ଢେଙ୍କାନାଳ ଅଫିସ, ୨୨ା୮
ବିବାହର ଦୀର୍ଘ ୧୦ ବର୍ଷ ପରେ ଜନ୍ମ ହୋଇଥିଲା ଛୁଆଟିଏ। ହେଲେ ଡାକ୍ତରଙ୍କ ଦାୟିତ୍ୱହୀନତାରୁ ସମ୍ପୃକ୍ତ ନବଜାତକ ଦୁନିଆ ଦେଖିବା ଆଗରୁ ଆଖି ବୁଜି ଦେଇଥିବା ଅଭିଯୋଗ ଆଣିଛନ୍ତି ଢେଙ୍କାନାଳ ଜିଲା ଗଁଦିଆ ଥାନା ଚବିଶକୁଦ ଗ୍ରାମର ପ୍ରଶାନ୍ତ ଦେହୁରୀ (୩୨) ଏବଂ ତାଙ୍କ ସ୍ତ୍ରୀ ସସ୍ମିତା। ଏହି ଘଟଣାକୁ ନେଇ ଶୁକ୍ରବାର ଜିଲା ମୁଖ୍ୟ ଚିକିତ୍ସାଳୟ ପରିସରରେ ଉତ୍ତେଜନା ଦେଖାଦେଇଥିଲା। ଚିକିତ୍ସାରେ ଅବହେଳା କରିଥିବା ଡାକ୍ତର ଏବଂ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ ଦମ୍ପତି ଆତ୍ମହତ୍ୟା କରିବେ ବୋଲି ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍ଓ) ସୁଜାତାରାଣୀ ମିଶ୍ରଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ଅଭିଯୋଗର ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ପରିସ୍ଥିତି ଶାନ୍ତ ପଡ଼ିଥିଲା।
ଅଭିଯୋଗ ଅନୁଯାୟୀ, ପ୍ରସବ ଲାଗି ସସ୍ମିତାଙ୍କୁ ଧରି ପ୍ରଶାନ୍ତ ଜିଲା ଚିକିତ୍ସାଳୟକୁ ଆସିଥିଲେ। ବିଭାଗୀୟ ଡାକ୍ତର ଦେଖିବା ପରେ ଲେବର ରୁମ୍କୁ ଯିବା ପାଇଁ କହିଥିଲେ। ହେଲେ ଷ୍ଟ୍ରେଚର ନ ମିଳିବାରୁ ମହିଳା ଜଣକ ଯନ୍ତ୍ରଣା ସତ୍ତ୍ୱେ ଚାଲିଚାଲି ଲେବର ରୁମକୁ ଯାଇଥିଲେ। ସେଠାରେ ଡାକ୍ତର ଚିକିତ୍ସା କରିବା ପରିବର୍ତ୍ତେ କଟକ ନେଇଯିବାକୁ ପରାମର୍ଶ ଦେଇଥିଲେ। ଏଥିସହ ଆମ୍ବୁଲାନ୍ସକୁ ଅପେକ୍ଷା କରିବାକୁ କହି ପଳାଇଥିଲେ। ମହିଳା ଜଣକ ଛିଡ଼ା ହୋଇଥିବାବେଳେ ତାଙ୍କର ପୁତ୍ର ସନ୍ତାନ ପ୍ରସବ ହୋଇଥିଲା। ଯନ୍ତ୍ରଣାରେ ମହିଳା ଜଣକ ଛୁଆ ଉପରେ ପଡ଼ିଯାଇଥିଲେ। ଫଳରେ ଘଟଣାସ୍ଥଳରେ ଶିଶୁଟିର ମୃତ୍ୟୁ ହୋଇଯାଇଥିଲା। କଟକ ରେଫର କରାଯାଇଥିବା କାଗଜକୁ ଚିରି ଦିଆଯାଇଥିବା ପ୍ରଶାନ୍ତ ସିଡିଏମ୍ଓଙ୍କ ନିକଟରେ ଅଭିଯୋଗ କରିଛନ୍ତି। ସୂଚନାଯୋଗ୍ୟ, ଜିଲା ଚିକିତ୍ସାଳୟରେ ଚିକିତ୍ସା ଅବହେଳାରୁ ନବଜାତ ଶିଶୁପୁତ୍ରଙ୍କ ମୃତ୍ୟୁ ଘଟୁଥିବା ନେଇ ଅନେକ ସମୟରେ ଅଭିଯୋଗ ହେଉଛି। ଚଳିତ ମାସରେ ଏହା ହେଉଛି ଦ୍ୱିତୀୟ ଘଟଣା। ପୂର୍ବ ଘଟଣାରେ ଜଣେ ଷ୍ଟାଫ୍ ନର୍ସଙ୍କୁ ନିଲମ୍ବିତ କରାଯାଇଥିବାବେଳେ ଡାକ୍ତରଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି।
