ନୂଆଦିଲ୍ଲୀ, ୭।୫ : ଆମ୍ ଆଦ୍ମୀ ପାର୍ଟି ପକ୍ଷରୁ ଭାଜପା ସରକାରଙ୍କ ଟାର୍ଗେଟ କରାଯାଇଛି। ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ ଶନିବାର କହିଛନ୍ତି ଯେ, ଭାଜପା ସରକାର ଅପରାଧିଙ୍କୁ ସୁରକ୍ଷା ଦେଉଛନ୍ତି। ପଞ୍ଜାବ ହିଂସାକାଣ୍ଡରେ ଭାଜପା ଏଭଳି କରିଥିବା ସିସୋଦିଆ ଅଭିଯୋଗ କରିଛନ୍ତି। ନିକଟରେ ପଞ୍ଜାବର ପୋଲିସ ଦ୍ୱାରା ଭାଜପାର ଦିଲ୍ଲୀ ୟୁନିଟ ନେତା ତାଜିନ୍ଦରପାଲ ବାଗାଙ୍କୁ ତାଙ୍କ ଘରୁ ଗିରଫ କରାଯାଇଥିଲା। ତାଙ୍କୁ ପଞ୍ଜାବ ଅଣାଯିବା ସମୟରେ ହରିୟାଣାରେ ଅଟକାଇ ରଖାଯାଇଥିଲା।
ପରେ ଅଧଘଣ୍ଟାପରେ ପୁଣି ଦିଲ୍ଲୀ ଅଣାଯାଇଥିଲା। ଏହି ଘଟଣାକୁ ନେଇ ରାଜନୈତିକ ଆରୋପ ପ୍ରତ୍ୟାରୋପ ଜାରି ରହିଛି।
ପଞ୍ଜାବ ପୋଲିସ ଭାଜପା ନେତାଙ୍କୁ ଅପହରଣ କରିଥିବା ଅଭିଯୋଗ ହୋଇଛି। ବାଗା ଅରବିନ୍ଦ କେଜ୍ରିୱାଲଙ୍କର ଜଣେ ମୁଖ୍ୟ ବିରୋଧୀ। ସମାଲୋଚନା କରିଛନ୍ତି ଯେ ଏଏପି ମୁଖ୍ୟ ରାଜ୍ୟ ପୋଲିସ ମାଧ୍ୟମରେ ପ୍ରତିଶୋଧ ରାଜନୀତି କରୁଛନ୍ତି। ପଞ୍ଜାବରେ ସାମ୍ପ୍ରଦାୟିକ ଉତ୍ତେଜନା ସୃଷ୍ଟି କରିଥିବାରୁ ବାଗାଙ୍କୁ ଗିରଫ କରାଯାଇଥିବା ଏଏପି ପକ୍ଷରୁ କୁହାଯାଇଛି। ଏଥି ସହ ବାଗାଙ୍କ ପିତା ପ୍ରୀତପାଲ ସିଂ ତାଙ୍କ ପୁଅକୁ ଅପହରଣ କରାଯାଇଥିବା ଏକ ମାମଲା ଦିଲ୍ଲୀ ପୋଲିସଠାରେ ରୁଜୁ କରିଛନ୍ତି।
ଏହାର ଗୋଟିଏ ଦିନ ପରେ ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଟୁଇଟ କରି କହିଛନ୍ତି ଯେ ପଞ୍ଜାବର ଭାଇଚାରା ବିରୁଦ୍ଧରେ କହିଥିବା ଏବଂ ହିଂସାସୃଷ୍ଟି କରୁଥିବା ଜଣେ ଅପରାଧିଙ୍କୁ ସୁରକ୍ଷା ଦେବାକୁ ଭାଜପା ସରକାର ଉଦ୍ୟମ କରୁଛନ୍ତି। ଭାଜପା ଅପରାଧିଙ୍କ ଏକ ଦଳ ବୋଲି ସିସୋଦିଆ କହିଛନ୍ତି। ଭାଜପା କେବେ ମଧ୍ୟ ଶିକ୍ଷା, ସ୍ବାସ୍ଥ୍ୟ, ଦରଦାମ୍ ବୃଦ୍ଧି ଏବଂ ବେକାରୀ ବିଷୟରେ କୌଣସି ଆଲୋଚନା ନ କରି କେବଳ ବାଗାଙ୍କର ସୁରକ୍ଷା ପାଇଁ ଉଦ୍ୟମ କରୁଛି। ଶନିବାର ଦିଲ୍ଲୀ ପୋଲିସ କହିଛି ଯେ ବାଗାଙ୍କ ସୁରକ୍ଷା ପାଇଁ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଭାଜପା ନେତା ତାଙ୍କ ସୁରକ୍ଷାକୁ ନେଇ ଚିନ୍ତା ପ୍ରକଟ କରିବା ପରେ ଦିଲ୍ଲୀ ପୋଲିସ ଏହି ପଦକ୍ଷେପ ନେଇଛି।
ବରିଷ୍ଠ ଅଧିକାରୀ କହିଛନ୍ତି, ବାଗା ତାଙ୍କ ସୁରକ୍ଷାକୁ ନେଇ ଆଶଙ୍କା ପ୍ରକାଶ କରିଛନ୍ତି। ଆମେ ଆବଶ୍ୟକ ସୁରକ୍ଷା ବ୍ୟବସ୍ଥା ଯୋଗାଇ ଦେବାର ପ୍ରୟାସ କରୁଛୁ।
