ନୂଆଦିଲ୍ଲୀ,୨୬।୧୨: ଉତ୍ତରପ୍ରଦେଶ ବିଧାନସଭା ନିର୍ବାଚନକୁ ଦେଇ ରାଜନୀତି ଜୋର ଧରିଛି। ବିଭିନ୍ନ ଦଳ ପକ୍ଷରୁ ରାଜ୍ୟରେ ପ୍ରଚାର ଜୋରସୋରରେ ଚାଲିଛି। ରବିବାର କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା କାର୍ଯ୍ୟସୂଚୀରୁ ପ୍ରାୟ ଏକ ଘଣ୍ଟା ବିଳମ୍ବରେ କସଗଞ୍ଜରେ ପହଞ୍ଚିଥିଲେ। ତାଙ୍କ ହେଲିକପ୍ଟରଟି ପୋଲିସ ଲାଇନରେ ନିର୍ମିତ ହେଲିପ୍ୟାଡରେ ଅବତରଣ କରିଥିଲା। ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଏଠାରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀଙ୍କୁ ସ୍ବାଗତ କରିଛନ୍ତି। ଏହା ପରେ ସେ କାର୍ଯ୍ୟକ୍ରମ ସ୍ଥଳରେ ପହଞ୍ଚିଥିଲେ। ଅମିତ ଶାହା ଭାରତ ମାତା କି ଜୟ ସ୍ଲୋଗାନରୁ ନିଜ ଭାଷଣ ଆରମ୍ଭ କରି କହିଥିଲେ, ବ୍ରଜ ଅଞ୍ଚଳ ଭାଜପାର ଗଡ଼ ଥିଲା, ରହିଛି ଏବଂ ରହିବ। ଏଥର ରାଜ୍ୟରେ ଭାଜପା ୩୦୦ରୁ ଅଧିକ ଆସନ ଅକ୍ତିଆର ମରିବ ବୋଲି ଶାହା ଭବିଷ୍ୟବାଣୀ କରିଛନ୍ତି।
ଅମିତ ଶାହା ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କୁ ମନେ ପକାଇ କହିଥିଲେ ଯେ, ବାବୁଜୀ ପ୍ରଥମ ଥର ପାଇଁ ଉତ୍ତରପ୍ରଦେଶରେ ସୁଶାସନ ବିଷୟରେ କହିଥିଲେ। ଉତ୍ତରପ୍ରଦେଶରେ ପ୍ରଥମ ଥର ପାଇଁ ପଛୁଆବର୍ଗଙ୍କ ବିଷୟରେ ଆଲୋଚନା କରାଯାଇଥିଲା, ପ୍ରଥମ ଥର ପାଇଁ ପଛୁଆ ସମାଜକୁ ଅଧିକାର ଦେବା କାର୍ଯ୍ୟ ମହାନ କଲ୍ୟାଣ ସିଂଙ୍କ ଦ୍ୱାରା କରାଯାଇଥିଲା ବୋଲି ସ୍ବରାଷ୍ଟ୍ର ମନ୍ତ୍ରୀ କହିଛନ୍ତି।
