ଶିମ୍ଲା,୨୦।୧୦: ହିମାଚଳ ପ୍ରଦେଶ ବିଧାନସଭା ନିର୍ବାଚନ ପାଇଁ ଭାଜପା ଗୁରୁବାର ଦ୍ୱିତୀୟ ପ୍ରାର୍ଥୀ ତାଲିକା ଜାରି କରିଛି। ଏଥିରେ ୬ଜଣ ପ୍ରାର୍ଥୀଙ୍କ ନାମ ରହିଛି। ହିମାଚଳ ପ୍ରଦେଶ ବିଧାନସଭାରେ ୬୮ଟି ଆସନ ରହିଥିବା ବେଳେ ଅକ୍ଟୋବର ୧୯ରେ ନିର୍ବାଚନ ପାଇଁ ଭାଜପା ୬୨ଜଣ ପ୍ରାର୍ଥୀଙ୍କ ନାମ ଘୋଷଣା କରିଥିଲା। ତେବେ ଦ୍ୱିତୀୟ ତାଲିକାରେ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ପ୍ରେମ କୁମାର ଧୁମଲଙ୍କ ନାମ ନାହିଁ। ଏଥିରୁ ସ୍ପଷ୍ଟ ହୋଇଛି ଯେ, ସେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ। ଦ୍ୱିତୀୟ ତାଲିକାରେ ଭାଜପା ଦେହରା ଆସନରୁ ରମେଶ ଧାୱଲାଙ୍କୁ ପ୍ରାର୍ଥୀ କରିଥିବା ବେଳେ ଜ୍ୱାଲାମୁଖୀରୁ ରବିନ୍ଦ୍ର ସିଂ ରବି, କୁଲ୍ଲୁରୁ ମହେଶ୍ୱର ସିଂ, ବଡସରରୁ ମାୟା ଶର୍ମା, ହରୋଲିରୁ ପ୍ରଫେସର ରାମକୁମାର, ଅନୁସୂଚିତ ଜାତି ପାଇଁ ସଂରକ୍ଷିତ ରାମପୁର ଆସନରୁ କୌଲ ନେଗିଙ୍କୁ ଟିକେଟ ଦିଆଯାଇଛି। ଏହାକୁ ମିଶାଇ ଭାଜପା ନିଜର ୬୨ପ୍ରାର୍ଥୀଙ୍କ ନାମ ଘୋଷଣା କରିସାରିଛି। ସୂଚନାଯୋଗ୍ୟ, ଗୋଟିଏ ପର୍ଯ୍ୟାୟରେ ହିମାଚଳ ପ୍ରଦେଶ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଅକ୍ଟୋବରରେ ୧୭ରେ ବିଜ୍ଞପ୍ତି ଜାରି କରାଯାଇଥିବା ବେଳେ ଅକ୍ଟୋବର ୨୫ରେ ନାମାଙ୍କନପତ୍ର ଦାଖଲ କରାଯିବ। ନଭେମ୍ବର ୧୨ରେ ମତଦାନ ଏବଂ ଡିସେମ୍ବର ୮ରେ ଫଳାଫଳ ଆସିବ।
