କଳିଙ୍ଗନଗର,୧୨।୨(ଡି.ଏନ.ଏ.): ସାଙ୍ଗେଲ ଅଭିଯାନ କେନ୍ଦୁଝର ଜୋନାଲ କମିଟି ପକ୍ଷରୁ ଶନିବାର ୫ ଦଫା ଦାବିରେ ଯାଜପୁର-କେନ୍ଦୁଝର ରୋଡ୍ ରେଳଷ୍ଟେଶନରେ ରେଳପଥ ଅବରୋଧ କରାଯାଇଛି। ମାରାଂବୁରୁ ଅର୍ଥାତ ପାରସନାଥ ପର୍ବତ ଜୈନ ଧର୍ମାବଲମ୍ବୀଙ୍କଠାରୁ ଫେରାଇ ଆଦିବାସୀ ସମାଜକୁ ହସ୍ତାନ୍ତର କରିବା, ୧୫ ନଭେମ୍ବର ୨୦୦୦ରୁ ଗଢି ଉଠିଥିବା ଝାଡଖଣ୍ଡ ରାଜ୍ୟକୁ କୌଣସି ଆଦିବାସୀ ରାଜଭାଷାର ମାନ୍ୟତା ଦିଆଯାଇନାହିଁ। ଏଣୁ ସାନ୍ତାଳୀ ଭାଷାକୁ ଝାଡଖଣ୍ଡ ରାଜ୍ୟର ରାଜଭାଷାର ମାନ୍ୟତା ଦେବା, ଗଣତନ୍ତ୍ର ଦେଶରେ ସାମ୍ବିଧାନିକ ନିୟମ ଅନୁସାରେ ଆସାମ ଏବଂ ଆଣ୍ଡାମାନରେ ଥିବା ଆଦିବାସୀଙ୍କୁ ଏସ୍ଟି ମାନ୍ୟତା, ଆଦିବାସୀ ଅଞ୍ଚଳରେ ଭୂତ ପ୍ରେତ ନାମରେ ହତ୍ୟା, କଙ୍ଗାରୁକୋର୍ଟ, ମନଇଛା ଜରିମାନା, ସାମାଜିକ ବହିଷ୍କାର, ଭୋଟ କିଣାବିକା, ଆଦିବାସୀ ମହିଳା ବିରୋଧୀ ମାନସିକତା ଆଦି ଅମାନବୀୟ ପ୍ରଥାକୁ ସମାପ୍ତ କରିବା ଓ ପ୍ରଶାସନର ମାଝି ପାର୍ଗାନା ବ୍ୟବସ୍ଥାକୁ ସୁଧାରିବା ପାଇଁ ଆଦିବାସୀ ଗ୍ରାମ ସମାଜରେ ଜନତନ୍ତ୍ର ଏବଂ ସାମ୍ବିଧାନିକ ଆଇନଗତ ପଦକ୍ଷେପ ନେବାକୁ ଦାବିପତ୍ରରେ ଉଲ୍ଲେଖ ରହିଛି।
ଦାବିପତ୍ରର ଏକକିତା ନକଲ ଖୋର୍ଦ୍ଧା ଡିଆରଏମ୍, କଳିଙ୍ଗନଗର ଅତିରିକ୍ତ ଜିଲାପାଳ, ବ୍ୟାସନଗର ତହସିଲଦାର, ବ୍ୟାସନଗର ପୌରାଧ୍ୟକ୍ଷା ଓ ଯାଜପୁର ରୋଡ ଥାନାଧିକାରୀଙ୍କ ଅବଗତ ଏବଂ ବିହିତ କାର୍ଯ୍ୟାନୁଷ୍ଠାନ ନିମନ୍ତେ ପ୍ରଦାନ କରାଯାଇଛି। ଏହି ଆନ୍ଦୋଳନରେ ଜୋନାଲ ସଭାପତି ସୁନାରାମ ମାରାଣ୍ଡି, କଲ୍ୟାଣ ବାସ୍କୋ, ଭିମ ମୁର୍ମୁ, ଗୋନାରାମ ମୁର୍ମୁ, ଗୋପାଳ ଟୁଡୁ ଓ ମାନସିଂ ମାରାଣ୍ଡି ପ୍ରମୁଖ ଯୋଗ ଦେଇଥିଲେ। ଯାଜପୁର ରୋଡ୍ ପୋଲିସ ଉପଖଣ୍ଡ ଅଧିକାରୀ ସଞ୍ଜୟ ପଟ୍ଟନାୟକ, ଯାଜପୁର ରୋଡ୍ ଥାନା ଅଧିକାରୀ ଉପେନ୍ଦ୍ର ପ୍ରଧାନ, ଆରପିଏଫ୍ ଅଧିକାରୀ ପ୍ରବୀଣ କୁମାରଙ୍କ ସମତେ ୨ ପ୍ଲାଟୁନ ପୋଲିସ ଫୋର୍ସ ପହଞ୍ଚତ୍ ରେଳଧାରଣା ଆନ୍ଦୋଳନରତ ଆଦିବାସୀଙ୍କୁ ବୁଝାଇ ଧାରଣାରୁ ବିରତ କରିଥିଲେ।
