ନୂଆଦିଲ୍ଲୀ,୧୦ା୮(ପି.ଟି.): ଭାଜପାର ରାଜନୀତି ମଣିପୁରରେ ଭାରତ ମାତାକୁ ହତ୍ୟା କରିଛି ବୋଲି ବୁଧବାର କଂଗ୍ରେସ ନେତା ରାହୁଲ ଗାନ୍ଧୀ ଅଭିଯୋଗ ଆଣିଛନ୍ତି। ଏଥିସହ ଶାସକ ଦଳର ସଦସ୍ୟମାନଙ୍କୁ ସେ ବିଶ୍ୱାସଘାତକ ଭାବେ ଅଭିହିତ କରି ଏହି ଉତ୍ତର-ପୂର୍ବ ରାଜ୍ୟରେ ହିଂସା ରୋକିବାରେ ବିଫଳ ହୋଇଥିବା ମୋଦି ସରକାରଙ୍କୁ କଡ଼ା ସମାଲୋଚନା କରିଛନ୍ତି।
୨୬ ବିରୋଧୀ ଦଳକୁ ନେଇ ଗଠିତ ଇଣ୍ଡିଆନ୍ ନ୍ୟାଶନାଲ ଡେଭେଲପ୍ମେଣ୍ଟାଲ ଇନ୍କ୍ଲୁସିଭ୍ ଆଲାଏନ୍ସ (ଇଣ୍ଡିଆ) ପକ୍ଷରୁ ଲୋକ ସଭାରେ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ସରକାର ବିରୋଧରେ ଆଗତ ଅନାସ୍ଥା ପ୍ରସ୍ତାବ ଉପରେ ବିତର୍କର ଦ୍ୱିତୀୟ ଦିନ ରାହୁଲ ନିଜ ବକ୍ତବ୍ୟ ରଖିଛନ୍ତି। ସଦସ୍ୟତା ଫେରିପାଇବା ପରେ ରାହୁଲ ପ୍ରଥମ ଥର ପାଇଁ ଗୃହରେ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଣିପୁର ଯାଉନାହାନ୍ତି। କାରଣ ସେ ଏହି ରାଜ୍ୟକୁ ଭାରତଠାରୁ ଭିନ୍ନ ଏକ ଅଂଶ ବୋଲି ବିବେଚନା କରୁଛନ୍ତି।
ରାବଣ ଯେମିତି କେବଳ ମେଘନାଦ ଓ କୁମ୍ଭକର୍ଣ୍ଣଙ୍କ କଥା ଶୁଣୁଥିଲେ, ଠିକ୍ ସେହିପରି ପ୍ରଧାନମନ୍ତ୍ରୀ କେବଳ ଦୁଇଜଣଙ୍କ କଥା ଶୁଣନ୍ତି। ସେମାନେ ହେଲେ ଅମିତ୍ ଶାହା ଓ ଗୌତମ ଆଦାନୀ। ଏହି ଅବସରରେ ରାହୁଲ ମୋଦି ଓ ଆଦାନୀ ଏକ ବିମାନରେ ଏକାଠି ବସିଥିବାର ଫଟୋ ଥିବା ପୋଷ୍ଟର ଦେଖାଇ କହିଥିଲେ, ପ୍ରଧାନମନ୍ତ୍ରୀ ଭାରତର ସ୍ବରକୁ ଶୁଣନ୍ତି ନାହିଁ। ଆଦାନୀ ଗ୍ରୁପ୍ ଯାହା କହିଥାଏ ତାହା ଶୁଣିଥାନ୍ତି। ରାହୁଲ ଏହି ପୋଷ୍ଟର ଦେଖାଇବାବେଳେ ଶାସକ ଦଳର ସଦସ୍ୟମାନେ ଆପତ୍ତି ଉଠାଇଥିଲେ। ବାଚସ୍ପତି ଓମ୍ ବିର୍ଲା ମଧ୍ୟ ରାହୁଲଙ୍କୁ ସଂଯମ ହେବାକୁ ପରାମର୍ଶ ଦେଇଥିଲେ।
ପୂର୍ବତନ କଂଗ୍ରେସ ଅଧ୍ୟକ୍ଷ ଆହୁରି କହିଥିଲେ, ଲଙ୍କାକୁ ହନୁମାନ ଧ୍ୱଂସ କରି ନ ଥିଲେ, ବରଂ ରାବଣର ଅହଂକାର ସବୁକିଛି ଛାରଖାର କରିଦେଇଥିଲା। କିଛିଦିନ ତଳେ ମୁଁ ମଣିପୁର ଯାଇଥିଲି। ଆମ ପ୍ରଧାନମନ୍ତ୍ରୀ ଏଯାଏ ସେଠାକୁ ଯାଇନାହାନ୍ତି। ସେ ମଣିପୁରକୁ ଭାରତର ଅଂଶ ବୋଲି ବିବେଚନା କରନ୍ତି ନହିଁ। ମୁଁ ମଣିପୁର ଶବ୍ଦ ବ୍ୟବହାର କରିଛି, କିନ୍ତୁ ବାସ୍ତବତା ହେଉଛି ସେଠାରେ ଆଉ କୌଣସି ମଣିପୁର ନାହିଁ। ମୋଦି ମଣିପୁରକୁ ଦୁଇଭାଗରେ ବିଭାଜିତ କରିଦେଇଛନ୍ତି। ମଣିପୁରରେ ଭାଜପା ହିନ୍ଦୁସ୍ତାନକୁ ହତ୍ୟା କରିଛି। ସେମାନଙ୍କ ରାଜନୀତି ମଣିପୁରକୁ ହତ୍ୟା କରିନାହିଁ, ମଣିପୁରରେ ହିନ୍ଦୁସ୍ତାନକୁ ହତ୍ୟା କରିଛି। ଭାରତ ହେଉଛି ଲୋକଙ୍କ ସ୍ବର। ମଣିପୁରକୁ ହତ୍ୟା କରିବାର ତାତ୍ପର୍ଯ୍ୟ ହେଉଛି ମଣିପୁରରେ ଭାରତ ମାତାକୁ ହତ୍ୟା କରିବା।
ମଣିପୁରବାସୀଙ୍କୁ ହତ୍ୟା କରି ଭାଜପା ଦେଶଭକ୍ତ ପାଲଟିନାହିଁ, ବରଂ ଦେଶଦ୍ରୋହୀ ସାଜିଛି ବୋଲି ରାହୁଲ ସମାଲୋଚନା କରିଛନ୍ତି। ଏହାର ଜବାବରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା କହିଛନ୍ତି, ମୋଦି ସରକାରଙ୍କ ବିରୋଧରେ ଅଣାଯାଇଥିବା ଅନାସ୍ଥା ପ୍ରସ୍ତାବ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ହୋଇଥିବାରୁ ମଣିପୁରରେ ସରକାରଙ୍କ ସଫଳତା ଉପରେ ଫୋକସ୍ କରିବାକୁ ପଡ଼ିବ। ଲୋକଙ୍କୁ ବିଭ୍ରାନ୍ତ କରିବା ପାଇଁ ଏହି ପ୍ରସ୍ତାବ ଆଗତ କରାଯାଇଛି। ୩୦ ବର୍ଷ ଧରି ଦେଶ ବଂଶବାଦ ରାଜନୀତି, ଦୁର୍ନୀତି ଓ ଜାତିବାଦର ଯନ୍ତ୍ରଣାରେ ଜର୍ଜରିତ ଥିବାବେଳେ ପ୍ରଧାନମନ୍ତ୍ରୀ ମୋଦି ଏହାକୁ ଶେଷ କରି ଦେଶକୁ ପ୍ରଦର୍ଶନର ରାଜନୀତି ପାଇଁ ବାଟ ଦେଖାଇଛନ୍ତି।
