ବେଜିଂ,୧୮ ।୫: ଚଳିତ ବର୍ଷ ଆରମ୍ଭରେ ଚାଇନାରେ ହୋଇଥିବା ଏକ ବିମାନ ଦୁର୍ଘଟଣାକୁ ନେଇ ଚମକାଇବା ଭଳି ଖବର ସାମ୍ନାକୁ ଆସିଛି । ୱାଲ ଷ୍ଟ୍ରିଟ ଜର୍ନାଲର ରିପୋର୍ଟ ଅନୁଯାୟୀ, ଦୁର୍ଘଟଣାର ଶିକାର ହୋଇଥିବା ଚାଇନାର ଇଷ୍ଟର୍ନ ଜେଟକୁ ଜାଣିଶୁଣି ଦୁର୍ଘଟଣା କରାଯାଇଥିଲା ବା କ୍ରାସ କରାଯାଇଥିଲା । ଫଳରେ ଏଥିରେ ଥିବା ସମସ୍ତ ୧୨୩ ଯାତ୍ରୀ ଓ ୯ କ୍ର୍ୟୁ ମେମ୍ବରଙ୍କର ମୃତ୍ୟୁ ହୋଇଥିଲା ।
ୱାଲ ଷ୍ଟ୍ରିଟ ଜର୍ନାଲର ରିପୋର୍ଟରେ କୁହାଯାଇଛି ବିମାନର ଧ୍ୱଂସାବଶେଷରୁ ମିଳିଥିବା ବ୍ଲାକ ବକ୍ସର ଯାଞ୍ଚ ପରେ ଜଣାପଡିଛି କି କକପିଟରେ କେହି ଜାଣିଶୁଣି ବିମାନକୁ ଦୁର୍ଘଟଣା କରାଇଛି । ଏହା ବ୍ୟତୀତ ଆମେରିକା ଅଧିକାରୀଙ୍କ ପ୍ରାରମ୍ଭିକ ଯାଞ୍ଚରେ ସାମିଲ ଜଣେ ଅଧିକାରୀ ରଏଟର୍ସକୁ କହିଛନ୍ତି, ତାଙ୍କୁ ଯାଞ୍ଚ ସମୟରେ କୌଣସି ପ୍ରକାର ଯାନ୍ତ୍ରିକ ତ୍ରୁଟିର ସଙ୍କେତ ମିଳିନାହିଁ, ଯାହା ଫଳରେ ଏବେ ଚଳାକ ଦଳଙ୍କ କାର୍ଯ୍ୟ ଉପରେ ଧ୍ୟାନ ଦିଆଯାଇଛି ।
ଋିପୋର୍ଟରେ ଦାବି କରାଯାଇଛି କି ବିମାନ ୨୯ ହଜାର ଫୁଟ ଉପରେ ୩ ମିନିଟରୁ କମ ସମୟ ମଧ୍ୟରେ ୯ହଜାର ଫୁଟ ଉଚ୍ଚତାକୁ ଚାଲି ଆସିଥିଲା । ଏହାର ୨୦ ସେକେଣ୍ଡ ପରେ ଏହା ୩ହଜାର ଫୁଟ ଉଚ୍ଚରେ ଥିଲା । ରିପୋର୍ଟରେ ଦର୍ଶାଯାଇଛି କି ଏତେ ଉଚ୍ଚତାରୁ ତଳକୁ ଆସିବାକୁ ୩୦ ମିନିଟରୁ ଅଧିକ ସମୟ ଲାଗିବା କଥା । ତେଣୁ ବିମାନ ଭିତରେ କକପିଟରେ କେହି ବ୍ୟକ୍ତି ଜାଣିଶୁଣି ବିମାନକୁ ଖୁବଜୋରରେ ତଳକୁ ଖସିବାକୁ ବାଧ୍ୟ କରିଥିଲେ । ଏବେସୁଦ୍ଧା ୟୁଏସ ନ୍ୟାଶନାଲ ଟ୍ରାନ୍ସପୋର୍ଟେସନ ସେପ୍ଟି ବୋର୍ଡ ଏହା ଉପରେ କୌଣସି ଟିପ୍ପଣି ଦେଇନାହିଁ ।
ସୂଚନଯୋଗ୍ୟ, ଚଳିତ ବର୍ଷ ମାର୍ଚ୍ଚରେ କୁମିଂଗରୁ ଗୁଆଙ୍ଗଝୋଉ ଯାଉଥିବା ବୋଇଂ ୭୩୭-୮୦୦ ବିମାନ ଗୁଆଂଗଜିର ପାହାଡରେ ହଠାତ୍ ଉପରୁ ଖସିପଡି ଦୁର୍ଘଟଣାର ଶିକାର ହୋଇଥିଲା । ଏଥିରେ ଥିବା ସମସ୍ତ ୧୨୩ ଯାତ୍ରୀ ଓ ୯ କ୍ର୍ୟୁ ମେମ୍ବରଙ୍କର ମୃତ୍ୟୁ ହୋଇଥିଲା । ଗତ ୩ ଦଶକ ମଧ୍ୟରେ ଚାଇନାର ଏହା ସବୁଠାରୁ ବଡ ବିମାନ ଦୁର୍ଘଟଣା ବୋଲି କୁହାଯାଇଥିଲା ।
