ନୂଆଦିଲ୍ଲୀ,୧୪।୨: ବ୍ୟାଙ୍କ ଅଫ୍ ମହାରାଷ୍ଟ୍ର (ବିଓଏମ୍) ପକ୍ଷରୁ ଚଳିତ ଆର୍ଥିକ ବର୍ଷର ୩ୟ ତ୍ରୈମାସିକ ଫଳାଫଳ ସମ୍ପର୍କରେ ଘୋଷଣା କରାଯାଇଛି। ଏପରିକି ୨୦୨୨-୨୩ ଆର୍ଥିକ ବର୍ଷର ୩ୟ ତ୍ରୈମାସ ଶେଷ ସୁଦ୍ଧା ବିଓଏମର ଅଭିବୃଦ୍ଧି ୧୩୯ % ହାରରେ ୭୭୫ କୋଟି ଟଙ୍କା ଲାଭ ହୋଇଥିବା ଜଣାପଡିଛି। ଅପରପକ୍ଷରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ କ୍ଷେତ୍ରରେ ୬୫% ଅଭିବୃଦ୍ଧି ଘଟି ୨୯,୧୭୫ କୋଟି ଟଙ୍କା ଲାଭ ହୋଇପାରିଛି। ଲାଭର ପ୍ରତିଶତ ଅନୁଯାୟୀ ବ୍ୟାଙ୍କ ଅଫ୍ ମହାରାଷ୍ଟ୍ର ଶ୍ରେଷ୍ଠ ପ୍ରଦର୍ଶନକାରୀ ବ୍ୟାଙ୍କ ରୂପେ ପରିଗଣିତ ହୋଇଛି। ବିଓଏମ୍ର ପୁଣେ ମୁଖ୍ୟ କାର୍ଯ୍ୟାଳୟର ସୂଚନା ଅନୁସାରେ ଏହି ଫଳାଫଳ ଘୋଷଣା କରାଯାଇଛି। ଏପରିକି ଚଳିତ ଆର୍ଥିକ ବର୍ଷର ୩ୟ ତ୍ରୈମାସ ଶେଷ ସୁଦ୍ଧା ସମସ୍ତ ୧୨ଟି ରାଷ୍ଟ୍ରାୟତ୍ତ ବ୍ୟାଙ୍କ ଏକତ୍ରିତ ଭାବେ ୬୫% ଅଭିବୃଦ୍ଧି ହାରରେ ୨୯,୧୭୫କୋଟି ଟଙ୍କା ଲାଭ କରିଛନ୍ତି। ଯାହା ପୂର୍ବବର୍ଷ ଏହି ସମୟରେ ୧୭,୭୨୯କୋଟି ଟଙ୍କା ଥିଲା। ଡିସେମ୍ବର ଶେଷ ସୁଦ୍ଧା ବ୍ୟାଙ୍କ ଅଫ୍ ମହାରାଷ୍ଟ୍ରର ପୁଞ୍ଜି ସ୍ବଚ୍ଛଳତା ହାର ୧୭.୫୩ % ରହିଥିବା ସହ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ମଧ୍ୟରେ ଏହା ସର୍ବାଧିକ ଅଟେ। ୨୦୨୨ଡିସେମ୍ବର ଶେଷ ସୁଦ୍ଧା ବ୍ୟାଙ୍କର ଗ୍ରସ୍ ଏନ୍ପିଏ ୨.୯୪% କୁ ହ୍ରାସ ପାଇଥିଲା ବେଳେ ନେଟ୍ ଏନ୍ପିଏ ହ୍ରାସ ପାଇ ୦.୪୭% ରେ ପହଞ୍ଚିଛି।
