ନୂଆଦିଲ୍ଲୀ,୫।୧: ତାମିଲନାଡୁ ବିଧାନସଭା ନିର୍ବାଚନ ପୂର୍ବରୁ ରାଜ୍ୟ ରାଜନୀତିରେ ଏକ ବଡ଼ ଧରଣର ପରିବର୍ତ୍ତନର ସଙ୍କେତ ମିଳୁଛି। ବିଶେଷ ସୂତ୍ର ଅନୁସାରେ, ତାମିଲନାଡୁରେ ନିଜର ସ୍ଥିତି ମଜବୁତ କରିବା ପାଇଁ ଭାରତୀୟ ଜନତା ପାର୍ଟି (ଭାଜପା), ଲୋକପ୍ରିୟ ଅଭିନେତା ବିଜୟଙ୍କ ନୂତନ ଦଳ ତାମିଲଗା ଭେଟ୍ରି କାଜାଗାମ (TVK) ସହ ମେଣ୍ଟ କରିବା ପାଇଁ ଗମ୍ଭୀରତାର ସହ ବିଚାର କରୁଛି।
ତାମିଲନାଡୁ ଗସ୍ତରେ ଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପାର୍ଟିର କୋର୍ କମିଟି ବୈଠକରେ ଯୋଗଦେଇ ନେତାମାନଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି ଯେ, କେବଳ ନିର୍ବାଚନ ଲଢ଼ିବା ପାଇଁ ନୁହେଁ, ବରଂ ଜିତିବା ପାଇଁ ମଇଦାନକୁ ଓହ୍ଲାନ୍ତୁ। ଏହି ଗସ୍ତ ସମୟରେ ଶାହ ଜାଣିଶୁଣି ଏଆଇଏଡିଏମକେ (AIADMK) ମୁଖ୍ୟ ଇ.ପି.ଏସଙ୍କୁ ଭେଟି ନାହାନ୍ତି, ଯାହାକି ଏକ ସ୍ପଷ୍ଟ ସଙ୍କେତ ଦେଉଛି ଯେ ଭାଜପା ଏବେ ଡିଏମକେ ବିରୋଧୀ ସମସ୍ତ ଶକ୍ତିକୁ ଏକାଠି କରିବାକୁ ଚାହୁଁଛି।
ଭାଜପା ପାଇଁ ଏହି ମେଣ୍ଟ ମେଣ୍ଟ ଗଣିତ ହେଉଛି ୨୦୨୧ ବିଧାନସଭା ନିର୍ବାଚନରେ ଭାଜପା ମାତ୍ର ୪ଟି ସିଟ୍ ଜିତିଥିଲା। ୨୦୨୪ ଲୋକସଭା ନିର୍ବାଚନରେ ଦଳ ଖାତା ଖୋଲିବାକୁ ସକ୍ଷମ ହୋଇନଥିଲା। ଅଭିନେତା ବିଜୟଙ୍କ ଦଳ ନିଜକୁ ତାମିଲନାଡୁରେ ଏକ ବିକଳ୍ପ ରାଜନୈତିକ ଶକ୍ତି ଭାବେ ଉଭା କରିବାକୁ ଚେଷ୍ଟା କରୁଛି।
ଅନ୍ୟପଟେ, ଟିଭିକେ ମୁଖପାତ୍ର ଫେଲିକ୍ସ ଗେରାଡଙ୍କ ଅନୁସାରେ, ଧର୍ମନିରପେକ୍ଷତା ଆଧାରରେ କଂଗ୍ରେସ ଓ ଟିଭିକେ ସ୍ୱାଭାବିକ ବନ୍ଧୁ। ମାତ୍ର ବର୍ତ୍ତମାନର ତାମିଲନାଡୁ କଂଗ୍ରେସ ନେତୃତ୍ୱର କିଛି ବ୍ୟକ୍ତିଗତ ସ୍ୱାର୍ଥ ଯୋଗୁଁ ଏହି ମେଣ୍ଟ ହୋଇପାରୁ ନାହିଁ। ଭାଜପା ଏହି ସୁଯୋଗର ଫାଇଦା ଉଠାଇବାକୁ ଲକ୍ଷ୍ୟ ରଖିଛି।
ଅମିତ ଶାହ ନେତାମାନଙ୍କୁ ଆଗୁଆ ପ୍ରାର୍ଥୀ ଚୟନ କରିବାକୁ ଏବଂ ଆସନ୍ତା ଜାନୁଆରୀ ୧୪ (ପୋଙ୍ଗଲ) ସୁଦ୍ଧା ଏକ ବଡ଼ ମେଣ୍ଟର ଚୂଡ଼ାନ୍ତ ରୂପରେଖ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି।
