ଅହମ୍ମଦାବାଦ,୧୨।୬: ଗୁଜରାଟର ଅହମ୍ମଦାବାଦରେ ଏକ ଏୟାର ଇଣ୍ଡିଆ ବିମାନ ଦୁର୍ଘଟଣାଗ୍ରସ୍ତ ହୋଇଛି। ବିମାନରେ ୨୪୨ ଜଣ ଯାତ୍ରୀ ଥିଲେ। ଏୟାର ଇଣ୍ଡିଆ ବିମାନ AI-171 ଅହମ୍ମଦାବାଦରୁ ଲଣ୍ଡନ ଅଭିମୁଖେ ଯାତ୍ରା କରିବାକୁ ଯାଉଥିଲା। ସମସ୍ତ ୨୪୨ ଜଣ ଯାତ୍ରୀ ଚଢ଼ି ସାରିଥିଲେ ଏବଂ ବିମାନଟି ରନୱେରେ ଉଡ଼ାଣ ପାଇଁ ପ୍ରସ୍ତୁତ ଥିଲା। ବିମାନଟି ୧:୧୦ ଅପରାହ୍ନରେ ବୋର୍ଡିଂ ଶେଷ କରିଥିଲା ଏବଂ ୧:୧୭ ଅପରାହ୍ନରେ ବିମାନ ଅହମ୍ମଦାବାଦ ବିମାନବନ୍ଦରରୁ ଉଡ଼ାଣ ଆରମ୍ଭ କଲା। ପ୍ରଥମ କିଛି ମିନିଟ ପାଇଁ ଉଡ଼ାଣ ସ୍ବାଭାବିକ ଥିଲା।
ବିମାନରେ ମୋଟ ୨୪୨ ଜଣ ଯାତ୍ରା କରୁଥିଲେ, ଯେଉଁଥିରେ ୨୩୦ ଜଣ ବୟସ୍କ, ୨ ଜଣ ଶିଶୁ ଏବଂ ୧୨ ଜଣ କ୍ରୁ ସଦସ୍ୟ (୧୦ ଜଣ କ୍ୟାବିନ କ୍ରୁ ଏବଂ ୨ ଜଣ ପାଇଲଟ) ଥିଲେ। ଦୁର୍ଘଟଣା ସମୟରେ ବିମାନର କମାଣ୍ଡ ପାଇଲଟ-ଇନ-କମାଣ୍ଡର୍ ସୁମିତ ସବରୱାଲ ଏବଂ ସହ-ପାଇଲଟ କ୍ଲାଇଭ କୁଣ୍ଡଙ୍କ ହାତରେ ଥିଲା। ଦୁର୍ଘଟଣା ପରେ ତୁରନ୍ତ ବିମାନବନ୍ଦର ଜରୁରୀକାଳୀନ ଦଳକୁ ସକ୍ରିୟ କରାଯାଇଥିଲା। ଘଟଣାସ୍ଥଳରୁ ଘନ ଧୂଆଁର ମେଘ ଦେଖାଯାଉଥିଲା। ମେଘାନୀନଗରରେ ଅନେକ କୋଠା କ୍ଷତିଗ୍ରସ୍ତ ହୋଇଛି। ରିଲିଫ ଏବଂ ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି।
କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲଙ୍କ ସହ କଥା ହୋଇଛନ୍ତି। ସେ ତାଙ୍କଠାରୁ ଏୟାର ଇଣ୍ଡିଆ ବିମାନ ଦୁର୍ଘଟଣା ସମ୍ପର୍କରେ ସୂଚନା ନେଇଛନ୍ତି। କେନ୍ଦ୍ର ସରକାର ସମସ୍ତ ପ୍ରକାରର ସାହାଯ୍ୟ ପ୍ରତିଶ୍ରୁତି ଦେଇଛନ୍ତି।
ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀ ମଧ୍ୟ ଏହି ବିମାନରେ ଥିଲେ। ବିଜୟ ରୂପାନୀ ଲଣ୍ଡନ ଯାଉଥିଲେ। ସେ ତାଙ୍କ ପରିବାରକୁ ଭେଟିବାକୁ ଲଣ୍ଡନ ଯାଉଥିଲେ। ତାଙ୍କ ସ୍ତ୍ରୀ ଏବଂ ଝିଅ ସମେତ ଅନେକ ସମ୍ପର୍କୀୟ ଲଣ୍ଡନରେ ରୁହନ୍ତି, ଯେଉଁମାନଙ୍କୁ ସେ ଭେଟିବାକୁ ଯାଉଥିଲେ।
