ଖଜୁରିପଡ଼ା,୨୩।୮(ବିଦୁର ବେହେରା): ବର୍ଷକୁ ବାର ମାସରେ ପ୍ରକୃତିଠାରୁ ବିଭିନ୍ନ ପ୍ରକାର ଖାଦ୍ୟ ପଦାର୍ଥ ପାଉ। ବର୍ଷା ଋତୁରେ ବିଭିନ୍ନ ପ୍ରକାରର ଛତୁ ବଣ ଜଙ୍ଗଲରୁ ମିଳେ। ସାରାବିଶ୍ୱରେ ପ୍ରାୟ ୪୦୦ପ୍ରକାର ଛତୁ ଦେଖାଯାଏ। ତନ୍ମଧ୍ୟରୁ ଅନ୍ୟୁନ ୨୦୦ପ୍ରଜାତିର ଛତୁ ଅଧୁନା ଅବଲୁପ୍ତ ପ୍ରାୟ। ଛତୁ ମଧ୍ୟରେ, ପୁଟୁ କୁଲି ଛତୁ,ବାଲି ଛତୁ, ଶ୍ରାବଣ କଢ଼ ଛତୁ, ନାଡ ଛତୁ, ହୁଙ୍କା ଛତୁ, ପାଳ ଛତୁ, ଖୁଦ ଛତୁ ବେଶ ଆଦର ରହିଛି। ବର୍ଷା ହେଲେ ଗ୍ରାମର ଲୋକମାନେ ସକାଳୁ ପଡ଼ିଆ, ବଣ, ଜଙ୍ଗଲ ଓ ବିଲ ମାଳ ଅଞ୍ଚଳରେ ଛତୁ ସଂଗ୍ରହ କରନ୍ତି। ତାପରେ ବଜାରରେ ବିକ୍ରି କରି ଦୁଇ ପଇସା ରୋଜଗାର କରନ୍ତି। ଜଳ ବାୟୁ ପରିବର୍ତ୍ତନ ସହିତ ରାସାୟନିକ ସାର ବ୍ୟବହାର ଯୋଗୁ ଅଧିକାଂଶ ଛତୁ ଏବେ ଦେଖିବାକୁ ମିଳୁନାହିଁ। ତେଣୁ ଛତୁ ଚଢା ଦରରେ ବିକ୍ରି ହୁଏ। ମଟନ ଦର ସହ ସମାନ କନ୍ଧମାଳର ଫୁଟୁକୁଲି ଛତୁ ଏବଂ ଶ୍ରାବଣ କଢ଼ ଛତୁ। ବଜାରରେ ଏକ କିଲୋ ମାଟିଛତୁର ଦର ୬୦୦ରୁ ୬୫୦ ଟଙ୍କା ରହିଥିବା ବେଳେ ଶ୍ରାବଣ କଢ଼ ଛତୁ ୧୦୦୦ ରୁ ୧୨୦୦ ଟଙ୍କା ରହିଛି। ଖଜୁରିପଡ଼ା ବ୍ଲକର ସୁଡ୍ରୁକୁମ୍ପା, ସୁଡ୍ରେଜୁ, ବିଲାବାଡ଼ି, କାକେନ୍ଦ୍ରି, ଅଞ୍ଚଳରୁ ଏବଂ ଫିରିଙ୍ଗିଆ ବ୍ଲକର ଫିରିଙ୍ଗିଆ ବାଲନ୍ଦପଡ଼ା ଓ ଗୋଛପଡ଼ା,ଲୁଇସିଂ, ଫୁଲବାଣୀ ବ୍ଲକ୍ର କଳା ବାଘ ଜାମୁଝରି ଆଦି ପାହାଡ଼ିଆ ଅଞ୍ଚଳରେ ବିଭିନ୍ନ କିସମର ଛତୁ ମିଳିଥାଏ। ସେଥି ମଧ୍ୟରୁ ଶ୍ରାବଣ କଢ଼, ବାଲି ଛତୁ ଓ ବାଟିଛତୁ ବା ଫୁଟୁକୁଲି ଛତୁ ଭଳି ଅନେକ ଦେଶୀଛତୁ ଦେଖିବାକୁ ମିଳେ। ଏହିସବୁ ପ୍ରାକୃତିକ ପରିବେଶରେ ହିଁ ଫୁଟିଥାଏ। ତେବେ କନ୍ଧମାଳରେ ଏବେ ପାଗ ଅନୁକୂଳ ରହିଥିବାରୁ ଗତ କିଛି ଦିନ ହେବ ବଜାରକୁ ଆସୁଛି ବାଟି ଛତୁ ଏବଂ ଶ୍ରାବଣ କଢ଼ ଛତୁ। ମାଟି ଛତୁର ଅନ୍ୟନାମ ଫୁଟୁକୁଲି ଛତୁ। ମାଟି ସାଲୁବାଲୁ ହୋଇଥିବା ଏହି ଗୋଲ୍ ଗୋଲ୍ ଛତୁକୁ ପଶ୍ଚିମ ଓଡିଶାରେ ରୁଗୁଡ଼ି ଛତୁ କୁହାଯାଉଥିବା ବେଳେ ମଧ୍ୟଓଡ଼ିଶାରେ ଏହାକୁ ରୁଟକା ଛତୁ କୁହାଯାଏ। ଶ୍ରାବଣରେ ମିଳୁଥିବା ଏହି ସ୍ବାଦିଷ୍ଟ ଛତୁର ବହୁ ଆଦର ରହିଛି। ଗାଁ ଗାଁ ବୁଲି ୩ ରୁ ୪ କିଲୋ ଛତୁ ସଂଗ୍ରହ କରି ବଜାରରେ ବିକ୍ରି କରନ୍ତି ବୋଲି ବ୍ୟବସାୟୀ ରଞ୍ଜିତ ଖଟୁଆରୀ ଏବଂ ରଞ୍ଜନ ଦିଗାଲ କହିଛନ୍ତି। ପୁଟୁ କୁଲି ଛତୁ ଶାଳଗଛ ମୂଳର ଚାରିକଡ଼ରୁ ହିଁ ମିଳିଥାଏ। ସେହିପରି ବର୍ଷା ହେଲେ ଶ୍ରାବଣ କଢ଼ ଛତୁ ଫୁଟେ। କେବଳ ଆଷାଢ଼ ଓ ଶ୍ରାବଣ ଭାଦ୍ରବ ମାସରେ ଛତୁ ମିଳୁଥିବାରୁ ଚଢା ଦରରେ ବିକ୍ରି ହେଲେ ସୁଧା ଗ୍ରାହକମାନେ ଏହାକୁ କିଣି ନେଉଛନ୍ତି।
