ମୁମ୍ବାଇ,୭।୭: ମହାରାଷ୍ଟ୍ରରେ ଚାଲିଥିବା ରାଜନୈତିକ ଅସ୍ଥିରତା ମଧ୍ୟରେ ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେ ଭାଜପାକୁ ଟାର୍ଗେଟ କରିଛନ୍ତି। ଭାଜପା ଶିବସେନା ଏବଂ ଜାତୀୟତାବାଦୀ କଂଗ୍ରେସ ପାର୍ଟି (ଏନସିପି) କୁ ଭାଙ୍ଗି ମହାରାଷ୍ଟ୍ର ଭାଙ୍ଗିବାକୁ ଚାହୁଁଛି ଉଦ୍ଧବ କହିଛନ୍ତି। ଏନସିପିରେ ବିଭାଜନକୁ ନେଇ ତାଙ୍କର ପ୍ରଥମ ପ୍ରତିକ୍ରିୟାରେ ଠାକରେ କହିଛନ୍ତି, ଭାଜପା ମହାରାଷ୍ଟ୍ର ବିରୋଧୀ। ସେମାନେ ପ୍ରଥମେ ଶିବସେନା ଏବଂ ବର୍ତ୍ତମାନ ଏନସିପି ଭାଙ୍ଗିଥିଲେ। ଏପରି ଭାବେ ସେମାନେ ମହାରାଷ୍ଟ୍ରକୁ ଭାଙ୍ଗିବାକୁ ଚାହାଁନ୍ତି।
ସୂଚନାଯୋଗ୍ୟ, ଅଜିତ ପାୱାର ଏକନାଥ ଶିନ୍ଦେଙ୍କ ନେତୃତ୍ୱାଧୀନ ମହାରାଷ୍ଟ୍ର ସରକାରରେ ଉପମୁଖ୍ୟମନ୍ତ୍ରୀ ହେବା ପରେ ଏନସିପି ବିଭାଜିତ ହୋଇଛି। ସେବେଠାରୁ ଏନସିପିର ନେତୃତ୍ୱ ବଜାୟ ରଖିବା ପାଇଁ ଦାଦା ଶରଦ ପାୱାର ଏବଂ ପୁତୁରା ଅଜିତଙ୍କ ମଧ୍ୟରେ ରାଜନୈତିକ ଯୁଦ୍ଧ ଚାଲିଛି। ଅଜିତ ନିଜକୁ ଏନସିପିର ରାଷ୍ଟ୍ରୀୟ ସଭାପତି ଭାବେ ଘୋଷଣା କରିଛନ୍ତି ଏବଂ ନିର୍ବାଚନ ଆୟୋଗରେ ଦଳ ସମ୍ପର୍କରେ ନିଜର ଦାବି ରଖିଛନ୍ତି। ଏଥି ସହ ଶରଦ ପାୱାର ମଧ୍ୟ ନିର୍ବାଚନ ଆୟୋଗର ଦ୍ୱାରସ୍ଥ।
