ୍ତି। ପୂର୍ବରୁ ମ୍ୟାଚ୍ ଦେଖିବା ପାଇଁ ଯୋଜନା କରିଥିଲେ ମଧ୍ୟ ଏହା ସମ୍ଭବ ହୋଇ ନ ଥିଲା। ଅନ୍ୟ ମ୍ୟାଚରେ ଭାରତକୁ ସମର୍ଥନ କରିବା ପାଇଁ ଏହା ଶ୍ରେଷ୍ଠ ମୁହୂର୍ତ୍ତ ବୋଲି ବୋପାନ୍ନା କହିଛନ୍ତି। ଅନ୍ୟପକ୍ଷରେ ପ୍ରଥମ ଏସିଆନ୍ ଗେମ୍ସ ପଦକ ହାସଲ କରିଥିବା ଋତୁଜା ପ୍ରଥମ ସେଟ୍ରେ ନର୍ଭସ ଥିବା ସ୍ବୀକାର କରିଛନ୍ତି। ପ୍ରଥମ ଥର ପାଇଁ ଏତେ ସଂଖ୍ୟକ ଦର୍ଶକଙ୍କ ସମ୍ମୁଖରେ ଖେଳୁଥିବାରୁ ମୁଁ ସାମାନ୍ୟ ନର୍ଭସ ରହିଥିଲି। ସର୍ଭିସ୍ରେ ସମସ୍ୟା ରହିଥିବା ବେଳେ ଦ୍ୱିତୀୟ ସେଟ୍ ବେଳକୁ ଏଥିରେ ସୁଧାର ଆଣିବାରେ ସମର୍ଥ ହୋଇଥିଲି ବୋଲି ଋତୁଜା କହିଛନ୍ତି। ତେବେ ଏସିଆନ୍ ଗେମ୍ସ ଟେନିସରେ ଭାରତୀୟ ଦଳର ଏହା ସବୁଠାରୁ ଖରାପ ପ୍ରଦର୍ଶନ। ୨୦୦୨ ଓ ୨୦୦୬ରେ ଭାରତୀୟ ଦଳ ୪ଟି ପଦକ ହାସଲ କରିଥିବା ବେଳେ ୨୦୧୦ ଓ ୨୦୧୪ରେ ୫ଟି ଲେଖାଏ ପଦକ ହାସଲ କରିଥିଲା। ୨୦୧୮ ଜାକାର୍ତ୍ତା ଇଭେଣ୍ଟରେ ଭାରତ ୩ ପଦକ ହାସଲ କରିଥିଲା। ସିଙ୍ଗଲ୍ସରେ ଭାରତୀୟ ଖେଳାଳିଙ୍କ ପଦକ ନୈରାଶ୍ୟଜନକ ରହିଥିବା ବେଳେ ପୁରୁଷ ଡବଲ୍ସରେ ପଦକ ଫେଭରିଟ୍ ରୋହନ ବୋପାନ୍ନା ଓ ୟୁକି ଭାମ୍ବ୍ରି ନିରାଶ କରିଥିଲେ।
