ଦିଗପହଣ୍ଡି, ୨୪।୩ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ମୌଳାଭଞ୍ଜା ପଞ୍ଚାୟତର ଐତିହାସିକ ଗ୍ରାମ ତିଳେଶ୍ୱର ଏବେ ଉତ୍ସବମୁଖର। ମଙ୍ଗଳବାରଠାରୁ ଗ୍ରାମଦେବତୀ ମା’ ବୁଢ଼ୀ ଠାକୁରାଣୀଙ୍କ ତିନି ଦିନିଆ ବାସନ୍ତୀକ ଯାତ୍ରା ମହୋତ୍ସବ ଅତି ଆଡ଼ମ୍ବର ସହକାରେ ଶୁଭାରମ୍ଭ ହୋଇଛି। ରଙ୍ଗବେରଙ୍ଗର ଆଲୋକମାଳା ଓ ଭକ୍ତିମୟ ପରିବେଶରେ ସମଗ୍ର ଗ୍ରାମ ଝଲସି ଉଠୁଥିବା ବେଳେ, ଏହି ଅବସରରେ ବ୍ଲକ ପ୍ରଶାସନ ପକ୍ଷରୁ ଗ୍ରାମଟିକୁ ‘ପୋଷ୍ୟ ଗ୍ରାମ’ ଭାବେ ଘୋଷଣା କରାଯାଇଛି।
ପ୍ରାୟ ୫୦୦ ବର୍ଷର ପୁରୁଣା ଏହି ଗ୍ରାମର ସ୍ବତନ୍ତ୍ର ପରିଚୟ ରହିଛି। ଚଳିତ ବର୍ଷର ଯାତ୍ରା ମହୋତ୍ସବରେ ଅଶ୍ଳୀଳତାକୁ ଦୂରେଇ ରଖି ପ୍ରାଚୀନ କଳା, ସାହିତ୍ୟ ଓ ସଂସ୍କୃତିକୁ ପ୍ରାଧାନ୍ୟ ଦିଆଯାଇଛି। ସାନଖେମୁଣ୍ଡି ରାଜା ସାହେବ ବୀରକିଶୋର ଦେବ ଏହି ଯାତ୍ରା ପାଇଁ ଶୁଭସ୍ତମ୍ଭ ସ୍ଥାପନ କରିଛନ୍ତି। ଅଶ୍ଳୀଳତା ବିହୀନ ପୌରାଣିକ ମହାଭାରତ ନାଟକ ଏଠାରେ ମଞ୍ଚସ୍ଥ ହେଉଛି। ପଦ୍ମଶ୍ରୀ ସିମାଞ୍ଚଳ ପାତ୍ରଙ୍କ ସମେତ ବିଭିନ୍ନ ଶିକ୍ଷାବିତ, କଳାକାର ଓ ସାହିତ୍ୟିକମାନଙ୍କୁ ନେଇ ସମ୍ବର୍ଦ୍ଧନା ସଭା ଓ ଆଲୋଚନା ଚକ୍ରର ଆୟୋଜନ କରାଯାଇଛି।
ଗ୍ରାମର ଏହି ଶୃଙ୍ଖଳିତ ପରମ୍ପରା ଓ ଏକତାକୁ ଦେଖି ସାନଖେମୁଣ୍ଡି ବିଡ଼ିଓ ଜିତେନ୍ଦ୍ର କୁମାର ମିଶ୍ର ଏହି ଗ୍ରାମକୁ ବ୍ଲକର ଏକ ’ପୋଷ୍ୟ ଗ୍ରାମ’ ଭାବେ ଘୋଷଣା କରିଛନ୍ତି। ଆଗାମୀ ଦିନରେ ଗ୍ରାମର ସାମଗ୍ରିକ ବିକାଶ ପାଇଁ ସୌନ୍ଦର୍ଯ୍ୟପୂର୍ଣ୍ଣ ଠାକୁରାଣୀ ପାର୍କ ନିର୍ମାଣ, ପକ୍କା ରାସ୍ତା, ଉନ୍ନତ ବିଦ୍ୟାଳୟ ଓ ପାଠଗାରର ବିକାଶ, ଆଦର୍ଶ ପୁଷ୍କରିଣୀ ଓ ମଠ-ମନ୍ଦିରର ସଂସ୍କାର ଆଦି କରାଯିବ।
ଘୋଡ଼ାହାଡ଼ ନଦୀ କୂଳରେ ଅବସ୍ଥିତ ଏହି ଗ୍ରାମଟି ଅତୀତରେ ସାନଖେମୁଣ୍ଡି ଜମିଦାରୀର ପାଇକ ସୈନ୍ୟଙ୍କ ବାସସ୍ଥଳୀ ଥିଲା। ସ୍ବାଧୀନତା ଆନ୍ଦୋଳନ ଓ କୃଷକ ସଂଗ୍ରାମରେ ଏହି ଗ୍ରାମବାସୀଙ୍କ ମୁଖ୍ୟ ଭୂମିକା ରହିଥିଲା। ଆଜି ମଧ୍ୟ ଗ୍ରାମବାସୀଙ୍କ ମଧ୍ୟରେ ଥିବା ଏକତା ଓ ସଂସ୍କୃତି ପ୍ରତି ଭଲପାଇବା ସମଗ୍ର ଜିଲା ପାଇଁ ଏକ ଉଦାହରଣ ସାଜିଛି। ଯାତ୍ରା କମିଟିର କର୍ମକର୍ତ୍ତା ଓ ସମଗ୍ର ତିଳେଶ୍ୱର ଗ୍ରାମବାସୀ ଏହି ମହୋତ୍ସବକୁ ସଫଳ କରିବା ପାଇଁ ଅହୋରାତ୍ର ପରିଶ୍ରମ କରୁଛନ୍ତି।
