କୋଲକାତା,୧୨।୧୦ : ଭାରତୀୟ କ୍ରିକେଟ କଣ୍ଟୋଲ ବୋର୍ଡ(ବିସିସିଆଇ)ର ଅଧ୍ୟକ୍ଷ ତଥା ଦଳର ପୂର୍ବତନ ଅଧିନାୟକ ସୌରଭ ଗାଙ୍ଗୁଲିଙ୍କୁ ନେଇ ଏବେ ରାଜନୀତି ଆରମ୍ଭ ହୋଇଛି। ଗାଙ୍ଗୁଲି ଅଧ୍ୟକ୍ଷ ପଦ ଛାଡ଼ିବା ନେଇ ଖବର ଜାରି ରହିଛି। ଏନେଇ ପଶ୍ଚିମବଙ୍ଗରେ ଶାସକ ତୃଣମୂଳ କଂଗ୍ରେସ(ଟିଏମସି) ଭାରତୀୟ ଜନତା ପାର୍ଟିକୁ ଟାର୍ଗେଟ କରିଛି। ଟିଏମସି କହିଛି ଯେ ଗାଙ୍ଗୁଲିଙ୍କୁ ଦଳରେ ସାମିଲ କରିବାକୁ ଭାଜପା ଅନେକ ଥର ଚେଷ୍ଟା କରିଛି। ଦଳ କହିଛି ଯେ ପୂର୍ବତନ କ୍ରିକେଟର ରାଜନୈତିକ ପ୍ରତିଶୋଧର ଶିକାର ହୋଇଛନ୍ତି।
ଟିଏମସି ନେତା ଡ. ଶାନ୍ତନୁ ସେନ କହିଛନ୍ତି, ଅମିତ ଶାହା କିଛି ମାସ ପୂର୍ବରୁ ସୌରଭ ଗାଙ୍ଗୁଲିଙ୍କ ବାସଭବନକୁ ଯାଇଥିଲେ। ଭାଜପାରେ ଯୋଗଦେବା ପାଇଁ ଗାଙ୍ଗୁଲିଙ୍କୁ ବାରମ୍ବାର ଯୋଗାଯୋଗ କରାଯାଉଥିଲା। ବୋଧହୁଏ ସେ ଭାଜପାରେ ଯୋଗଦେବାକୁ ରାଜି ହୋଇ ନ ଥିଲେ। ଏହା ସହିତ ସେ ପଶ୍ଚିମବଙ୍ଗର ହୋଇଥିତ୍ବାରୁ ତେଣୁ ସେ ରାଜନୈତିକ ପ୍ରତିଶୋଧର ଶିକାର ହୋଇଛନ୍ତି।
ସୂଚନାଯୋଗ୍ୟ, କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କିଛି ସମୟ ପୂର୍ବରୁ ରାତ୍ରୀ ଭୋଜନ ପାଇଁ ପୂର୍ବତନ କ୍ରିକେଟରଙ୍କ ଘରେ ପହଞ୍ଚିଥିଲେ।
ଏହାପୂର୍ବରୁ ମଧ୍ୟ ଦଳ ପୂର୍ବତନ କ୍ରିକେଟକୁ ଅପମାନିତ କରିବାକୁ ଚେଷ୍ଟା କରୁଥିବା ଅଭିଯୋଗ ଟିଏମସି ଅଭିଯୋଗ କରିଛି। ଟିଏମସି ମୁଖପାତ୍ର କୁନାଲ ଘୋଷ କହିଛନ୍ତି, ଆମେ ଏହି ପ୍ରସଙ୍ଗରେ ସିଧାସଳଖ କିଛି କହୁ ନାହୁଁ। ନିର୍ବାଚନ ପରେ ଭାଜପା ଏଭଳି ପ୍ରଚାର ଚଳାଇଥିବାରୁ ଏଭଳି କଳ୍ପନା ଜଳ୍ପନାର ଉତ୍ତର ଦେବା ଭାଜପାର ଦାୟିତ୍ୱ। ଏଥିରୁ ଜଣାପଡୁଛି ଯେ ଭାଜପା ଗାଙ୍ଗୁଲିଙ୍କୁ ଅପମାନିତ କରିବାକୁ ଚେଷ୍ଟା କରୁଛି।
ପୂର୍ବତନ ଭାରତୀୟ କ୍ରିକେଟର ରୋଜର ବିନ୍ନି ଗାଙ୍ଗୁଲିଙ୍କ ସ୍ଥାନ ନେଇପାରନ୍ତି ବୋଲି ଖବର ଶୁଣାଯାଉଛି। ୧୯୮୩ ବିଶ୍ୱକପ ବିଜେତା ଦଳର ସଦସ୍ୟ ଥିଲେ ବିନ୍ନି। ସେ ଏହି ପଦ ପାଇଁ ମଙ୍ଗଳବାର ନିଜେ ନାମାଙ୍କନ ଦାଖଲ କରିଛନ୍ତି। ଅକ୍ଟୋବର ୧୮ ରେ ଅନୁଷ୍ଠିତ ହେବାକୁ ଥିବା ବୋର୍ଡର ବାର୍ଷିକ ବୈଠକରେ ସେ ବିନା ନିର୍ବାଚନରେ ନିର୍ବାଚିତ ହେବାର ସମ୍ଭାବନା ରହିଛି।
ବିସିସିଆଇ ଅଧ୍ୟକ୍ଷ ପଦ ଦୌଡ଼ରୁ ଗାଙ୍ଗୁଲିଙ୍କ ନାମ ବାଦ ପଡ଼ିବା ଖବର ଆସିବା ମାତ୍ରେ ଟିଏମସି ଭାଜପା ଉପରେ ଆକ୍ରମଣ ଆରମ୍ଭ କରିଥିଲା। ସେନ ଟୁଇଟ କରି କହିଥିଲେ ଏହା ଭାଜପାର ରାଜନୈ ତିକ ୍ରପତିଶୋଧର ଆଉ ଏକ ଉଦାହରଣ। ଅମିତ ଶାହାଙ୍କ ପୁଅ ସଚିବ ଭାବରେ କାର୍ଯ୍ୟ ଜାରି ରଖିଥିଲେ, କିନ୍ତୁ ଗାଙ୍ଗୁଲି ନୁହଁନ୍ତି। ସେ ମମତା ବାନାର୍ଜୀ ରାଜ୍ୟରୁ ଆସିଛନ୍ତି ଏବଂ ସେ ଭାଜପାରେ ଯୋଗ ଦେଇ ନାହାଁନ୍ତି? ଦାଦା ଆମେ ତୁମ ସହିତ ଅଛୁ ।
ଗାଙ୍ଗୁଲି କ୍ରିକେଟ କିମ୍ବଦନ୍ତୀ ଏବଂ ବିସିସିଆଇର ନିଷ୍ପତ୍ତିର ରାଜନୀତି ସହ କୌଣସି ସମ୍ପର୍କ ନାହିଁ ବୋଲି ଭାଜପା ସମସ୍ତ ଅଭିଯୋଗକୁ ଅସ୍ବୀକାର କରିଛି। ଭାଜପାର ବରିଷ୍ଠ ନେତା ରାହୁଲ ସିହ୍ନା କହିଛନ୍ତି ଯେ ଏହା କ୍ରିକେଟ ଜଗତ ସହ ଜଡିତ ଏବଂ କେବଳ କ୍ରିକେଟ ସହ ଜଡିତ ଲୋକମାନେ ଏହା ଉପରେ ମନ୍ତବ୍ୟ ଦେଇ ପାରିବେ। ରାଜନୀତି ସହିତ ଏହାର କୌଣସି ସମ୍ପର୍କ ନାହିଁ। ଟିଏମସି ଭାଜପା ଉପରେ ଆକ୍ରମଣ କରିବାକୁ କୌଣସି ପ୍ରସଙ୍ଗ ଖୋଜି ପାଇଲା ନାହିଁ ତେଣୁ ଏହାର ରାଜନୀତିକରଣ କରୁଛି।
ଭାଜପା ରାଷ୍ଟ୍ରୀୟ ଉପାଧ୍ୟକ୍ଷ ଦିଲୀପ ଘୋଷ କହିଛନ୍ତି, ଭାଜପା କେବେ ଗାଙ୍ଗୁଲିଙ୍କୁ ଦଳରେ ସାମିଲ କରିବାକୁ ଚେଷ୍ଟା କଲା ଆମେ ତାହା ଜାଣିନାହୁଁ। ବିସିସିଆଇର ପରିବର୍ତ୍ତନକୁ ନେଇ କିଛି ଲୋକ କୁମ୍ଭୀର କାନ୍ଦଣା କାନ୍ଦୁଛନ୍ତି।
ରାଜନୀତିଠାରୁ ଦୂରରେ ରହିଥିବା ପୂର୍ବତନ କ୍ରିକେଟର ଗାଙ୍ଗୁଲିଙ୍କୁ ସେପ୍ଟେମ୍ବର ୧ରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ଗୋଟିଏ ମଞ୍ଚରେ ଥିବାର ନଜର ଆସିଥିଲେ। ସେହି ସମୟରେ ସେ ଏକ ସରକାରୀ କାର୍ଯ୍ୟକ୍ରମରେ ଯୋଗ ଦେଇଥିଲେ। ବିଶେଷ କଥା ହେଉଛି ଶାହଙ୍କ ପୁଅ ଜୟ ପୁଣି ବୋର୍ଡ ସଚିବ ଭାବରେ ଫେରିବା କାରଣରୁ ରାଜନୈତିକ ଆରୋପ ପ୍ରତ୍ୟାରୋପ ତୀବ୍ର ହୋଇଛି।
