ଭୁବନେଶ୍ୱର,୪।୬(ବ୍ୟୁରୋ): ବ୍ରଜରାଜନଗର ଉପନିର୍ବାଚନ ଫଳ ବିରୋଧୀଙ୍କୁ ଚକିତ କରିଦେଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଆଗରେ ବିରୋଧୀ ଏକପ୍ରକାର ଚିତ୍ପଟାଙ୍ଗ ମାରିଛନ୍ତି। ଏପରି କି ଭୋଟ ହାସଲ କରିବାରେ ବିରୋଧୀ ଦଳଗୁଡ଼ିକ ବିଜେଡିର ପାଖ ମାଡ଼ିପାରି ନାହାନ୍ତି। ଗତ ନିର୍ବାଚନଗୁଡ଼ିକୁ ଯଦି ଦେଖାଯାଏ ତେବେ ରାଜ୍ୟର ପ୍ରମୁଖ ବିରୋଧୀ ଦଳ କଂଗ୍ରେସ ଓ ଭାଜପା ବିଜେଡିକୁ ଟକ୍କର ଦେବା ପରିସ୍ଥିତିକୁ ଆସିପାରୁ ନାହାନ୍ତି। ପଞ୍ଚାୟତ ଓ ପୌର ନିର୍ବାଚନରେ ଶୋଚନୀୟ ପରାଜୟର ମୁହଁ ଦେଖିବାକୁ ପଡ଼ିଥିବା ବେଳେ ବ୍ରଜରାଜନଗର ଉପନିର୍ବାଚନରେ ମଧ୍ୟ ଉଭୟ ଦଳକୁ ସମଦଶା ଭୋଗିବାକୁ ପଡ଼ିଛି। ଯଦିଓ ଭାଜପାକୁ ପଛରେ ପକାଇ କଂଗ୍ରେସ ଦ୍ୱିତୀୟ ସ୍ଥାନକୁ ଉଠିଛି, ତେବେ ପୁରାତନ ଗଡ଼ କୁହାଯାଉଥିବା ଝାରସୁଗୁଡ଼ାରେ ଦଳ ସେତେଟା ଭଲ ପ୍ରଦର୍ଶନ କରିପାରି ନାହିଁ। ଉଭୟ ଦଳ ତଳ ଉପର ହେଉଥିଲେ ମଧ୍ୟ ବିଜେଡିକୁ କଡ଼ା ମୁକାବିଲା କରିବାରେ ସମ୍ପୂର୍ଣ୍ଣ ଫେଲ୍ ମାରିଛନ୍ତି। ଚଳିତ ଉପନିର୍ବାଚନରେ ବିଜେଡି ୯୩ ହଜାର ଭୋଟ ପାଇଥିବା ବେଳେ କଂଗ୍ରେସକୁ ୨୭ ହଜାର ଓ ଭାଜପାକୁ ୨୨ ହଜାର ଭୋଟ ମିଳିଛି। ଉଭୟ ଦଳକୁ ନିକଟତମ ପ୍ରତିଦ୍ୱନ୍ଦ୍ୱୀ କୁହାଯାଉଥିଲେ ମଧ୍ୟ ବିଜେଡିଠାରୁ ଅପହଞ୍ଚ ଦୂରତାରେ ରହିଛନ୍ତି। ରାଜନୀତି ଗଣିତ କହୁଛି ଯଦି ବିଜୟୀ ପ୍ରାର୍ଥୀଙ୍କଠାରୁ ନିକଟତମ ପ୍ରାର୍ଥୀଙ୍କର ଭୋଟ ବ୍ୟବଧାନ ୧୦ରୁ ୨୦ ହଜାର କିମ୍ବା ଏହାଠାରୁ କମ୍ ରୁହେ ତେବେ ସେଠାରେ କଡ଼ା ସଂଘର୍ଷ ଅଥବା ନିକଟତମ ପ୍ରତିଦ୍ୱନ୍ଦ୍ୱୀ ବୋଲି ଧରାଯିବ। ତେବେ ଏହି ଉପନିର୍ବାଚନରେ ଭାଜପା ଓ କଂଗ୍ରେସ କେହି ହେଲେ ବିଜେଡି ପାଖ ମାଡ଼ିପାରି ନାହାନ୍ତି।
ପଶ୍ଚିମ ଓଡ଼ିଶାରେ ଭାଜପାର ଦବ୍ଦବା ରହିଛି। ଗତ ସାଧାରଣ ନିର୍ବାଚନରେ ଏଠାରୁ ଦଳକୁ ୭ଟି ଲୋକ ସଭା ଆସନ ମିଳିଥିଲା। ଏଥିସହିତ ଅଧିକାଂଶ ବିଧାନସଭା ଆସନ ଜିତି ଭାଜପା କଂଗ୍ରେସକୁ ହଟାଇ ମୁଖ୍ୟ ବିରୋଧୀ ଦଳ ଆସନରେ ବସିଛି। ମାତ୍ର ଗତ ୨/୩ ବର୍ଷରେ ଦଳ ନିଜର ପୂର୍ବ କ୍ରେଜ୍ ରଖିପାରି ନାହିଁ। ଦଳୀୟ କନ୍ଦଳ ଓ ତ୍ରୁଟିପୂର୍ଣ୍ଣ ନିର୍ବାଚନ ରଣନୀତି ଉଭୟ ଦଳର ପ୍ରାର୍ଥୀଙ୍କ ପାଇଁ କାଳ ହୋଇଛି ବୋଲି ରାଜନୀତି ବିଶେଷଜ୍ଞ ମତ ଦେଉଛନ୍ତି।
ବ୍ରଜରାଜନଗର ଆସନ ପ୍ରଥମରୁ କଂଗ୍ରେସ କବ୍ଜାରେ ରହି ଆସିଥିଲା। ଲଗାତର ବିଜୟୀ ହେଉଥିବା କଂଗ୍ରେସ ପ୍ରାର୍ଥୀ ଅନୁପ ସାଏ ୨୦୧୪ରେ ଦଳ ଛାଡ଼ି ବିଜେଡିରେ ଯୋଗ ଦେଇଥିଲେ। ସେ ବିଜେଡି ଟିକେଟରେ ବ୍ରଜରାଜନଗରରୁ ଲଢ଼େଇ କରିଥିଲେ ମଧ୍ୟ ନିର୍ବାଚନମଣ୍ଡଳୀ ମତଦାତା ତାଙ୍କୁ ଅନ୍ୟ ଦଳରେ ଗ୍ରହଣ କରି ନ ଥିଲେ। ଫଳରେ ଏହାର ଫାଇଦା ନେଇଥିଲେ ଭାଜପା ପ୍ରାର୍ଥୀ ରାଧାରାଣୀ ପଣ୍ଡା। ତେବେ ଭାଜପା ପ୍ରାର୍ଥୀ ବିଜୟୀ ହୋଇଥିଲେ ମଧ୍ୟ ସେହି ଆସନ ରଖିବାରେ ବିଫଳ ହୋଇଥିଲେ। ୨୦୧୯ରେ କିଶୋର ମହାନ୍ତିଙ୍କୁ ବିଜେଡି ପ୍ରଥମ ଥର ପାଇଁ ବ୍ରଜରାଜନଗର ଆସନରୁ ପ୍ରାର୍ଥୀ କରିଥିଲା। କିଶୋର ଭାଜପା ପ୍ରାର୍ଥୀ ରାଧାରାଣୀଙ୍କୁ ୨୦ ହଜାର ଭୋଟରେ ହରାଇ ପ୍ରଥମ ଥର ପାଇଁ ବ୍ରଜରାଜନଗରରେ ବିଜେଡି ବାନା ଉଡ଼ାଇଥିଲେ। କିଶୋରଙ୍କ ଦେହାନ୍ତ ପରେ ତାଙ୍କ ସ୍ତ୍ରୀ ଅଳକାଙ୍କୁ ଏହି ନିର୍ବାଚନମଣ୍ଡଳୀରେ ବିପୁଳ ସମର୍ଥନ ମିଳିଛି। ସ୍ବାମୀଙ୍କଠାରୁ ପ୍ରାୟ ୪୫ ହଜାର ଅଧିକ ଭୋଟ ପାଇଛନ୍ତି।
ଅନ୍ୟପକ୍ଷରେ ଗତ କିଛି ବର୍ଷ ଧରି ଯଦି ଉପନିର୍ବାଚନ କଥା ଦେଖାଯାଏ ତେବେ ବିଜେଡି କୌଣସି ଆସନ ହାତଛଡ଼ା କରିନାହିଁ। ସ୍ବର୍ଗତ ବିଧାୟକଙ୍କ ସ୍ତ୍ରୀ କିମ୍ବା ପୁତ୍ରମାନଙ୍କୁ ଟିକେଟ ଦେଇ ଉପନିର୍ବାଚନ ଜିତିବା ପରମ୍ପରାକୁ ବଜାୟ ରଖିଛି। ଏହି ଉପନିର୍ବାଚନରେ ମଧ୍ୟ ଏହାକୁ ଦୋହରାଇଛି।
ଏଠାରେ ଉଲ୍ଲେଖ କରାଯାଇପାରେ ଯେ ପୂର୍ବରୁ ବିଜେପୁର ଉପନିର୍ବାଚନରେ କଂଗ୍ରେସ ବିଧାୟକ ସୁବଳ ସାହୁଙ୍କ ଦେହାନ୍ତ ପରେ ତାଙ୍କ ସ୍ତ୍ରୀ ରୀତା ସାହୁଙ୍କୁ ବିଜେଡି ଟିକେଟ ଦେଇ ସିଟ୍ ହାତେଇଥିଲା। ସେହିପରି ପାଟକୁରା ଉପନିର୍ବାଚନରେ ଭାଜପା ପ୍ରାର୍ଥୀ ବିଜୟ ମହାପାତ୍ରଙ୍କୁ ଟକ୍କର ଦେବା ପାଇଁ ସ୍ବର୍ଗତ ବେଦପ୍ରକାଶ ଅଗ୍ରୱାଲଙ୍କ ସ୍ତ୍ରୀ ସାବିତ୍ରୀ ଅଗ୍ରୱାଲଙ୍କୁ ବିଜେଡି ପ୍ରାର୍ଥୀ କରିଥିଲା। ଅନ୍ୟପକ୍ଷରେ ଯେଉଁଠି ସ୍ବର୍ଗତ ବିଧାୟକଙ୍କ ସ୍ତ୍ରୀ ପ୍ରାର୍ଥୀ ହେବାକୁ ରାଜି ହୋଇନାହାନ୍ତି ସେଠାରେ ତାଙ୍କ ପୁଅଙ୍କୁ ବିଜେଡି ଟିକେଟ ଦେଇ ବଂଶଗତ ରାଜନୀତିକୁ ଆଗକୁ ନେବାରେ ସଫଳ ହୋଇଛି। ତିର୍ତ୍ତୋଲ ବିଧାୟକ ଥିବା ବିଷ୍ଣୁ ଚରଣ ଦାସଙ୍କ ବିୟୋଗ ପରେ ତାଙ୍କ ପୁତ୍ର ବିଜୟ ଶଙ୍କର ଦାସ ଏବଂ ପିପିଲି ବିଧାୟକ ସ୍ବର୍ଗତ ପ୍ରଦୀପ ମହାରଥୀଙ୍କ ପୁତ୍ର ରୁଦ୍ର ପ୍ରତାପ ମହାରଥୀଙ୍କୁ ବିଜେଡି ଉପନିର୍ବାଚନରେ ପ୍ରାର୍ଥୀ କରିଥିଲା। ଏ ସମସ୍ତ ଉପନିର୍ବାଚନରେ ବିଜେଡି ସବୁ ଆସନକୁ ନିଜ ଅକ୍ତିଆରରେ ରଖିପାରିଛି।
