ଅଗରତାଲା,୩୦।୩: ତ୍ରିପୁରା ବିଧାନସଭା ଅଧିବେଶନ ସମୟରେ ଭାରତୀୟ ଜନତା ପାର୍ଟି (ଭାଜପା)ର ଜଣେ ବିଧାୟକ ଫୋନରେ ଅଶ୍ଳୀଳ ଭିଡିଓ ଦେଖୁଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ତେବେ ସେହି ବିଧାୟକ ଜଣଙ୍କ ହେଉଛନ୍ତି ଉତ୍ତର-ପୂର୍ବ ଭାରତୀୟ ରାଜ୍ୟର ବାଗବାସା ବିଧାନସଭା ଆସନକୁ ପ୍ରତିନିଧିତ୍ୱ କରୁଥିବା ଭାଜପା ବିଧାୟକ ଯାଦବ ଲାଲ ନାଥ।
ଖବରନୁଯାୟୀ, ବିଧାନସଭାରେ ରାଜ୍ୟ ବଜେଟ ସମ୍ବନ୍ଧୀୟ ପ୍ରସଙ୍ଗ ଉପରେ ଆଲୋଚନା ହେଉଥିବାବେଳେ ଏହି ଘଟଣା ଘଟିଥିବା ଜଣାପଡିଛି। ଏହି ଭିଡିଓକୁ ଯାଦବ ଲାଲ ନାଥଙ୍କ ପଛରେ ବସିଥିବା କେହି ଜଣେ ଶୁଟିଂ କରିଥିଲେ। ଗୃହରେ ବାଚସ୍ପତି ଏବଂ ଅନ୍ୟ ବିଧାୟକମାନେ ଆଲୋଚନା କରୁଥିବା ବେଳେ ଯାଦବ ଲାଲ ସେତେବେଳେ ଫୋନରେ ଥିବା ଭିଡିଓ କ୍ଲିପଗୁଡିକୁ ସ୍କ୍ରୋଲ କରୁଥିବା ସମୟରେ ଆସୁଥିବା ଅଶ୍ଳୀଳ ଭିଡିଓକୁ ଦେଖୁଥିବା କୁହାଯାଉଛି।
ଦଳର ସୂତ୍ର ଅନୁଯାୟୀ, ଭାଜପା ବିଧାୟକଙ୍କଠାରୁ ସ୍ପଷ୍ଟୀକରଣ ପାଇଁ ତାଙ୍କୁ ଡକାଇଥିବା ସୂଚନା ମିଳିଛି। ଯାଦବ ଲାଲ ନାଥ ଏ ପର୍ଯ୍ୟନ୍ତ ଅଭିଯୋଗ କିମ୍ବା ଭିଡିଓକୁ ନେଇ କୌଣସି ପ୍ରତିକ୍ରିୟା ଦେଇନାହାନ୍ତି। ସୂଚନାନୁସାରେ, ଅଧିବେଶନ ଶେଷ ହେବା ପରେ ସେ ବିଧାନସଭା ପରିସରକୁ ପଳାଇଯାଇଥିଲେ।
