ନୂଆଦିଲ୍ଲୀ, ୧୨।୯ : ଭାରତ ଯୋଡ ଯାତ୍ରା ସମ୍ପର୍କରେ ଭାଜପାର ଅଭିଯୋଗ ଉପରେ କଂଗ୍ରେସ ପକ୍ଷରୁ କଡ଼ା ଜବାବ ଦିଆଯାଇଛି। କଂଗ୍ରେସର ବରିଷ୍ଠ ନେତା ଜୟରାମ ରମେଶ ଭାଜପା ଉଦ୍ଦେଶ୍ୟରେ କହିଛନ୍ତି ଯେ. ଆମେ ଟି-ଶର୍ଟ ଏବଂ ଅନ୍ତର୍ବସ୍ତ୍ର ବିଷୟରେ କଥାବାର୍ତ୍ତା କରୁନାହୁଁ।
ଏକ ଗଣମାଧ୍ୟମ ସମ୍ମିଳନୀକୁ ସମ୍ବୋଧିତ କରି ରମେଶ କହିଛନ୍ତି ଯେ ଯଦି ସେମାନେ କଣ୍ଟେନର, ଜୋତା ଏବଂ ଟି-ଶର୍ଟ ପ୍ରସଙ୍ଗ ଉଠାଉଛନ୍ତି। ତେବେ ମୁଁ କହିବାକୁ ଚାହେଁ ଯେ ଏହା ଭାଜପାର ଭୟକୁ ଦର୍ଶାଉଛି। ସେମାନେ ଭୟଭୀତ ହୋଇ ଏଭଳି କହୁଛନ୍ତି। ସେ କହିଛନ୍ତି, ସୋସିଆଲ ମିଡିଆରେ ଭାଜପା ମିଥ୍ୟା କାରଖାନା ଚଳାଉଛି। ତେଣୁ ଭାଜପା ନେତାଙ୍କ ମିଥ୍ୟା ଏବଂ ଭିତ୍ତିହୀନ ବିବୃତ୍ତି ବାହାରକୁ ଆସୁଛି। ଏହା ସ୍ପଷ୍ଟ ହୋଇଛି ଯେ ଭାଜପା ଚିନ୍ତାରେ ଅଛି। ଏହା ଦର୍ଶାଉଛି ଯେ ଭାରତ ଯୋଡ ଯାତ୍ରାକୁ ଜନସାଧାରଣଙ୍କ ସମର୍ଥନ ମିଳୁଛି।
ଜୟରାମ ରମେଶ ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ କରି କହିଛନ୍ତି ମନ କି ବାତ ଭାରତ ଯୋଡ ଯାତ୍ରାରେ ହୁଏ ନାହିଁ। ଭାରତ ଯୋଡ ଯାତ୍ରାରେ ଜନସାଧାରଣଙ୍କ ପାଇଁ ଚିନ୍ତା କରାଯାଇଥାଏ। ମୁଁ କେବେ ଭାବି ନଥିଲି ଯେ ଏହା ଲୋକଙ୍କ ପାଇଁ ଚିନ୍ତା ସହିତ ଭାଜପା ପାଇଁ ଚିନ୍ତା ହେବ। ପାଞ୍ଚ ଦିନ ମଧ୍ୟରେ ତାମିଲନାଡୁ ଏବଂ କେରଳରେ ଆମ ସଂଗଠନରେ ଉତ୍ସାହ ଦେଖାଦେଇଛି। ପ୍ରତ୍ୟେକ ଦଳର କର୍ମୀଙ୍କ ମନୋବଳ ବୃଦ୍ଧି ପାଇଛି, ଏହା ମଧ୍ୟ ଭାରତ ଯୋଡ଼ର ଅନ୍ୟତମ ଉଦ୍ଦେଶ୍ୟ ଥିଲା।
