ଗୋପାଳପୁର,୧୭।୧(ନବୀନ ରାଜ ଆଚାରୀ): ଗତ ୧୪ ତାରିଖରୁ ନିଖୋଜ ଥିଲେ ଯୁବକ। ଶୁକ୍ରବାର ନାଳରେ ଭାସୁଥିବା ଅବସ୍ଥାରେ ଠାବ ହୋଇଛି ମୃତଦେହ। ମୃତକ ହେଲେ ଗଞ୍ଜାମ ଜିଲା ଗୋଳନ୍ଥରା ଥାନା ଅଧିନସ୍ଥ ପାଟପୁର ଗ୍ରାମର ଶାନ୍ତନୁ ନାୟକ (୨୩)। ଏ ନେଇ ଗୋଳନ୍ଥରା ଥାନା ପୋଲିସ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ନେଇ ଥାନା ଅଧିକାରୀ ବିବେକାନନ୍ଦ ସ୍ବାଇଁ ସୂଚନା ଦେଇଛନ୍ତି ।
ସୂଚନା ଅନୁସାରେ, ଗୋଳନ୍ଥରା ଥାନା ଅଧୀନସ୍ଥ ପାଟପୁର ଗ୍ରାମର ଶାନ୍ତନୁ ଗତ ୧୪ ତାରିଖ ଦିନ ସାରେ ତାଙ୍କ ସାଙ୍ଗଙ୍କୁ ଛାଡିବା ପାଇଁ ବାଇକ ଯୋଗେ ବ୍ରହ୍ମପୁର ନୂଆ ବସଷ୍ଟାଣ୍ଡ ଯାଇଥିଲେl କୌଣସିି କଥାକୁ ନେଇ ଉଭୟଙ୍କ ମଧ୍ୟ୍ୟରେ ବଚସା ହୋଇଥିଲା l ରାତିରେ ଶାନ୍ତନୁଙ୍କ ଭଉଣୀ ତାଙ୍କ ସହ ଫୋନ୍ରେ କଥା ହେବା ସହ ଘରକୁ ଶୀଘ୍ର ଆସିବା ପାଇଁ କହିଥିଲେ। ହେଲେ ସେ ଆଉ ଘରକୁ ଫେରି ନ ଥିଲେ । ପରିବାରଲୋକେ ଆଖପାଖ ଅଞ୍ଚଳରେ ବହୁ ଖୋଜାଖୋଜି କରିବା ପରେ ମଧ୍ୟ ଶାନ୍ତନୁଙ୍କ କୌଣସି ଖୋଜଖବର ମିଳି ନଥିଲା। ଶେଷରେ ପରିବାର ପକ୍ଷରୁ ଗୁରୁବାର ଗୋଳନ୍ଥରା ଥାନାରେ ଶାନ୍ତନୁଙ୍କ ନିଖୋଜ ନେଇ ଏକ ଲିଖିତ ଅଭିଯୋଗ କରାଯାଇଥିଲା। ଏ ନେଇ ପୋଲିସ ୫/୨୫ ପ୍ରକାରେ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଶୁକ୍ରବାର ସକାଳେ ଜଣେ ଯୁବକଙ୍କ ମୃତ ଦେହ ଜାତୀୟ ରାଜପଥ କଡ ସାପୁଆ ନାଳରେ ଭାସୁଥିବା ଦେଖି ଲୋକମାନେ ପୋଲିସକୁ ଖବର ଦେଇଥିଲେ। ଗୋଶାଣୀନୂଆଗାଁ ଓ ଗୋଳନ୍ଥରା ଥାନା ପୋଲିସ ଘଟଣା ସ୍ଥଳରେ ପହଞ୍ଚିଥିଲେ । ନାଳରୁ ମୃତଦେହକୁ ବାହାର କରି ଶାନ୍ତନୁଙ୍କ ପରିବାରକୁ ଅବଗତ କରାଇଥିଲେ। ସାଇଣ୍ଟିଫିକ ଟିମ୍ ଘଟଣା ସ୍ଥଳରେ ପହଂଚି ପାଣି ଓ ଅନ୍ୟ ନମୁନା ସଂଗ୍ରହ କରିଥିଲା। ଶାନ୍ତନୁଙ୍କ ବାପା ମୁରଲୀ ନାୟକ ମୃତଦେହ ଚିହ୍ନଟ କରିବା ସହ ତାଙ୍କ ପୁଅଙ୍କୁ ହତ୍ୟା କରିଥିବା ନେଇ ଗୋଳନ୍ଥରା ଥାନାରେ ଅଭିଯୋଗ କରିଥିଲେ । ଥାନାରେ ମାମଲା ନଂ ୩୬/୨୫ ପ୍ରକାରେ ହତ୍ୟା ମାମଲା ରୁଜୁ କରି ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ମେଡିକାଲକୁ ପଠାଇଥିଲେ । ତେବେ ଶାନ୍ତନୁ ନିଖୋଜ ଥିବା ବେଳେ ଏଭଳି ଭାବେ ତାଙ୍କ ମୃତଦେହ ମିଳିବା ନେଇ ସନ୍ଦେହ ପ୍ରକଟ ହୋଇଛି। ଏ ନେଇ ଗୋଳନ୍ଥରା ଥାନା ଅଧିକାରୀ ବିବେକାନନ୍ଦ ସ୍ବାଇଁକୁ ପଚାରିବାରୁ ହତ୍ୟା ମାମଲା ରୁଜୁ କରି ତଦନ୍ତ ଚାଲିଛି ବ୍ୟବଚ୍ଛେଦ ରିପୋର୍ଟ ଆସିଲେ କାରଣ ସ୍ପଷ୍ଟ ହେବ ବୋଲି କହିଛନ୍ତି।
