ଗୁଣପୁର,୩।୮(ଡି.ଏନ୍.ଏ.): ରାୟଗଡ଼ା ଜିଲା ଗୁଣପୁର ଉପଜିଲାପାଳଙ୍କ ସଦ୍ଭାବନା ଗୃହରେ ଭୋଟର ପରିଚୟ ପତ୍ର ସହ ଆଧାର ଲିଙ୍କ୍କୁ ନେଇ ଏକ ବୈଠକ ମଙ୍ଗଳବାର ଅନୁଷ୍ଠିତ ହୋଇଯାଇଛି। ଭାରପ୍ରାପ୍ତ ଉପଜିଲାପାଳ ତଥା ଆଇଟିଡିଏର ପ୍ରକଳ୍ପ ପ୍ରଶାସକ ଲୋକନାଥ ଦଳବେହେରାଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ ସହକାରୀ ଜିଲାପାଳ ରାଜେନ୍ଦ୍ର ପ୍ରସାଦ ଚୌଧୁରୀ, ବିଭିନ୍ନ ରାଜନୈତିକ ଦଳର ନେତା ଏବଂ ଏନ୍ଜିଓର କର୍ମକର୍ତ୍ତାମାନେ ଉପସ୍ଥିତ ଥିଲେ। ଅଗଷ୍ଟ ୧ରୁ ଏନେଇ ପ୍ରକ୍ରିୟା ଆରମ୍ଭ ହୋଇଥିବା ସୂଚନା ପ୍ରଦାନ କରାଯାଇଛି। ନୂତନ ନାମ ସଂଯୋଗ ସହ ବାଦ୍ ଏବଂ ନାମ ସଂଶୋଧନ ପ୍ରକ୍ରିୟା ଆରମ୍ଭ ହେବ। ନୂତନ ଭାବେ ନାମ ସଂଯୋଗ କରୁଥିବା ଭୋଟରଙ୍କ ଆଧାର ସଂଯୋଗ ସହ ଯେଉଁମାନଙ୍କ ଭୋଟର କାର୍ଡ ପୂର୍ବରୁ ରହିଛି ସେମାନେ ଆଧାରକାର୍ଡ ସହ ଲିଙ୍କ୍ ସ୍ବେଚ୍ଛାକୃତ ଭାବେ କରିବା ପାଇଁ ସଚେତନା ପଦକ୍ଷେପ ଗ୍ରହଣ କରାଯିବ। ଏଥିନେଇ ବୁଥ୍ସ୍ତରରେ ବ୍ୟବସ୍ଥା ଗ୍ରହଣ କରାଯାଇଛି। ଏହି କାର୍ଯ୍ୟରେ ନିୟୋଜିତ ଥିବା ବିଏଲ୍ଓମାନେ ଘର ଘର ବୁଲି ଏହି କାର୍ଯ୍ୟ ସମ୍ପାଦନ କରିବେ ବୋଲି ସୂଚନା ଦିଆଯାଇଛି। ସେମାନେ ଲୋକଙ୍କୁ ସଚେତନ କରିବା ସହ ଭୋଟର ପରିଚୟ ପତ୍ର ସହ ଆଧାର ଲିଙ୍କ୍ ବ୍ୟବସ୍ଥା କରିବେ। ଯେଉଁମାନଙ୍କ ଭୋଟର କାର୍ଡ ରହିଛି ସେମାନେ ଏପ୍ରିଲ ୨୦୨୩ ସୁଦ୍ଧା ଆଧାର ସଂଯୋଗ ନେଇ ସୂଚନା ଦେବେ। ବର୍ଷରେ ୪ ଥର (ଜାନୁୟାରୀ,ଏପ୍ରିଲ,ଜୁଲାଇ ଏବଂ ଅକ୍ଟୋବରରେ) ନୂତନ ସଂଯୋଗ ସହ ଅନ୍ୟ ପ୍ରସଙ୍ଗରେ ପ୍ରକ୍ରିୟା ସମ୍ପାଦନ ହେବ। ଯେଉଁମାନଙ୍କୁ ୧୭ ବର୍ଷ ସେମାନେ ବର୍ତ୍ତମାନ ନୂତନ ନିୟମ ପ୍ରକାରେ ଭୋଟର ତାଲିକାରେ ନାମ ସଂଯୋଗ କରିବେ ବୋଲି ସୂଚନା ଦିଆଯାଇଛି।
