ଭୁବନେଶ୍ୱର,୨୨।୧୧(ବ୍ୟୁରୋ): ଦରବୃଦ୍ଧି ପ୍ରସଙ୍ଗ ନେଇ ଦ୍ୱିତୀୟ ଥର ଲାଗି ବିଜେଡି ରାସ୍ତାକୁ ଓହ୍ଲାଇବାକୁ ଯାଉଛି। କିଛିଦିନ ତଳେ ତେଲ ଦରବୃଦ୍ଧିକୁ ନେଇ ରାଜଭବନ ସମ୍ମୁଖରେ ବିଜେଡି କେନ୍ଦ୍ର ସରକାରଙ୍କ ଉପରେ ପ୍ରବଳ ବର୍ଷିଥିବାବେଳେ ଏବେ ରନ୍ଧନ ଗ୍ୟାସ୍ ଦରବୃଦ୍ଧି ପ୍ରତିବାଦରେ ଆନ୍ଦୋଳନ କରିବ। ପୂର୍ବ ଘୋଷଣା ମୁତାବକ ସୋମବାରଠାରୁ ୩ ଦିନ ଧରି ଆରଡିସିସ୍ତରରେ ବିଜେଡି ଆନ୍ଦୋଳନ କରିବ। ଏନେଇ ରବିବାର ଏକ ଖବରଦାତା ସମ୍ମିଳନୀରେ ଯୁବ ବିଜେଡି ସଭାପତି ବ୍ୟୋମକେଶ ରାୟ ଏବଂ ଛାତ୍ର ବିଜେଡି ସଭାପତି ତଥା ବିଧାୟକ ଦେବୀ ରଞ୍ଜନ ତ୍ରିପାଠୀ ସୂଚନା ଦେଇଛନ୍ତି। ବିଜେଡିର ସୂଚନା ଅନୁଯାୟୀ, ସୋମବାର କଟକ, ମଙ୍ଗଳବାର ସମ୍ବଲପୁର ଏବଂ ବୁଧବାର ବ୍ରହ୍ମପୁର ଆରଡିସି ଜୋନ୍ ସମ୍ମୁଖ ଏବଂ ଏହା ଅନ୍ତର୍ଗତ ବ୍ଲକ୍ଗୁଡ଼ିକରେ ଦଳ ପକ୍ଷରୁ ଆନ୍ଦୋଳନ କରାଯିବ। ଏହି ପ୍ରତିବାଦ କାର୍ଯ୍ୟକ୍ରମରେ ବିଜୁ ଯୁବ, ଛାତ୍ର ଏବଂ ମହିଳା ଜନତା ଦଳ ସାମିଲ୍ ହେବେ। କେନ୍ଦ୍ର ସରକାରଙ୍କ ଉଜ୍ଜ୍ୱଳା ଯୋଜନା ବିଫଳ ହୋଇଛି। ଦରବୃଦ୍ଧି ଯୋଗୁ ଦୁର୍ଦ୍ଦିନରେ ଗୃହିଣୀମାନେ ଦିନ କାଟୁଛନ୍ତି। ସାଢ଼େ ୩ ବର୍ଷ ମଧ୍ୟରେ ଗ୍ୟାସ୍ ଦର ୭୦ ପ୍ରତିଶତ ବଢ଼ିଛି। ଗ୍ୟାସ୍ ଦର ନ କମାଇଲେ ବିରାଟ ଜନଆନ୍ଦୋଳନ ହେବ। ସିଏଜି ମଧ୍ୟ ତାଙ୍କ ରିପୋର୍ଟରେ ଉଜ୍ଜ୍ୱଳା ଗ୍ୟାସ୍ ରିଫିଲିଂ ହାର କମି ଥିବା କହିଛନ୍ତି। ନ୍ୟାଶନାଲ ଫ୍ୟାମିଲି ହେଲଥ୍ ସର୍ଭେ ଅନୁସାରେ, ୯୮% ନୁହେଁ ମାତ୍ର ୨୦% ସିଲିଣ୍ଡର ବ୍ୟବହାର ବଢ଼ିଛି। ଉଜ୍ଜ୍ୱଳା ଯୋଜନା କରି କେନ୍ଦ୍ର ସରକାର ଗରିବ ଲୋକଙ୍କୁ ଠକିଛନ୍ତି। ଏବେ ସିଲିଣ୍ଡର ଦାମ୍ ୯ ଶହ ଟଙ୍କା ଉପରେ ରହିଛି। ବିଜେଡି ସାଧାରଣ ଜନତାଙ୍କ ସ୍ବର ହୋଇ ଆନ୍ଦୋଳନ କରିବ। ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯିବ ବୋଲି ଦଳ ପକ୍ଷରୁ ଖବରଦାତା ସମ୍ମିଳନୀରେ ସୂଚନା ଦିଆଯାଇଛି।
