ପାତ୍ରପୁର, ୧୮ା୩(ଉମା ଚରଣ ନେପାକ): ପାତ୍ରପୁର ବ୍ଲକରେ କାର୍ଯ୍ୟରତ ଯୋଗାଣ ଅଧିକାରୀ ବଳରାମ ଜେନା ଲାଇସେନ୍ସ ନବୀକରଣ କରିବା ପାଇଁ ଟଙ୍କା ଲାଞ୍ଚ ନେଉଥିବା ସମ୍ପର୍କିତ ଏକ ଭିଡିଓ ଗତ ସୋମବାରଠାରୁ ସାମାଜିକ ଗଣମାଧ୍ୟମରେ ଭାଇରାଲ ହେଉଛି। ସୀମାନ୍ତ ଗୁଡ଼ିପଦର ପଞ୍ଚାୟତର ବଳରାମପୁର ଗ୍ରାମର ଏକ ମହିଳା ସ୍ବୟଂ ସହାୟିକା ଗୋଷ୍ଠୀ ଖାଦ୍ୟ ସୁରକ୍ଷା ଯୋଜନାରେ ରାଶନ ସାମଗ୍ରୀ ବଣ୍ଟନ କରୁଥିବା ବେଳେ ତା’ର ଲାଇସେନ୍ସ ନବୀକରଣ ଲାଗି ଜେନା ଏହି ଲାଞ୍ଚ ଟଙ୍କା ଗ୍ରହଣ କରୁଥିବା ଭିଡିଓରୁ ଜଣାପଡିଛି। ଦାବି ମୁତାବକ ୫ ଶହ ଟଙ୍କା କମ ରହିଥିବାରୁ ଅନ୍ୟ କର୍ମଚାରୀଙ୍କୁ ୫ ଶହ ଟଙ୍କା ଗ୍ରହଣ କରିବାକୁ ସେ କହିବା ସହ ତାଙ୍କ କାଗଜପତ୍ର ଦେବାଲାଗି କହିଥିବା ଭିଡିଓରୁ ସ୍ପଷ୍ଟ ହୋଇଛି। ଅନ୍ୟପକ୍ଷରେ ଏନେଇ ଯୋଗାଣ ଅଧିକାରୀ ଜେନା ଏପରି ଭାଇରାଲ ଭିଡିଓକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ବଳରାମପୁର ଗ୍ରାମରେ ରାଶନ ସାମଗ୍ରୀ ବଣ୍ଟନ କରୁଥିବା ପାଣ୍ଡୁରାମ ସ୍ବୟଂ ସହାୟିକା ଗୋଷ୍ଠୀର ଲାଇସେନ୍ସ ନବୀକରଣ ଲାଗି ୧୫ ଶହ ଟଙ୍କାର ଚାଲାଣ କାଟିବାକୁ ଥିବା ବେଳେ ସେମାନେ ମୋତେ ୧ହଜାର ଟଙ୍କା ଦେଇଥିଲେ। ବଳକା ୫ ଶହ ଟଙ୍କା ପୈଠ କଲେ ଲାଇସେନ୍ସ ନବୀକରଣ ହେବ ବୋଲି ସେ କହିଥିବା ଯୋଗାଣ ଅଧିକାରୀ ଜେନା ସଫେଇ ଦେଇଛନ୍ତି। ତେବେ ଏହି ଭାଇରାଲ ଭିଡିଓକୁ ଭିତ୍ତି କରି ଜିଲା ପ୍ରଶାସନ ଯୋଗାଣ ଅଧିକାରୀଙ୍କୁ ଉପଜିଲାପାଳଙ୍କ ନିକଟରୁ ଡାକରା ଆସିଥିବା ଜଣାପଡିଛି l
