ଭୁବନେଶ୍ୱର, ୮।୨ (ବ୍ୟୁରୋ): ୨୦୨୩-୨୪ ଆର୍ଥିକ ବର୍ଷ ପାଇଁ ଚିଠା ବଜେଟ ପ୍ରସ୍ତୁତ କରିଛି ବିଏମ୍ସି। ଗତ କର୍ପୋରେଶନ ବୈଠକରେ ୬୯୦ କୋଟିର ଚିଠା ବଜେଟ ପ୍ରସ୍ତାବ ଆଗତ କରିବା ପରେ ମଙ୍ଗଳବାର ଏନେଇ ବିସ୍ତୃତ ଆଲୋଚନା କରାଯାଇଛି। ବିଏମ୍ସି କାର୍ଯ୍ୟାଳୟରେ ସମସ୍ତ ଷ୍ଟାଣ୍ଡିଂ କମିଟି ଏବଂ ବିଭିନ୍ନ ବିଭାଗର ଅଧିକାରୀଙ୍କୁ ନେଇ ଏହି ସ୍ବତନ୍ତ୍ର ବୈଠକ ଅନୁଷ୍ଠିତ ହୋଇଥିଲା। ଏଥିରେ କେଉଁ ବିଭାଗରେ କେତେ ଟଙ୍କା ଖର୍ଚ୍ଚ ହେବ, ସେ ନେଇ ପ୍ରସ୍ତାବ ଦିଆଯିବା ସହ ଆସନ୍ତା କର୍ପୋରେଶନ ବୈଠକରେ ବଜେଟ ପାସ୍ କରାଯିବ ବୋଲି ସୂଚନା ଦିଆଯାଇଛି। ଅପରପକ୍ଷେ ଚିଠା ବଜେଟ ସହିତ ରାଜସ୍ବ ଆଦାୟ ନେଇ ମଧ୍ୟ ଆଲୋଚନା କରାଯାଇଥିଲା। ୨୦୨୨-୨୩ ଆର୍ଥତ୍କ ବର୍ଷରେ ମୋଟ୍ ୨୭୭.୭୪କୋଟି ଟଙ୍କାର ରାଜସ୍ବ ଆଦାୟ ଲକ୍ଷ୍ୟ ରହିଥିବା ବେଳେ ଏହାର ଅଧା ମଧ୍ୟ ଆଦାୟ କରିବାରେ ସଫଳ ହୋଇପାରିନାହିଁ। ଜାନୁୟାରୀ ଶେଷ ସୁଦ୍ଧା ମାତ୍ର ୭୮.୬୧ କୋଟି ଟଙ୍କା ରାଜସ୍ବ ଆଦାୟ ହୋଇଛି। ଫଳରେ ଲକ୍ଷ୍ୟ ହାସଲର ବହୁ ଦୂରରେ ରହିଛି ବିଏମ୍ସି। ତେବେ ଗତ ଆର୍ଥିକ ବର୍ଷ ଅପେକ୍ଷା ଏଥର ଅଧିକ ରାଜସ୍ବ ଆଦାୟ ହୋଇଥିବାରୁ ଏତିକିରେ ବିଏମ୍ସିକୁ ସନ୍ତୁଷ୍ଟ ହେବାକୁ ପଡିଛି। ଅପରପକ୍ଷେ ବିଏମ୍ସି ଅଧୀନରେ ମୋଟ୍ ୬୭ଟି ଓ୍ବାର୍ଡ ଥିବାବେଳେ ମାତ୍ର ୪୧ଜଣ ଓ୍ବାର୍ଡ ଅଫିସର ଅଛନ୍ତି। ଫଳରେ ସମସ୍ତ ଓ୍ବାର୍ଡରେ ଓ୍ବାର୍ଡ ଅଫିସର ନଥିବାରୁ ରାଜସ୍ବ ଆଦାୟ ଲକ୍ଷ୍ୟ ପୂରଣ ହୋଇପାରୁନାହିଁ। ତେଣୁ ସବୁ ଓ୍ବାର୍ଡରେ ଓ୍ବାର୍ଡ ଅଫିସର ନିୟୋଜିତ କରିବା କିମ୍ବା ରାଜସ୍ବ ଆଦାୟ ପାଇଁ ଆଉଟ୍ସୋର୍ସିଂ କର୍ମଚାରୀଙ୍କୁ ନିୟୋଜିତ କରିବାକୁ ବିଏମ୍ସି ଫାଇନାନ୍ସ ଷ୍ଟାଣ୍ଡିଂ କମିଟି ପକ୍ଷରୁ ପ୍ରସ୍ତାବ ଦିଆଯାଇଛି। ସେହିପରି ସମସ୍ତ ଓ୍ବାର୍ଡ ଅଫିସରଙ୍କୁ ଟାର୍ଗେଟ ଦିଆଯିବା ସହ ଟିକସ ଖିଲାପକାରୀଙ୍କ ତାଲିକା ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଖିଲାପକାରୀଙ୍କୁ ରେଡ୍ ନୋଟିସ ଜାରି କରିବା ସହିତ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦିଆଯାଇଛି। ରାଜସ୍ବ ସଂଗ୍ରହ ଏବଂ ବୃଦ୍ଧିରେ ସହାୟକ ହେବା ଭଳି ନୂତନ ପ୍ରକଳ୍ପ ନିର୍ମାଣ ନେଇ ବିଏମ୍ସି ଯୋଜନା ରଖିଛି ବୋଲି ମେୟର ସୁଲୋଚନା ଦାସ କହିଛନ୍ତି। ଏଥିସହ ନିର୍ଦ୍ଧାରିତ ସମୟ ମଧ୍ୟରେ ଧାର୍ଯ୍ୟ ଲକ୍ଷ୍ୟ ପୂରଣ ହେବ ବୋଲି ସୂଚନା ଦେଇଛନ୍ତି। ଅପରପକ୍ଷେ ହାତରେ ଆଉ ମାତ୍ର ୧ମାସ ସମୟ ଥିବାବେଳେ ଏହା ଭିତରେ କିପରି ଅଧିକରୁ ଅଧିକ ରାଜସ୍ବ ଆଦାୟ କରାଯାଇପାରିବ ସେ ନେଇ ବିଏମ୍ସି ଅଧିକାରୀ ତତ୍ପରତା ଦେଖାଉଛନ୍ତି। ଏନେଇ କମିଶନର ବିଜୟ ଅମୃତା କୁଲାଙ୍ଗେ ବୁଧବାର ରାଜସ୍ବ ଆଦାୟ ସମ୍ପର୍କିତ ରିଭ୍ୟୁ ମିଟିଂ ଡାକିଛନ୍ତି। ବିଏମ୍ସିର ନୂତନ ବିଲ୍ଡିଂରେ ଏହି ବୈଠକ ଅନୁଷ୍ଠିତ ହେବାକୁ ଥିବାବେଳେ ଏଠାକୁ ସମସ୍ତ ଷ୍ଟାଣ୍ଡିଂ କମିଟି ଚେୟାରମ୍ୟାନ, ଓ୍ବ୍ାର୍ଡ ଅଫିସରଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀଙ୍କୁ ଡକାଯାଇଛି।