ଆନନ୍ଦପୁର,୧୨ା୧୦(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ପୌରପରିଷଦର ଉପନଗରପାଳଙ୍କ ସହିତ କାଉନସିଲରମାନେ ବୁଧବାର ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ଆନନ୍ଦପୁର ପୌରପରିଷଦର ବିକାଶରେ ଜିଲା ପ୍ରଶାସନିକ ଅଧିକାରୀମାନେ ବୈମାତୃକ ମନୋଭାବ ପୋଷଣ କରିବା ଘଟଣାକୁ ବିରୋଧ କରି ଏହି ଧାରଣା ଦିଆଯାଇଥିବା ସୂଚନା ମିଳିଛି। ପୌରପରିଷଦରେ କର୍ମଚାରୀଙ୍କ ଅଭାବ ଜନିତ ସମସ୍ୟା ଦୀର୍ଘଦିନ ଧରି ଲାଗି ରହିଥିବାବେଳେ ବିକାଶମୂଳକ କାର୍ଯ୍ୟ ତ୍ୱରାନ୍ବିତ କରାଯିବାରେ ବାଧା ସୃଷ୍ଟି ହେଉଥିବା କାଉନସିଲରମାନେ ଅଭିଯୋଗ କରିବା ସହିତ ପୌରପରିଷଦରେ ହୋଇଆସୁଥିବା ଜନ୍ମମୃତ୍ୟୁ ପଞ୍ଜୀକରଣ ବ୍ୟବସ୍ଥାକୁ ସ୍ଥାନାନ୍ତର, ବସ୍ଷ୍ଟାଣ୍ଡର ନବୀକରଣ ପାଇଁ ପୌରପରିଷଦର ଭେଣ୍ଡିଂ ଜୋନ୍କୁ ଉଚ୍ଛେଦ କରିବା ଦ୍ୱାରା ପୌରପରିଷଦର ବାର୍ଷିକ ଅଢ଼େଇ ଲକ୍ଷ ରାଜସ୍ବ ହରାଇବା ଏବଂ ଡିଏମ୍ଏଫ୍ ମାଧ୍ୟମରେ କ୍ଷତିପୂରଣ ଦାବି ଆଦିକୁ ଆଧାର କରି ଏହି ଧାରଣା ଅନୁଷ୍ଠିତ ହୋଇଥିଲା। ପୌରପରିଷଦରେ ସିଓ, ବରିଷ୍ଠ ସହାୟକ, କନିଷ୍ଠ ସହାୟକଙ୍କ ସହିତ ୧୪ କର୍ମଚାରୀ ପଦବୀ ଖାଲି ରହିବା ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ କାଉନସିଲରମାନେ ଧାରଣା ଭଳି ପଦକ୍ଷେପ ଗ୍ରହଣ କରିଥିଲେ। ପୌରପରିଷଦରେ ଲାଗି ରହିଥିବା ବିଭିନ୍ନ ସମସ୍ୟାକୁ ନେଇ ମଙ୍ଗଳବାର ପୌରାଧ୍ୟକ୍ଷା, ଉପାଧ୍ୟକ୍ଷ ଓ କେତେକ କାଉନସିଲର ଜିଲାପାଳଙ୍କୁ ସାକ୍ଷାତ କରିବା ପାଇଁ ଯାଇଥିଲେ। ଜିଲାପାଳ ଅଧ୍ୟକ୍ଷା ଓ ଉପାଧ୍ୟକ୍ଷଙ୍କ ସହିତ କିଛି ସମୟ ଆଲୋଚନା କରିଥିଲେ ସୁଦ୍ଧା କୌଣସି ସୁଫଳ ମିଳି ନ ଥିବା ଧାରଣାରେ ବସିଥିବା କାଉନସିଲରମାନେ ପ୍ରକାଶ କରିଥିଲେ। ଏପରିକି ପ୍ରଶାସନିକସ୍ତରରେ ଯାହା ଠିକ୍ ସେହିଭଳି ପଦକ୍ଷେପ ଗ୍ରହଣ କରାଯାଉଥିବା ଜିଲାପାଳ କହୁଥିବା କାଉନସିଲରମାନେ କହିଛନ୍ତି। ଏଭଳି ଘଟଣାରେ ଆନନ୍ଦପୁର ପୌରପରିଷଦକୁ ଜାଣିଶୁଣି ଅଣଦେଖା କରାଯାଉଥିବା କାଉନସିଲରମାନେ ଅଭିଯୋଗ କରି ଧାରଣା ଦେଇଛନ୍ତି। ପୌରପରିଷଦର ସମସ୍ୟାକୁ ଆଧାର କରି ଉପସ୍ଥାପିତ ହୋଇଥିବା ଦାବିଗୁଡ଼ିକ ପୂରଣ ଦିଗରେ ଜିଲା ପ୍ରଶାସନ ଦୃଷ୍ଟି ନ ଦେଲେ ଧାରଣା ଜାରି ରହିବ ବୋଲି ପୌର ଉପାଧ୍ୟକ୍ଷ ଦୁର୍ଗାଚରଣ ଦଳେଇ ପ୍ରକାଶ କରିଛନ୍ତି।
ସୂଚନାଯୋଗ୍ୟ, ୧୬ ଓ୍ବାର୍ଡ ବିଶିଷ୍ଟ ଆନନ୍ଦପୁର ପୌରପରିଷଦରେ ୧୨ ଜଣ କାଉନସିଲର ଶାସକ ଦଳର ରହିଥିବାବେଳେ ୪ ଜଣ ବିରୋଧୀ ଭାଜପା ଦଳର ରହିଛନ୍ତି। ଆଜି ହୋଇଥିବା ଧାରଣାରେ ସମସ୍ତ ବିଜେଡି ଓ ଭାଜପା କାଉନସିଲର ଉପସ୍ଥିତ ରହି ପୌରପରିଷଦର ମୌଳିକ ସମସ୍ୟାକୁ ଦୂର କରିବା ଦିଗରେ ଦାବି ଉପସ୍ଥାପନ କରିଥିଲେ। ଆଜି ପ୍ରଥମ ଦିନ ଧାରଣାସ୍ଥଳକୁ କେହି ପ୍ରଶାସନିକ ଅଧିକାରୀ ଆସି ନ ଥିବାବେଳେ ଆସନ୍ତାକାଲି ମଧ୍ୟ ଧାରଣା ଜାରି ରହିବ ବୋଲି ସୂଚନା ମିଳିଛି।
