ତିହିଡ଼ି,୧୨।୮ (କାଳନ୍ଦି ବେହେରା): ଭଦ୍ରକ ଜିଲାର ଅନ୍ନପାଳ ହାଟ ପୋଲ ନିକଟରେ ଗୋରୁ ବୋଝେଇ ଏକ ବୋଲେରୋ ଗାଡ଼ି ଜବତ ହୋଇଛି। ଗାଡ଼ିରୁ ୬ଟି ଗୋରୁଙ୍କୁ ଉଦ୍ଧାର କରାଯାଇଛି। ଘଟଣାକୁ ନେଇ ଅଞ୍ଚଳରେ ଚର୍ଚ୍ଚା ଜୋର ଧରିଥିବା ବେଳେ ଭଦ୍ରକ ଜିଲାରେ ଗୋରୁ ଚାଲାଣ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ସୂଚନା ଅନୁଯାୟୀ, ଏକ ବୋଲେରୋ ଗାଡ଼ିରେ ୬ଟି ଗୋରୁଙ୍କୁ ନେଇ ଯାଉଥିବା ବେଳେ ଭଦ୍ରକ ବଜରଙ୍ଗ ଦଳର କିଛି ସଦସ୍ୟ ଗାଡ଼ିଟିକୁ ଅଟକାଇବାକୁ ଚେଷ୍ଟା କରିଥିଲେ। ଚୁନିଦା ନିକଟରେ ଗାଡ଼ିକୁ ଅଟକାଇବା ଉଦ୍ଦେଶ୍ୟରେ ଟାୟାର ଲିକ୍ କରିବା ପାଇଁ ପିରିକି ଲଗା ପ୍ଲେଟ୍ ରାସ୍ତାରେ ପକାଯାଇଥିବା ଜଣାପଡ଼ିଛି। ଏଥିରେ ବୋଲେରୋର ୪ଟି ଟାୟାର ଲିକ୍ ହୋଇଥିଲେ ମଧ୍ୟ ଚାଳକ ଗାଡ଼ିଟିକୁ ଚଳାଇ ଆସୁଥିଲେ।
ପରେ ଅନ୍ନପାଳ ହାଟ ପୋଲ ନିକଟରେ ଗାଡ଼ିର ଟାୟାର ବାହାରିଯିବାରୁ ବୋଲେରୋଟି ଭାରସାମ୍ୟ ହରାଇ ଅଟକି ଯାଇଥିଲା। ଏହାର ସୁଯୋଗ ନେଇ ଗାଡ଼ିର ଚାଳକ ଓ ହେଲ୍ପର ଘଟଣାସ୍ଥଳରୁ ଦୌଡ଼ି ପଳାଇଥିବା ଜଣାପଡ଼ିଛି।
ଗାଡ଼ି ଭିତରୁ ୬ଟି ଗୋରୁଙ୍କୁ ଉଦ୍ଧାର କରାଯାଇଥିଲା। ଦୀର୍ଘ ସମୟ ଧରି ଗାଡ଼ି ଭିତରେ ରହିଥିବାରୁ ଗୋରୁଗୁଡ଼ିକ ଅତ୍ୟନ୍ତ ଦୁର୍ବଳ ଓ ଦୟନୀୟ ଅବସ୍ଥାରେ ଥିବା ଦେଖାଯାଇଥିଲା।
ଖବର ପାଇ ଗୁଜିଦରଡ଼ା ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ବୋଲେରୋଟିକୁ ଜବତ କରିବା ସହ ତଦନ୍ତ ଆରମ୍ଭ କରିଛନ୍ତି। ଗୋରୁଗୁଡ଼ିକ କେଉଁଠାରୁ ଆସିଥିଲେ, କେଉଁଠାକୁ ନିଆଯାଉଥିଲା ଏବଂ ଏହି ଚାଲାଣ ପଛରେ କିଏମାନେ ଅଛନ୍ତି, ସେନେଇ ପୋଲିସ ତଦନ୍ତ ଜାରି ରଖିଛି।
ଭଦ୍ରକ ଜିଲାର ବିଭିନ୍ନ ଅଞ୍ଚଳରେ ଗୋରୁ ଚାଲାଣ ନେଇ ସମୟେ ସମୟେ ଅଭିଯୋଗ ଓ ଘଟଣା ସାମ୍ନାକୁ ଆସୁଥିବାରୁ ଏହାକୁ ନେଇ ସାଧାରଣରେ ଚିନ୍ତା ବଢ଼ିଛି। ଏଭଳି ଘଟଣା ଉପରେ ପୋଲିସ ଓ ପ୍ରଶାସନ ପକ୍ଷରୁ କଡ଼ା ପଦକ୍ଷେପ ନିଆଯାଇ ଗୋରୁ ଚାଲାଣ ରୋକିବାକୁ ଦାବି ହୋଇଛି।
