ଦାରିଙ୍ଗବାଡି, ୧୮।୪ (ଅରୁଣ ସାହୁ): ଜି. ଉଦୟଗିରି ନିର୍ବାଚନ ମଣ୍ଡଳୀରେ ବିଜେଡି ଦଳର ଦିନକୁ ଦିନ ବଳ ବୃଦ୍ଧି ହେବାରେ ଲାଗିଛି। ଗତ ସପ୍ତାହରେ ଦାରିଙ୍ଗବାଡିଠାରେ ମିଶ୍ରଣ ପର୍ବର ଆୟୋଜନ ହୋଇଥିଲା ସେଥିରେ ସ୍ଥାନୀୟ ବିଧାୟକ ସାଲୁଗା ପ୍ରଧାନ ଓ କନ୍ଧମାଳ ଏମପି ଅଚ୍ୟୁତ ସାମନ୍ତଙ୍କ ଉପସ୍ଥିତିରେ ୧୩୨ ଜଣ କଂଗ୍ରେସ ଓ ଭାଜପା ଦଳ ଛାଡି ବିଜେଡିରେ ସାମିଲ ହୋଇଥିଲେ।
ପୁଣି ଗୁରୁବାର ଭୁବନେଶ୍ୱରର ଶଙ୍ଖ ଭବନରେ ଆୟୋଜିତ ମିଶ୍ରଣ ପର୍ବରେ କଂଗ୍ରେସ ଓ ଭାଜପା ଦଳର କନ୍ଧମାଳର ନେତୃବୃନ୍ଦ ବିଜେଡିରେ ସାମିଲ ହୋଇଥିବା ଜଣାପଡିଛି। ସେଥିମଧ୍ୟରେ କଂଗ୍ରେସ ଦଳର ଏମପି ପ୍ରାର୍ଥୀ ପାଇଁ ଆଶାୟୀ ଥିବା ତଥା ରାଜ୍ୟସ୍ତରୀୟ ବରିଷ୍ଠ ନେତ୍ରୀ ବିଳାସିନି ନାୟକ ବିଜେଡି ମିଶିଛନ୍ତି। କଂଗ୍ରେସରେ ଦୀର୍ଘ ବର୍ଷ କାର୍ଯ୍ୟ କରିଆସୁଥିଲେ ସୁଦ୍ଧା ଦଳ ତାଙ୍କୁ କୌଣସି ଗୁରୁତ୍ୱ ଦେଇ ନ ଥିବା ଓ ଏମପି ପ୍ରାର୍ଥୀ ପାଇଁ ଟିକେଟ ପ୍ରଦାନରେ ଟାଳଟୁଳ ନୀତି ଅବଲମ୍ବନ କରିଥିବାରୁ ସେ କଂଗ୍ରେସ ଦଳରୁ ଇସ୍ତଫା ଦେଇ ବିଜେଡିରେ ସାମିଲ ହୋଇଛନ୍ତି। ସେ ତାଙ୍କ ସମର୍ଥକଙ୍କ ସହ ସାମିଲ ହୋଇ ଆଗକୁ ବିଜେଡିକୁ ଜିତାଇବା ପାଇଁ ସେ ନିଃସ୍ବାର୍ଥପର ଭାବେ ପରିଶ୍ରମ କରିବେ ବୋଲି କହିଛନ୍ତି। ବିଳାସିନି ପ୍ରଦେଶ କଂଗ୍ରେସ କମିଟିର ରାଜ୍ୟ ସମ୍ପାଦିକା ରହିଥିବା ବେଳେ ଦଳକୁ ସଂଗଠିତ କରିବା ପାଇଁ ବୌଦ୍ଧ ଓ କନ୍ଧମାଳରେ ଅନେକ କାର୍ଯ୍ୟ କରିଥିଲେ ଓ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା କହିଛନ୍ତି। ଅଞ୍ଚଳରେ ସେ ନାରୀ ମହାସଙ୍ଘ ଗଠନ କରି ନିଶାନିବାରଣ ପାଇଁ ଅନେକ ଆନ୍ଦୋଳନ କରି ଚର୍ଚ୍ଚାରେ ରହିଛନ୍ତି। ସେ ଅଭିଯୋଗ କରି କହିଛନ୍ତି ଯେ, କଂଗ୍ରେସ ନାରୀମାନଙ୍କୁ ସମ୍ମାନ ଦେବା କଥା କହିବା ସହ ରାହୁଲ ଗାନ୍ଧୀ ନାରୀଙ୍କ ପାଇଁ ଦଳରେ ୩୩ ପ୍ରତିଶତ ସଂରକ୍ଷିତ କଥା କହୁଥିବା ବେଳେ ତାହା ପାଳନ କରାଯାଉନଥିବା ବିଳାସିନି କହିଛନ୍ତି।
ସେହିପରି ଦୀର୍ଘ ୩୫ ବର୍ଷ ଧରି କଂଗ୍ରେସ ପାଇଁ କାର୍ଯ୍ୟ କରିଥିବା ବେଳେ ୨ ଥର ସମିତିସଭ୍ୟ ଓ ଏକାଧିକ ଥର ବିଧାୟକ ପ୍ରତିନିଧି ଓ ଦଳର ବିଭିନ୍ନ ଦାୟିତ୍ୱରେ ରହି ଶେଷରେ ଦଳ ତାଙ୍କୁ ବିଧାୟକ ପ୍ରାର୍ଥୀ ପାଇଁ ଟିକେଟ ନ ଦେବାରୁ କାଳି ମଲିକ କଂଗ୍ରେସ ଛାଡି ବିଜେଡିରେ ସାମିଲ ହୋଇଥିବା କହିଛନ୍ତି। ସେ ଭୁବନେଶ୍ୱରରରୁ ଦାରିଙ୍ଗବାଡି ଫେରିବା ପରେ ଆହୁରି କଂଗ୍ରେସ କର୍ମୀ ଦଳ ଛାଡି ତାଙ୍କ ସହ ସାମିଲ ହେବେ ବୋଲି କହିଛନ୍ତି। ରାଜ୍ୟର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ରାଜ୍ୟ ପ୍ରତି ରହିଥିବା ବିକାଶ ଧାରା ଓ ସ୍ଥାନୀୟ ବିଧାୟକ ସାଲୁଗା ପ୍ରଧାନଙ୍କ ଅଞ୍ଚଳ ପ୍ରତି ବିକାଶଞ୍କୁ ଆଗକୁ ନେଉଥିବାରୁ ଆମେ ମଧ୍ୟ ତାଙ୍କ ସହ ସାମିଲ ହୋଇ ତାଙ୍କ ହାତମୁଠାକୁ ଟାଣ କରୁଛୁ ବୋଲି କହିଛନ୍ତି। ଦାରିଙ୍ଗବାଡି ଅଞ୍ଚଳର ରଞ୍ଜିତ ପ୍ରଧାନ, ପ୍ରଶାନ୍ତ ପ୍ରଧାନ,ବୁଲୁ ନାୟକ, ଲୁସିମା ପ୍ରଧାନ,ସଙ୍ଗୀତା ପ୍ରଧାନ ଙ୍କ ସମେତ ବହୁ କର୍ମୀ ବିଜେଡିରେ ସାମିଲ ହୋଇଛନ୍ତି। ଭୁବନେଶ୍ୱର ଶଙ୍ଖ ଭବନରେ ମିଶ୍ରଣ ପର୍ବ ଆୟୋଜନ କରାଯାଇଥିବା ବେଳେ ଦଳର ବରିଷ୍ଠ ନେତା ସସ୍ମିତ ପାତ୍ରଙ୍କ ସମେତ କନ୍ଧମାଳ ଏମପି ଅଚ୍ୟୁତ ସାମନ୍ତ, ଜିଲା ପର୍ଯ୍ୟବେକ୍ଷକ ବିଜୟ ନାୟକ ପ୍ରମୁଖ ଉପସ୍ଥିତ ରହି ସ୍ବାଗତ କରିଥିଲେ।
