ରାଏବରେଲି,୨୨।୨: ଭାଜପା ନେତୃତ୍ୱାଧୀନ ସରକାର ଲୋକଙ୍କ ମଧ୍ୟରେ ବିଭେଦର ମଞ୍ଜି ବୁଣିବା ବ୍ୟତୀତ ଅନ୍ୟ କିଛି କରୁନାହିଁ ବୋଲି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ସୋମବାର କହିଛନ୍ତି। ରାଏବରେଲିରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବାକୁ ଯାଇଥିବା ସୋନିଆ କହିଥିଲେ, ଭାଜପା ତାଙ୍କ ନିର୍ବାଚନ ମଣ୍ଡଳୀ ପ୍ରତି ବୈମାତୃକ ମନୋଭାବ ପୋଷଣ କରୁଛି। କୋଭିଡ୍ ମହାମାରୀ ପରିଚାଳନାରେ ବିଫଳତା ପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଦାୟୀ କରିଛନ୍ତି। ଗତ ୫ ବର୍ଷ ହେଲା ଭାଜପା ସରକାର ଲୋକଙ୍କ ମଧ୍ୟରେ ବିଭାଜନ କରିବା ବ୍ୟତୀତ ଅନ୍ୟ କିଛି କରିନାହିଁ। ଏଥର ନିର୍ବାଚନ ଖୁବ୍ ଗୁରୁତ୍ୱପୂର୍ଣ୍ଣ ହେବାକୁ ଯାଉଛି ବୋଲି ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାରର ଶେଷ ଦିନରେ ସୋନିଆ କହିଛନ୍ତି। ଆସନ୍ତା ୨୩ରେ ରାଏବରେଲିରେ ମତଦାନ ହେବାକୁ ଯାଉଛି।
୨୦୦୪ରୁ ରାଏବରେଲିରୁ ଏମ୍ପି ରହିଆସିଥିବା ସୋନିଆ କହିଥିଲେ, ମହାମାରୀ ସମୟରେ ଯୋଗୀ ସରକାର ଜନସାଧାରଣଙ୍କ ଦୁର୍ଦ୍ଦଶା ପ୍ରତି ଆଖିବୁଜି ଦେଇଥିଲେ। ଚାଷୀଙ୍କ ଦୁର୍ଦ୍ଦଶା ଏବଂ ତୈଳ ଦର ବୃଦ୍ଧି ତଥା ମୁଦ୍ରାସ୍ଫୀତିକୁ ନେଇ ସେ ସମାଲୋଚନା କରିଥିଲେ। ଶିକ୍ଷିତ ଯୁବକ ଚାକିରି ପାଇଁ ପ୍ରସ୍ତୁତ ହେଉଛନ୍ତି। କିନ୍ତୁ ଭାଜପା ସରକାର ସେମାନଙ୍କୁ ଘରେ ବସିବାକୁ ବାଧ୍ୟ କରୁଛି। ଅନୂ୍ୟନ ୧୨ ଲକ୍ଷ ସରକାରୀ ପଦବୀ ଖାଲି ପଡ଼ିଛି, ହେଲେ ଯୁବତୀଯୁବକଙ୍କୁ ନିଯୁକ୍ତି ଦିଆଯାଉ ନାହିଁ କହି ସୋନିଆ ଭାଜପା ସରକାରକୁ ସମାଲୋଚନା କରିଥିଲେ।
