ଧାମନଗର, ୧୪ା୨ (ଡି.ଏନ.ଏ) ପଞ୍ଚାୟତ ନିର୍ବାଚନ ପାଇଁ ଭଦ୍ରକ ଜିଲା ଧାମନଗର ନିର୍ବାଚନମଣ୍ଡଳୀର ୪ ଜିଲା ପରିଷଦ ଜୋନ୍ରେ ଭାଜପା ଓ ବିଜେଡି ମଧ୍ୟରେ ଚାଲିଛି ଜୋର୍ଦାର ଟକ୍କର। ସେଥିମଧ୍ୟରୁ ୧୧ ନଂ. ଦୋବଲ ଜିଲା ପରିଷଦ ଜୋନ୍ ଫୋକ୍ସରେ ରହିଛି। ବିଗତ ପଞ୍ଚାୟତ ନିର୍ବାଚନରେ ଏହି ଜୋନ୍ରୁ ଭାଜପା ପ୍ରାର୍ଥୀ ଲଗାତାର ବିଜୟୀ ହୋଇ ଗଡ଼ ସୃଷ୍ଟି କରିଥିବା ବେଳେ ଦଳ ବିଜୟଧାରା ବଜାୟ ରଖିବା ପାଇଁ କସରତ ଜାରି ରଖିଛି। ଭାଜପା ପ୍ରାର୍ଥୀ ଭାବେ ପୁଷ୍ପାଞ୍ଜଳି ସାମଲ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସେ ରାଜନୀତିରେ ପ୍ରଥମ କରି ପାଦ ଥାପିଥିଲେ ମଧ୍ୟ ତାଙ୍କ ସ୍ବାମୀ ସୁବ୍ରତ ଖଡ଼ିପଦା ପଞ୍ଚାୟତର ସମିତିସଭ୍ୟ ଥିଲେ। ସେ ଜଣେ ଉଦୀୟମାନ ଯୁବକ ଓ ସଙ୍ଗଠକ ଭାବେ ବେଶ୍ ପରିଚିତ। ବ୍ୟାବସାୟିକ ପରିବାର ହୋଇଥିବାରୁ ପ୍ରତି ପଞ୍ଚାୟତରେ କିଛି ସମର୍ଥକ ମଧ୍ୟ ରହିଛନ୍ତି। ତେବେ ସ୍ବଚ୍ଛ ଭାବମୂର୍ତ୍ତି ସହ କେନ୍ଦ୍ର ସରକାରଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନାକୁ ପାଥେୟ କରି ନିର୍ବାଚନ ବୈତରଣୀ ପାର ହେବା ପାଇଁ ପୁଷ୍ପାଞ୍ଜଳି ଆଶା ବାନ୍ଧିଛନ୍ତି।
ଅପରପକ୍ଷେ ତାଙ୍କୁ କଡ଼ା ଟକ୍କର ଦେବାକୁ ପୂର୍ବତନ ସମିତିସଭ୍ୟ ପ୍ରତାପ ସାମଲଙ୍କ ସ୍ତ୍ରୀ ତଥା ପୂର୍ବତନ ବ୍ଲକ ଉପାଧ୍ୟକ୍ଷ ଉର୍ମିଳା ବିଶ୍ୱାଳଙ୍କୁ ବିଜେଡି ପ୍ରାର୍ଥୀ କରିଛି। ପ୍ରତାପ ଦଳର ଜଣେ ଆଗଧାଡ଼ିର ନେତା। ରାଜନୀତିରେ ଗୋଟି ଚାଳନାରେ ସେ ବେଶ୍ ଧୁରନ୍ଧର। ପ୍ରତାପଙ୍କ ଦବ୍ଦବା ଅଧିକାଂଶ ପଞ୍ଚାୟତରେ ମଧ୍ୟ ରହିଛି। ସେହିପରି କଂଗ୍ରେସ ଏହି ଜୋନ୍ରୁ ବାସନ୍ତୀଲତା ବେହେରାଙ୍କୁ ପ୍ରାର୍ଥୀ କରିଛି। ଦଳର ଦୁର୍ବଳ ନେତୃତ୍ୱ ଯୋଗୁ ପ୍ରଚାରରେ ବହୁ ପଛରେ ରହିଥିବା ବେଳେ ବିଜେଡି ଏଠାରୁ ବିଜୟୀ ହୋଇ ଭାଜପାର ପରମ୍ପରା ବିଜୟଧାରା ଭାଙ୍ଗିବାକୁ ଗୋଟି ଚାଳନା ଆରମ୍ଭ କରିଥିବା ଚର୍ଚ୍ଚା ହେଉଛି।
ଗତ ପଞ୍ଚାୟତ ନିର୍ବାଚନରେ ମଧ୍ୟ ଏହି ଜୋନ୍ ଭଦ୍ରକ ଜିଲାରେ ବେଶ୍ ଚର୍ଚ୍ଚାରେ ଥିଲା। ୨୦୧୭ ପଞ୍ଚାୟତ ନିର୍ବାଚନରେ ବିଜେଡିରୁ ପୂର୍ବତନ ଜିଲା ପରିଷଦ ଅଧ୍ୟକ୍ଷ ତଥା ବର୍ତ୍ତମାନର ଜିଲା ସଭାପତି ଜଗନ୍ନାଥ ସ୍ବାଇଁଙ୍କୁ ବିଜେଡି ପ୍ରାର୍ଥୀ କରି ପରାଜିତ ହୋଇଥିଲା। ୧୧ ନଂ. ଦୋବଲ ଜିଲା ପରିଷଦ ଜୋନ୍ ଭାଜପାର ଗଡ଼ ଭାବେ ଥିବା ସ୍ଥିତିକୁ ବଜାୟ ରଖିବା ପାଇଁ ବିଧାୟକ ତଥା ବିରୋଧୀ ଦଳ ଉପନେତା ବିଷ୍ଣୁ ସେଠୀ ଅଣ୍ଟା ଭିଡ଼ିଥିବା ବେଳେ ବିଜେଡି ହାତେଇବା ଲାଗି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ ନିର୍ବାଚନ ମଣ୍ଡଳୀରେ ପର୍ଯ୍ୟବେକ୍ଷକ ଦାୟିତ୍ୱରେ ଥିବା ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟ କର୍ମୀମାନଙ୍କୁ ନେଇ ବିଚାର ବିମର୍ଷ କରୁଛନ୍ତି। ତେବେ ଏହି ଜୋନ୍ ଉପରେ ସମସ୍ତଙ୍କ ନଜର ରହିଛି।
