ଭୁବନେଶ୍ୱର, ୨୪।୯(ସୁନିତ୍ ମିଶ୍ର): ବିଧାନସଭାରେ ବିଜେଡି ବିଭିନ୍ନ ପ୍ରସଙ୍ଗ ଉଠାଇ ବାରମ୍ବାର ପ୍ରତିବାଦ କରୁଛି। ସେଥିଲାଗି ଅନେକ ବିଷୟରେ ଆଲୋଚନା କରିବାରେ ବିରୋଧୀ ଦଳର ସଦସ୍ୟମାନେ ସକ୍ଷମ ହୋଇପାରୁ ନାହାନ୍ତି। ଏହାକୁ ନେଇ ବିଧାୟକ ଦଳ ଭିତରେ ଦ୍ୱନ୍ଦ୍ୱ ଆରମ୍ଭ ହୋଇଯାଇଛି। ସରକାରଙ୍କୁ ଘେରିବାକୁ ହେଲେ ଗୃହରେ ଆଲୋଚନା କରିବା ନିହାତି ଦରକାର ବୋଲି କେତେଜଣ ସଦସ୍ୟ କହୁଥିବା ବେଳେ ଆଉ କେତେଜଣ ଏହାକୁ ମନା କରୁଛନ୍ତି ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମଙ୍ଗଳବାର ଗୃହରେ ବିନା ବିରୋଧୀରେ ସରକାର ଜିଏସ୍ଟି ସଂସ୍କାର ପାଇଁ କେନ୍ଦ୍ର ସରକାରଙ୍କୁ ଧନ୍ୟବାଦ ଦେବା ନେଇ ଆଣିଥିବା ସଂକଳ୍ପ ପାରିତ କରିଛନ୍ତି। ସେହିପରି ଓଡ଼ିଶା ବିଶ୍ୱବିଦ୍ୟାଳୟ(ସଂଶୋଧନ) ୨୦୨୫ ବିଲ୍ ମଧ୍ୟ ଗୃହରେ ପାରିତ ହୋଇଥିଲା। ଏହିସବୁ ଗୃହରେ ପାସ୍ ହେବା ସମୟରେ ବିଜେଡି ବିଧାୟକମାନେ ବିରୋଧୀ ଦଳ ନେତାଙ୍କ ପ୍ରକୋଷ୍ଠରେ ବୈଠକ କରିଥିଲେ। ବୈଠକରେ ହିଁ ଗୃହରେ ଆଲୋଚନା କରିବା ଏବଂ ଏଥିରେ ଭାଗନେବା ଓ ନ ନେବା ଉପରେ ଯୁକ୍ତିତର୍କ ଚାଲିଥିଲା। ଦଳର କେତେଜଣ ବରିଷ୍ଠ ନେତା ଗୃହକାର୍ଯ୍ୟରେ ଭାଗ ନ ନେବା ଅର୍ଥ ପରୋକ୍ଷରେ ସରକାରୀ ଦଳକୁ ସହଯୋଗ କରୁଛେ ବୋଲି ରାଜ୍ୟବାସୀଙ୍କ ପାଖକୁ ବାର୍ତ୍ତା ଯାଉଥିବା କହିଥିଲେ। ଆହୁରି ଏହି ବୈଠକରେ ଆଲୋଚନା ହୋଇଥିବା ଜଣାପଡ଼ିଛି, ଗତ ୧୮ ତାରିଖରେ ଆରମ୍ଭ ହୋଇଥିବା ଅଧିବେଶନ ୨୫ ତାରିଖ ପର୍ଯ୍ୟନ୍ତ ଚାଲିବ। ମୋଟ୍ ୭ ଦିନିଆ ଅଧିବେଶନରୁ ୫ ଦିନ ସରିଗଲାଣି। ଏହା ଭିତରେ ଆମେ ରାଜ୍ୟବାସୀଙ୍କୁ ବାର୍ତ୍ତା ଦେଇ ସାରିଲେଣି ପରୋକ୍ଷରେ ଆମ କାର୍ଯ୍ୟକଳାପ ସରକାରଙ୍କୁ ସୁହାଉଛି। ଆମେ ଯଦି ଆଲୋଚନାରେ ଭାଗ ନ ନେବା ତେବେ ସରକାରଙ୍କର ଏଥିରେ କ୍ଷତି କୋଉଠି ଅଛି। ସଂଖ୍ୟା ସେମାନଙ୍କର ରହିଛି, ବିନା ବିରୋଧୀରେ ସେମାନେ ସବୁ ପାସ୍ କରିଦେଇପାରିବେ। ଓଡ଼ିଶା ବିଶ୍ୱବିଦ୍ୟାଳୟ(ସଂଶୋଧନ) ବିଲ୍ ୨୦୨୫ ଉପରେ ଆଲୋଚନା ହେବା ବେଳେ ଏଥିରେ ଭାଗନେବା ଦରକାର। ସେହିପରି ବହୁଚର୍ଚ୍ଚିତ ସୌମ୍ୟାଶ୍ରୀ ମୃତ୍ୟୁ ଘଟଣା ଗୃହରେ ଆଲୋଚନାହେବା ଦରକାର ବୋଲି କେତେଜଣ କହିଥିଲେ। କାରଣ ଏହାର ଅନେକ କଥା ଲୋକଲୋଚନକୁ ଆସିବା ଦରକାର। ସେହିପରି ପ୍ରଥମ ଏବଂ ୨ଥର ବିଧାୟକ ଯେଉଁମାନେ ହୋଇଛନ୍ତି ସେମାନେ ମଧ୍ୟ ଆଲୋଚନାରେ ଭାଗନେବା ଦରକାର ବୋଲି କହିଥିଲେ। ଏହାକୁ ଅନ୍ୟ କେତେଜଣ ବରିଷ୍ଠ ନେତା ମଧ୍ୟ ସମର୍ଥନ ଜଣାଇଥିଲେ। ହେଲେ ଦଳର ଆଢୁଆଳରେ ରହି ନିଜର କ୍ଷମତା ବ୍ୟବହାର କରୁଥିବା ବ୍ୟକ୍ତିଙ୍କ ଇଙ୍ଗିତରେ ବିଧାନସଭାରେ ଆଲୋଚନା ନ କରି ଏଥିରୁ ଦୂରେଇରହିବା ଦରକାର ବୋଲି କେତେଜଣ ଯୁକ୍ତି ରଖିଥିଲେ। ଫଳରେ ବିଜେଡି ଆଲୋଚନା କରିବ ନା ନାହିଁ କିଛି ନିଷ୍ପତ୍ତି ହୋଇପାରି ନ ଥିବାରୁ ବିଧାୟକମାନେ ଶେଷରେ ଉଠି ଚାଲିଯାଇଥିଲେ। ଅନ୍ୟ ଜଣେ ବିଧାୟକ କହିଛନ୍ତି, ବିଧାୟକ ଦଳର ନିଷ୍ପତ୍ତି ନେବାକୁ ଗଠନ ହୋଇଥିବା ୧୦ ଜଣିଆ କମିଟି ନାଁକୁ ମାତ୍ର।
