ଭୁବନେଶ୍ୱର,(ବ୍ୟୁରୋ)୨୩ା୮:ହୋଲ୍ଡିଂ ଟ୍ୟାକ୍ସ ପରିମାଣ କମାଇବା ପାଇଁ ୧୫ ହଜାର ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ହାତରେ ଧରାପଡିଛନ୍ତି ଭୁବନେଶ୍ୱର ମହାନଗର ନିଗମ (ବିଏମସି)ର ଟ୍ୟାକ୍ସ କଲେକ୍ଟର ହେମନ୍ତ କୁମାର ସାହୁ ଓ ସହଯୋଗୀ ତଥା ଅବସରପ୍ରାପ୍ତ କର୍ମଚାରୀ ଯୋଗେନ୍ଦ୍ର ପ୍ରଧାନ। ସେମାନଙ୍କଠାରୁ ଲାଞ୍ଚ ଟଙ୍କା ଜବତ କରାଯାଇଛି। ଏନେଇ ଭୁବନେଶ୍ୱର ଭିଜିଲାନ୍ସ ଥାନାରେ ଏକ ମାମଲା (ନଂ.୨୬) ରୁଜୁ କରାଯାଇ ଅଭିଯୁକ୍ତଦ୍ୱୟଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି।
ଭିଜିଲାନ୍ସର ସୂଚନାନୁସାରେ, ଘାଟିକିଆ ଅଞ୍ଚଳର ସଞ୍ଜୟ କୁମାର ସାହୁ ହୋଲ୍ଡିଂ ଟ୍ୟାକ୍ସ କମାଇବାକୁ ଟ୍ୟାକ୍ସ କଲେକ୍ଟର ହେମନ୍ତ କୁମାର ସାହୁଙ୍କୁ କହିଥିଲେ। ଏଥିପାଇଁ ହେମନ୍ତ ୧୫ ହଜାର ଟଙ୍କା ଦାବି କରିଥିଲେ। ଏନେଇ ସଞ୍ଜୟ ଭୁବନେଶ୍ୱର ଭିଜିଲାନ୍ସକୁ ଜଣାଇବା ପରେ ଚଢ଼ାଉ ପାଇଁ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଯୋଜନା ମୁତାବକ ଖଣ୍ଡଗିରି ବାରି କମ୍ୟୁନିଟି ସେଣ୍ଟରସ୍ଥିତ ଓ୍ବାର୍ଡ ଅଫିସ୍-୨୩ରେ ସଞ୍ଜୟ ପହଞ୍ଚତ୍ କେମିକାଲ ବୋଳା ହୋଇଥିବା ୧୫ହଜାର ଟଙ୍କା ଟ୍ୟାକ୍ସ କଲେକ୍ଟର ହେମନ୍ତଙ୍କୁ ଦେଇଥିଲେ। ଏହାପରେ ହେମନ୍ତ ସାଢ଼େ ୭ହଜାର ଟଙ୍କା ନିଜ ପାଖରେ ରଖି ଅବଶିଷ୍ଟ ସାଢ଼େ ୭ହଜାର ସହଯୋଗୀ ଯୋଗେନ୍ଦ୍ରଙ୍କୁ ଦେଇଥିଲେ। ଏହି ସମୟରେ ଭିଜିଲାନ୍ସ ଟିମ୍ ଚଢ଼ାଉ କରି ଯାଞ୍ଚ କରିବାରୁ ସେମାନଙ୍କ ପକେଟରୁ ଟଙ୍କା ମିଳିଥିଲା। ଉଭୟଙ୍କ ହାତ ଓ ପକେଟ ଧୁଆଯିବା ପରେ କେମିକାଲ ବାହାରିଥିଲା। ଏହାପରେ ସମସ୍ତ ଟଙ୍କା ଜବତ କରାଯିବା ସହ ଅଭିଯୁକ୍ତ ହେମନ୍ତ ଓ ଯୋଗେନ୍ଦ୍ରଙ୍କୁ ଭିଜିଲାନ୍ସ ଗିରଫ କରିଥିଲା।
