ଭୁବନେଶ୍ୱର, ୧୪।୪(ସୁନିତ୍ ମିଶ୍ର)ରାଜ୍ୟର କେତେଜଣ କଳାକାରଙ୍କୁ ଶୁକ୍ରବାର ନବୀନ ନିବାସରୁ ଡକରା ଆସିବା ପରେ ବହୁ ଜଣଙ୍କୁ ସେଠାରେ ଦେଖିବାକୁ ମିଳିଥିଲା। ବହୁ ଓଡ଼ିଆ ସିନେ ତାରକା ନବୀନ ନିବାସ ଯାଇ ସେଠାରେ ରାଜ୍ୟରେ କିପରି ଭଲ ଚଳଚ୍ଚିତ୍ର ଆଦି ହେବ ସେ ବିଷୟରେ ଆଲୋଚନା ହୋଇଥିବା କଥା ଆସି ବାହାରେ ଗଣମାଧ୍ୟମକୁ କହିଥିଲେ। ହେଲେ ସେହି ବିଷୟକୁ ନେଇ ଭାଜପା ବର୍ଷିଛି। ଭାଜପା ରାଜ୍ୟ କାର୍ଯ୍ୟାଳୟଠାରେ ଶନିବାର ଆୟୋଜିତ ଖବରଦାତା ସମ୍ମିଳନୀରେ ଦଳର ନେତ୍ରୀ ପିଙ୍କି ପ୍ରଧାନ କହିଛନ୍ତି , ୨୪ ବର୍ଷର ବିଜେଡି ଶାସନରେ କଳାଜଗତ ଓ ମନୋରଞ୍ଜନ ଶିଳ୍ପ ସହ ଜଡ଼ିତ ରାଜ୍ୟର ଅଗଣିତ କଳାକାର ଭଉଣୀଭାଇ ସର୍ବାଧିକ ଅବହେଳିତ ହୋଇଛନ୍ତି। ଆତ୍ମପ୍ରଚାର ପାଇଁ ବିଜେଡି ଏବେ କଳାକାର ଜଗତକୁ ବ୍ୟବହାର କରୁଛି। କିନ୍ତୁ କଳାଜଗତ ସହ ଜଡ଼ିତ କଳାକାର ଭଉଣୀଭାଇଙ୍କ ପାଇଁ ରାଜ୍ୟ ସରକାର କିଛି କରିନାହାନ୍ତି ା
ବିଜେଡି ‘ୟୁଜ୍ ଆଣ୍ଡ ଥ୍ରୋ’ କରିବାରେ ସିଦ୍ଧହସ୍ତ। ଶୁକ୍ରବାର ହଠାତ୍ ମୁଖ୍ୟମନ୍ତ୍ରୀ ସିନେ କଳାକାରଙ୍କୁ ଭେଟି ଆଲୋଚନା କରିବା ପ୍ରସଙ୍ଗ ସମ୍ପୂର୍ଣ୍ଣ ଛଳନାତ୍ମକ ଥିଲା। ଓଡ଼ିଶାରେ କେବଳ ଜଣେ ତାରକା ଏବଂ ସେ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି ବିଜେଡି ବାରମ୍ବାର କହିଆସିଛି ା ତା’ହେଲେ ବର୍ତ୍ତମାନ ଦଳ ରିଅଲ ତାରକାଙ୍କ ଆବଶ୍ୟକ କାହିଁକି କରୁଛି। ବିଜେଡି ଏବେ ସେଲିବ୍ରିଟି ଶୂନ୍ୟ। ଦଳୀୟ ଆଧାରରେ କଳାକାରଙ୍କୁ ଭାଗ ଭାଗ ପାଇଁ ବିଜେଡି ଚେଷ୍ଟା କରୁଛି ବୋଲି ପିଙ୍କି କହିଛନ୍ତି।
