ବେଙ୍ଗାଲୁରୁ, ୨୫।୪ : ଭ୍ରଷ୍ଟାଚାର ଏବଂ କାର୍ଯ୍ୟରେ ଅବହେଳା ଅଭିଯୋଗକୁ ଦୃଷ୍ଟିରେ ରଖି କର୍ନାଟକରେ ଗୁଜୁରାଟ ଫର୍ମୂଲା ଲାଗୁ କରିବାକୁ ଭାଜପାର ସର୍ବୋଚ୍ଚ ନେତୃତ୍ୱ ଚିନ୍ତା କରୁଛନ୍ତିି। ଭାଜପା ପକ୍ଷରୁ ମୁଖ୍ୟମନ୍ତ୍ରୀଙ୍କ ସମେତ ସମସ୍ତ ମନ୍ତ୍ରୀଙ୍କୁ ହଟାଇ ଗୁଜରାଟରେ ଏକ ନୂତନ ଟିମ୍ ଗଠନ କରିଥିଲା। ଏହି ଫର୍ମୂଲା ଏବେ କର୍ନାଟକରେ ଆପଣେଇବା ଲାଗି ଯୋଜନା କରାଯାଉଛି। ରାଜ୍ୟର ବୃହତ୍ତମ ଜନସଂଖ୍ୟା ଲିଙ୍ଗାୟତ ସମ୍ପ୍ରଦାୟଙ୍କୁ ନେଇ ଭାଜପା ନୂଆ ରଣନୀତି ଉପରେ ବିଚାର କରୁଛି। ଦକ୍ଷିଣ ଭାରତରେ କେବଳ କର୍ନାଟକରେ ଭାଜପା ସରକାର ଅଛି। ପ୍ରାୟ ଦେଢ଼ ବର୍ଷ ପରେ ଏଠାରେ ବିଧାନସଭା ନିର୍ବାଚନ ହେବାର ଅଛି ଏବଂ ଦଳ କୌଣସି ମୂଲ୍ୟରେ କ୍ଷମତା ହରାଇବାକୁ ଚାହୁଁନାହିଁ।
ଭାଜପା ସୂତ୍ର ଅନୁଯାୟୀ, ମଧ୍ୟପ୍ରଦେଶ, ହରିୟାଣା, ତ୍ରିପୁରା ଭଳି ରାଜ୍ୟରେ ମଧ୍ୟ କର୍ନାଟକ ଭଳି ସମଗ୍ର ସରକାରକୁ ପରିବର୍ତ୍ତନ କରିବା ଉପରେ ଆଲୋଚନା ଚାଲିଥିବାବେଳେ ନେତୃତ୍ୱର ପରିବର୍ତ୍ତନ ସହିତ ସରକାରଙ୍କ ବର୍ତ୍ତମାନର ଗଠନରେ ମଧ୍ୟ ପ୍ରମୁଖ ପରିବର୍ତ୍ତନ ଉପରେ ଚର୍ଚ୍ଚା ହେଉଛି।
ଦୁଇ ବର୍ଷ ପରେ ହେବାକୁ ଥିବା ଲୋକ ସଭା ନିର୍ବାଚନରେ ରାଜ୍ୟ ନେତୃତ୍ୱର ଖରାପ ପ୍ରଦର୍ଶନକୁ ନେଇ ଭାଜପା କୌଣସି ରିସ୍କ୍ ନେବାକୁ ଚାହୁଁନାହିଁ। ଭାଜପା କର୍ନାଟକ ସହାୟତାରେ କେରଳ, ଆନ୍ଧ୍ରପ୍ରଦେଶ, ତେଲେଙ୍ଗାନା, ତାମିଲନାଡୁ ସମେତ ଅନ୍ୟ ଦକ୍ଷିଣ ରାଜ୍ୟରେ ନିଜର ସ୍ଥିତି ସୁଦୃଢ଼ କରିବାକୁ ଚାହୁଁଛି। ଏହାକୁ ଦୃଷ୍ଟିରେ ରଖି କର୍ନାଟକର ବିଏସ ୟେଦୁରପ୍ପାଙ୍କ ସ୍ଥାନରେ ବାସଭାରାଜ ବୋମ୍ମାଇଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା।
କିନ୍ତୁ ନେତୃତ୍ୱ ବଦଳିବା ପରେ ସରକାରଙ୍କ ଉପରେ ଦୁର୍ନୀତିର ଅଭିଯୋଗ କେବଳ ବୃଦ୍ଧି ପାଇନାହିଁ, ବରଂ ସରକାରଙ୍କ କାର୍ଯ୍ୟର ଗତି ମଧ୍ୟ ବହୁତ ମନ୍ଥର ହୋଇଛି । ରାଜ୍ୟରେ ସଂଖ୍ୟାଲଘୁ ବିରୋଧୀ ଅଭିଯାନର ପରିସ୍ଥିତିକୁ ନେଇ ଭାଜପା ନେତୃତ୍ୱ ମଧ୍ୟ ଅସନ୍ତୁଷ୍ଟ ରହିଛନ୍ତି।
