ବଲାଙ୍ଗୀର ଅଫିସ/ଗୁଡଭେଲା, ୪ା୧୨(ଡି.ଏନ.ଏ.)-ବଲାଙ୍ଗୀର ଜିଲା ତୁଷୁରା-ଦେଉଳଗୁଡି ମୁଖ୍ୟରାସ୍ତାର ଜମ୍ଭେଲ ଛକ ନିକଟରେ ଶୁକ୍ରବାର ଅପରାହ୍ନ ସାଢ଼େ ୨ଟାରେ ଏକ ବୋଲେରୋ ଗାଡ଼ି ସାମ୍ନାପଟରୁ ଆସୁଥିବା ଏକ ବାଇକ୍କୁ ଧକ୍କା ଦେଇଛି। ବାଇକ୍ ସମ୍ପୂର୍ଣ୍ଣ ଜଳିଯିବା ସହ ଏହି ମର୍ମନ୍ତୁତ ଦୁର୍ଘଟଣାରେ ଗୋଟିଏ ପରିବାରର ସ୍ବାମୀ-ସ୍ତ୍ରୀ-ପୁଅ ୩ ଜଣଙ୍କ ମୃତ୍ୟୁ ଘଟିଛି। ଦୁର୍ଘଟଣାରେ ୮ ମାସର ଶିଶୁପୁତ୍ର ଗୁରୁତର ଆହତ ହୋଇ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି। ଦୁର୍ଘଟଣା ପରେ ସେଠାରେ ଉତ୍ତେଜନା ପ୍ରକାଶ ପାଇବା ସହ ଉତ୍ତ୍ୟକ୍ତ ଲୋକେ ରାସ୍ତାରୋକୋ କରିଛନ୍ତି। ସ୍ଥାନୀୟ ତହସିଲଦାର, ସଦର ଏସଡିପିଓ, ଉପଜିଲାପାଳ ରାସ୍ତାରୋକୋ ସ୍ଥଳରେ ପହଞ୍ଚତ୍ ଆନ୍ଦୋଳନକାରୀଙ୍କ ସହ ଆଲୋଚନା କରୁଛନ୍ତି। ମୃତ ୩ ଜଣ ଓ ଗୁରୁତର ଶିଶୁପୁତ୍ର କଳାହାଣ୍ଡି ଜିଲା ରିଷିଡା ଗ୍ରାମର ବୋଲି ଜଣାପଡିଛି। ମୃତକମାନେ ହେଲେ ତରଣୀସେନ ବିଶି (୩୫), ସ୍ତ୍ରୀ ମୁକ୍ତା ବିଶି (୨୮) ଓ ପୁତ୍ର ଶମ୍ଭୁ (୩) । ତୁଷରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କୋଭିଡ-୧୯ କାର୍ଯ୍ୟକ୍ରମରେ ନିୟୋଜିତ ଥିବା ବୋଲେରୋ (ନଂ. ଓଡି୧୭ସି ୬୭୬୭) ଗାଡି ମାନପୁର ଅଞ୍ଚଳରୁ କୋଭିଡ ପରୀକ୍ଷା ସାରି ଫେରୁଥିବାବେଳେ ତୁଷରା ପଟରୁ ରିଷିଡା ଫେରୁଥିବା ତରଣୀସେନ୍ଙ୍କ ବାଇକ୍କୁ ମୁହଁାମୁହିଁ ଧକ୍କା ଦେଇଥିଲା । ଧକ୍କ୍ା ଏତେ ଶକ୍ତିଶାଳୀ ଥିଲା ଯେ ବାଇକ୍ରେ ନିଅଁା ଲାଗି ସମ୍ପୂର୍ଣ୍ଣ ଜଳିଯାଇଥିଲା । ଧକ୍କା ପରେ ରାସ୍ତା ଉପରେ ଛିଟିକି ପଡିଥିବା ତରଣୀସେନ୍ ଓ ତାଙ୍କ ପୁଅ ଶମ୍ଭୁଙ୍କ ଘଟଣାସ୍ଥଳରେ ମୃତ୍ୟୁ ହୋଇଯିବା ସହ ଗୁରୁତର ଆହତ ମୁକ୍ତା ଓ ୮ ମାସର ଶିଶୁପୁତ୍ର ଓମ୍ଙ୍କୁ ସେଠାରୁ ସ୍ଥାନୀୟ ଲୋକେ ଉଦ୍ଧାର କରି ପ୍ରଥମେ ତୁଷରା ମେଡିକାଲ ହସ୍ପିଟାଲକୁ ଆଣିଥିଲେ। ସେମାନଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିବାରୁ ସେଠାରୁ ଉଭୟଙ୍କୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲକୁ ସ୍ଥାନାନ୍ତରଣ କରାଯାଇଥିଲା। ବାଟରେ ମୁକ୍ତାଙ୍କ ମୃତ୍ୟୁ ହୋଇଯାଇଥିଲା। ଦୁର୍ଘଟଣା ଘଟାଇବା ପରେ ବୋଲେରୋ ଗାଡିର ଡ୍ରାଇଭର ଓ ଅନ୍ୟ କର୍ମଚାରୀ ଫେରାର ହୋଇଯାଇଥିଲେ। ଦୁର୍ଘଟଣା ଖବର ପ୍ରଚାରିତ ହେବା ପରେ ସେଠାରେ ଉତ୍ତେଜନା ପ୍ରକାଶ ପାଇଥିଲା । ମୃତକଙ୍କ ପରିବାର ଲୋକ, ସମ୍ପର୍କୀୟ ଏବଂ ତୁଷରା ୟୁଥ ଆକ୍ସନ କମିଟି ପକ୍ଷରୁ ଶ୍ରୀକାନ୍ତ ବାଗ, କାହ୍ନା ପ୍ରଧାନ, ଅଜୟ ଜୟଶ୍ୱାଳ, ବିଶ୍ୱଜିତ ପାତ୍ର, ଦୀପକ ସାହୁ, ଗାମା ମାଝିଙ୍କ ସହ ବହୁ ଲୋକ ତୁଷୁରା ଚିକିତ୍ସାଳୟଠାରେ ଅପରାହ୍ନ ୫ଟାରୁ ରାସ୍ତାରୋକୋ କରିଥିଲେ। ତୁଷୁରା ତହସିଲଦାର ଚନ୍ଦ୍ରମଣି ନାଗ, ବଲାଙ୍ଗୀର ଏସଡିପିଓ ଶ୍ରୀମନ୍ତ ବାରିକ ରାସ୍ତାରୋକୋ ସ୍ଥଳକୁ ଆସି ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ ।
