ପୁରୀ ଅଫିସ, ୧୯।୪:ଶ୍ରୀମନ୍ଦିରରେ ବହୁ ବ୍ୟବଧାନରେ ପୁଣି ଅଘଟଣ ଦେଖିବାକୁ ମିଳିଛି। ରବିବାର ଶ୍ରୀମନ୍ଦିର ଭିତରକାଠ ନିକଟରେ ପଡ଼ିଛି ରକ୍ତ ଛିଟା। ଯାହାଫଳରେ ମହାପ୍ରଭୁଙ୍କ ବଡ଼ ମହାସ୍ନାନ ଅନୁଷ୍ଠିତ ହୋଇଥିଲା। ମିଳିଥିବା ସୂଚନା ଅନୁଯାୟୀ, ମନ୍ଦିର ପରିସରରେ କାର୍ଯ୍ୟରତ ୨ ଶ୍ରୀଜଗନ୍ନାଥ ଟେମ୍ପୁଲ ପୋଲିସ (ଜେଟିପି) ଗଙ୍ଗାଧର ପ୍ରଧାନ ଏବଂ ମନୋଜ ପାଣିଗ୍ରାହୀଙ୍କ ମଧ୍ୟରେ ଏକ ସାଧାରଣ କଥାକୁ ନେଇ ଉଚ୍ଚବାଚ୍ଚ ହୋଇଥିଲା। ଏପରିକି ଗଣ୍ଡଗୋଳ ପରିସ୍ଥିତି ହୋଇ ଉଭୟଙ୍କ ମଧ୍ୟରେ ମାରପିଟ ପର୍ଯ୍ୟନ୍ତ ଯାଇଥିଲା। ଗଙ୍ଗାଧରଙ୍କ ମାଡ଼ରେ ମନୋଜଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ଫଳରେ ଶ୍ରୀମନ୍ଦିରରେ ମନୋଜଙ୍କ ରକ୍ତ ଛିଟା ପଡ଼ିଥିଲା। ପରେ ସ୍ଥାନୀୟ ସେବାୟତ ଓ ଅନ୍ୟ ସୁରକ୍ଷାର୍କମୀମାନେ ମନୋଜଙ୍କୁ ମେଡିକାଲ ନେଇଥିଲେ।
ଉଲ୍ଲେଖ ଥାଉ କି, ମନୋଜ ଏବଂ ଗଙ୍ଗାଧର ଉଭୟ ଶ୍ରୀମନ୍ଦିର ବେହରଣ ଦ୍ୱାର ନିକଟରେ ନିୟୋଜିତ ଥିଲେ। ତେବେ ସାଧାରଣ କଥାରୁ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା। ଏଥିରେ ରାଗିଯାଇ ଗଙ୍ଗାଧର ପାଖରେ ଥିବା ଏକ କାଠ ଫାଳିଆରେ ମନୋଜଙ୍କ ମୁଣ୍ଡକୁ ପିଟିବାରୁ ମୁଣ୍ଡ ଫାଟି ରକ୍ତ ପଡ଼ିଥିଲା। ତେବେ ମନୋଜଙ୍କ ମୁଣ୍ଡରେ ଏକାଧିକ ଷ୍ଟିଚ୍ ପଡ଼ିଛି। ଶ୍ରୀମନ୍ଦିର ମଧ୍ୟରେ ରକ୍ତ ଛିଟା ପଡ଼ିବାରୁ ମହାପ୍ରଭୁଙ୍କ ରୀତିନୀତିରେ ବିଭ୍ରାଟ ସୃଷ୍ଟି ହୋଇଥିଲା। ପରେ ମହାପ୍ରଭୁଙ୍କ ବଡ଼ ମହାସ୍ନାନ ନୀତି ଅନୁଷ୍ଠିତ ହୋଇଥିଲା। ଅନ୍ୟପଟେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଘଟଣାକୁ ଗୁରୁତ୍ୱର ସହ ନିଆଯାଇଥିବା ବେଳେ ତଦନ୍ତ ନେଇ ପ୍ରକ୍ରିୟା ଆରମ୍ଭ କରାଯାଇଛି। ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ କହିଛନ୍ତି, ଶ୍ରୀମନ୍ଦିର ମଧ୍ୟରେ ଏଭଳି ବିଶୃଙ୍ଖଳା ଯୋଗୁ ନୀତିକାନ୍ତିରେ ଅହେତୁକ ବିଳମ୍ବ ହୋଇଛି। ପ୍ରାଥମିକ ତାଳ ଦେଇ ମହାସ୍ନାନ ଶେଷ କରାଯାଇଥିବା ବେଳେ ସମ୍ପୃକ୍ତ ୨ ଶ୍ରୀମନ୍ଦିର ପୋଲିସ କର୍ମଚାରୀଙ୍କୁ ତଦନ୍ତ ପରିସରଭୁକ୍ତ କରାଯାଇଛି। ତଦନ୍ତ ସରିବା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସାହୁ କହିଛନ୍ତିି। ଅନ୍ୟପକ୍ଷରେ ସିଂହଦ୍ୱାର ଆଇଆଇସି ଗେଲି ସାହୁ କହିଛନ୍ତି, ଶ୍ରୀମନ୍ଦିର ପ୍ରଶାସନ ପ୍ରାଥମିକ ସ୍ତରରେ ତଦନ୍ତ ସାରି ରିପୋର୍ଟ ଦେବା ପରେ ପୋଲିସ ପକ୍ଷରୁ କାର୍ଯ୍ୟାନୁଷ୍ଠାନ ନିଆଯିବ।
