ପଟ୍ଟାଙ୍ଗି,୧୪।୯(ଶରତ ଧଳ): କାମଧନ୍ଦା ନ ପାଇ ରାଜ୍ୟ ବାହାରକୁ ଦାଦନ ଖଟିବାକୁ ଯାଉଥିବା ଶ୍ରମିକଙ୍କ ଦୁଃଖ ଥମିବାର ନାଁ ନେଉନାହିଁ। ଏଭଳି ଏକ କରୁଣ ଦୃଶ୍ୟ ଦେଖିବାକୁ ମିଳିଛି କୋରାପୁଟ ଜିଲା ପଟ୍ଟାଙ୍ଗି ବସଷ୍ଟାଣ୍ଡରେ ପହଞ୍ଚି ଥିବା ଦାଦନ ଶ୍ରମିକଙ୍କ କ୍ଷେତ୍ରରେ।
ମିଳିଥିବା ସୂଚନା ଅନୁଯାୟୀ ନବରଙ୍ଗପୁର ଜିଲା ଝରିଗାଁ ବ୍ଲକର ଭାଲୁ କନାଡି ଗ୍ରାମର ଜଗନ୍ନାଥ ଜାନି, ଦେବ ସିଙ୍ଗ ମାଝୀ, ପୁରୁଷୋତ୍ତମ ମାଝୀ, ନବ ଜାନି ଓ ସାଇଦର ସାନ୍ତା ପ୍ରମୁଖ ପଡୋଶୀ ଇଛାପୁର ଗ୍ରାମର ଭଇରା ନାମକ ଜଣେ ଯୁବକଙ୍କ ସହାୟତାରେ
ଆନ୍ଧ୍ରପ୍ରଦେଶ ରାଜ୍ୟର ବିଶାଖାପାଟଣାକୁ ଦାଦନ ଖଟିବାକୁ ଯାଇଥିଲେ। ସେଠାରେ ସେମାନେ ଏକ ଘରୋଇ କମ୍ପାନୀରେ ୩ମାସ ଧରି ଦିନକୁ ୩୦୦ ଟଙ୍କା ଲେଖାଏଁ ଶ୍ରମିକ ଭାବେ କାର୍ଯ୍ୟ କରିଥିଲେ।
ପରବର୍ତ୍ତୀ ସମୟରେ ଶ୍ରମିକମାନେ ଗାଁକୁ ଯିବା ପାଇଁ କମ୍ପାନୀ ମାଲିକଙ୍କୁ ଟଙ୍କା ମାଗିଥିଲେ। ହେଲେ କମ୍ପାନୀ ମାଲିକ ଟଙ୍କା ଦେବା ପରିବର୍ତ୍ତେ ଶ୍ରମିକମାନଙ୍କୁ ନିର୍ଯାତନା ଦେଉଥିବା ଅଭିଯୋଗ ହୋଇଛି। ନିର୍ଯାତନା ସହି ନ ପାରି ଶେଷରେ ୫ଜଣ ଶ୍ରମିକ ଗତ ମଙ୍ଗଳବାର ସନ୍ଦ୍ୟାରେ ବିଶାଖାପାଟଣାରୁ ବାହାରି ୧୬୦ କିଲୋମିଟର ଚାଲିଚାଲି ଗୁରୁବାର ସାଲୁର ଘାଟରେ ପହଞ୍ଚିଥିଲେ। ଏହି ସମୟରେ ପଟ୍ଟାଙ୍ଗି ଅଞ୍ଚଳର ଜଣେ ଗାଡ଼ି ଚାଳକ ସହଯୋଗର ହାତ ବଢାଇ ଶ୍ରମିକମାନଙ୍କୁ ଆଣି ପଟ୍ଟାଙ୍ଗି ବସ୍ଷ୍ଟାଣ୍ଡରେ ଛାଡିଥିଲେ।
ଖବର ପାଇ ଓଡ଼ିଶା ମୋଟର ଚାଳକ ସଂଘର ପଟ୍ଟାଙ୍ଗି ଶାଖା ସଭାପତି ଅର୍ଜୁନ ଖରା, ସାଧାରଣ ସମ୍ପାଦକ ଶରତ ଧଳ, ଉପସଭାପତି ଭଗବାନ ପଡାଲ ପ୍ରମୁଖ ପହଞ୍ଚି ଶ୍ରମିକମାନଙ୍କୁ ଭେଟି ଘଟଣା ସମ୍ପର୍କରେ ପଚାରି ବୁଝିଥିଲେ। ଏପରି କି ସଂଘ କର୍ମକର୍ତ୍ତା ଘଟଣା ସମ୍ପର୍କରେ ଜାଣି ଶ୍ରମିକମାନଙ୍କୁ କିଛି ଆର୍ଥିକ ସହାୟତା ଯୋଗାଇ ଦେବା ସହ ଖାଇବା ବ୍ୟବସ୍ଥା କରି ଗାଁରେ ଛାଡି ଥିଲେ।
