ନୂଆଦିଲ୍ଲୀ, ୧।୭ : କଂଗ୍ରେସର ସାଧାରଣ ସମ୍ପାଦକ ତଥା ରାଜ୍ୟସଭା ଏମ୍ପି ଜୟରାମ ରମେଶ ଭାଜପାକୁ ଟାର୍ଗେଟ କରିଛନ୍ତି। ମହାରାଷ୍ଟ୍ରରେ ଭାଜପା ଅଯଥାରେ କ୍ଷମତା ଦଖଲ କରିଥିବା ସେ ଅଭିଯୋଗ କରିଛନ୍ତି। ସେ କହିଛନ୍ତି ଯେ ରାଜ୍ୟରେ ଗଣତାନ୍ତ୍ରିକ ଉପାୟରେ ନିର୍ବାଚିତ ସରକାରକୁ ଭାଜପା ଅସ୍ଥିର କରିଛି।
କଂଗ୍ରେସ ନେତା ଅଭିଯୋଗ କରିଛନ୍ତି ଯେ ଅର୍ଥ ଏବଂ ବାହୁବଳର ପ୍ରଦର୍ଶନ ସହିତ ଭାଜପା ରାଜ୍ୟ ସରକାରଙ୍କୁ ଦଖଲ କରିଛି। ସିଧାସଳଖ କିମ୍ବା ରିମୋଟ କଣ୍ଟ୍ରୋଲ ଦ୍ୱାରା ଯେକୌଣସି ମୂଲ୍ୟରେ କ୍ଷମତା ହାସଲ କରିବାକୁ ଭାଜପା ଚାହୁଁଛି ବୋଲି ସେ ଅଭିଯୋଗ କରିଛନ୍ତି। ମହାରାଷ୍ଟ୍ରରେ ଯାହା ଘଟିଛି ତାହା ଭାରତୀୟ ଗଣତନ୍ତ୍ର ପାଇଁ ଲଜ୍ଜାଜନକ।
ରମେଶ କହିଛନ୍ତି ଯେ ୨୦୧୪ ପରଠାରୁ ଜନତାଙ୍କ ସେବା କରିବା ପରିବର୍ତ୍ତେ ରାଜ୍ୟରେ ନିର୍ବାଚିତ ସରକାରଗୁଡିକୁ ଭାଙ୍ଗିବା ଉପରେ ଭାଜପାର ମୁଖ୍ୟ ଲକ୍ଷ୍ୟ ରହୁଛି। ସେ ଅଭିଯୋଗ କରିଛନ୍ତି ଯେ ଗଭର୍ନର, ସ୍ପିକର ଏବଂ ଏନଫୋର୍ସମେଣ୍ଟ ଡାଇରେକ୍ଟୋରେଟ ଏବଂ ସେଣ୍ଟ୍ରାଲ ବ୍ୟୁରୋ ଅଫ ଇନଭେଷ୍ଟିଗେଶନ ଭଳି ଏଜେନ୍ସିଗୁଡିକର ଖୋଲାଖୋଲି ଭାବେ ଅପବ୍ୟବହାର କରାଯାଉଛି। ସେ କହିଛନ୍ତି ଯେ ବିଧାୟକ କିଣିବା ଏବେ ସାଧାରଣ କଥା ପାଲଟିଛି। ଏନେଇ ନେ ଅର୍ଥମନ୍ତ୍ରୀ ଘୋଡା କାରବାର ଉପରେ ଜିଏସଟି ଲାଗୁ କରିବାକୁ ପରାମର୍ଶ ଦେଇଛନ୍ତି।
ନିର୍ବାଚନ ଜିତିବା ପାଇଁ ଭାଜପା ଅର୍ଥ କ୍ଷମତାର ଅପବ୍ୟବହାରଠାରୁ ଧ୍ରୁବୀକରଣ ଏବଂ ହିଂସାକାଣ୍ଡ ଆଦି ଭିଆଉଥିବା ସେ ଅଭିଯୋଗ କରିଛନ୍ତି। ଏହି ସମସ୍ତର ପ୍ରୟୋଗ କରିବା ସତ୍ତ୍ୱେ ଯଦି ଭୋଟରମାନେ ଭାଜପାକୁ ପ୍ରତ୍ୟାଖ୍ୟାନ କରୁଛନ୍ତି, ତେବେ ନିର୍ବାଚିତ ସରକାରଙ୍କୁ ହଟାଇବାକୁ ଭାଜପା ଷଡଯନ୍ତ୍ର ଆରମ୍ଭ କରୁଛି।
ଉତ୍ତରାଖଣ୍ଡ ଏବଂ ଅରୁଣାଚଳ ପ୍ରଦେଶ ବିଷୟରେ ଉଲ୍ଲେଖ କରି ପୂର୍ବତନ କେନ୍ଦ୍ର ମନ୍ତ୍ରୀ କହିଛନ୍ତି ଯେ ୨୦୧୬ରେ ମଧ୍ୟ ଭାଜପା ଉତ୍ତରାଖଣ୍ଡରେ କଂଗ୍ରେସ ସରକାରଙ୍କୁ ଭାଙ୍ଗିଥିଲା। ସେହି ବର୍ଷ ଅରୁଣାଚଳ ପ୍ରଦେଶରେ ମଧ୍ୟ ସମାନ ଘଟଣା ଘଟିଥିଲା।
ମଣିପୁରରେ ୨୦୧୭ ବିଧାନସଭା ନିର୍ବାଚନରେ କଂଗ୍ରେସ ଦଳ ୬୦ଟି ସିଟ ମଧ୍ୟରୁ ୨୮ ଟି ଜିତି ଏକକ ବୃହତ୍ତମ ଦଳ ହୋଇପାରିଥିଲା। ଭାଜପା ପାଖରେ ୨୧ ଆସନ ଥିଲା। କିନ୍ତୁ ରାଜ୍ୟପାଳ ଏହାର ସଂଖ୍ୟାଗରିଷ୍ଠତା ପ୍ରମାଣ କରିବାକୁ କଂଗ୍ରେସକୁ ସୁଯୋଗ ଦେଇ ନଥିଲେ।
ସମାନ ରଣନୀତି ୨୦୧୭ ରେ ବିହାରରେ କରାଯାଇଥିଲା ବୋଲି ରମେଶ ଅଭିଯୋଗ କରିଛନ୍ତି। ୨୦୧୯ରେ କର୍ନାଟକରେ କଂଗ୍ରେସ-ଜେଡିଏସ ସରକାର ମଧ୍ୟ ଏଭଳି ହଟାଯାଇଥିଲା। ୨୦୨୧ରେ ପୁଡୁଚେରୀରେ ମଧ୍ୟ ସମାନ କାହାଣୀ ପୁନରାବୃତ୍ତି କରାଯାଇଥିବା ସେ ଅଭିଯୋଗ କରିଛନ୍ତି।
