କେନ୍ଦ୍ରାପଡ଼ା ଅଫିସ,୨୧ା୯:କେନ୍ଦ୍ରାପଡ଼ା ବନ ବିଭାଗ ପକ୍ଷରୁ ଜାତୀୟ ଉଦ୍ୟାନ ଭିତରକନିକାର ଦୁଇଟି ନୂଆ ଲୋଗୋ ଉନ୍ମୋଚିତ ହୋଇଛି। ପ୍ରଥମ ଲୋଗୋରେ ବିରଳ ଅଲିଭ ରିଡ୍ଲେ କଇଁଛ ସ୍ଥାନ ପାଇ ନ ଥିବାରୁ ବିବାଦ ଆରମ୍ଭ ହୋଇଥିଲା। ସୋମବାର ଦ୍ୱିତୀୟ ଲୋଗୋ ଉନ୍ମୋଚିତ ହୋଇଛି। ଏଥିରେ ବି ତ୍ରୁଟି ରହିଛି। ଗହୀରମଥା ସାମୁଦ୍ରିକ ବନ୍ୟପ୍ରାଣୀ ସଂରକ୍ଷଣ ଅଞ୍ଚଳ ପାଇଁ ପ୍ରସ୍ତୁତ ଲୋଗୋରେ ପକ୍ଷୀ, ନାଲି କଙ୍କଡାଙ୍କ ଛବି ନାହିଁ; ଯାହା କି ଜିଲାବାସୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ପ୍ରଥମ ଲୋଗୋରେ ଥିବା କଞ୍ଜରଭେଶନ ଇଜ୍ ଆୱାର କନସର୍ନକୁ ୨ୟରେ ଉଠାଇ ଦିଆଯାଇଛି। ଜାତୀୟ ଉଦ୍ୟାନର ଅସ୍ମିତା ପାଇଁ ସମଗ୍ର ଅଞ୍ଚଳକୁ ଗୁରୁତ୍ୱ ଦିଆଯାଇ ଗୋଟିଏ ଲୋଗୋ କରିବାକୁ ଜିଲାପାଳଙ୍କୁ ସୋମବାର ଦାବିପତ୍ର ଦିଆଯାଇଛି। ଏଥିସହ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, କେନ୍ଦ୍ର ପର୍ଯ୍ୟାବରଣ ମନ୍ତ୍ରଣାଳୟ, ପିସିସିଏଫ୍, ଆରସିସିଏଫ୍ଙ୍କୁ ଡାକ ଯୋଗେ ଲୋଗୋ ସମ୍ପର୍କରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଦୃଷ୍ଟି ଆକର୍ଷଣ କରାଯାଇଛି। ଅପରପକ୍ଷେ ଲୋଗୋ ସଂଖ୍ୟାକୁ ନେଇ ପ୍ରଶ୍ନ ଉଠିଛି।
ଗୋଟିଏ ଲୋଗୋ ପ୍ରସ୍ତୁତ କରାଯାଉ
ଭିତରକନିକା ସଂରକ୍ଷିତ ଅଞ୍ଚଳ ୨୧୦, ୭୦୦ ହେକ୍ଟର। ଏଥିରେ ଭିତରକନିକା ଜାତୀୟ ଉଦ୍ୟାନ ୧୪, ୫୦୦ ହେକ୍ଟର ହୋଇଥିବା ବେଳେ ବନ୍ୟପ୍ରାଣୀ ସଂରକ୍ଷିତ ଅଞ୍ଚଳ ୫୨, ୭୦୦ ହେକ୍ଟର। ଗହୀରମଥା ସାମୁଦ୍ରିକ ପ୍ରାଣୀ ସଂରକ୍ଷିତ ଅଞ୍ଚଳର ଆୟତନ ୧୪୩, ୫୦୦ ହେକ୍ଟର। ଏହା ବ୍ୟତୀତ ଭିତରକନିକା ବନାଞ୍ଚଳର ସୁରକ୍ଷା ପାଇଁ ୪୪, ୬୪୦ ହେକ୍ଟର ଅଞ୍ଚଳକୁ ବଫର ଜୋନ୍ ବା ଇକୋ ସେନ୍ସିଟିଭ ଜୋନ୍ ଭାବେ ନିଆଯାଇଛି। ଏହାକୁ ଦୃଷ୍ଟିରେ ରଖି ୨ ଲୋଗୋ ପରିବର୍ତ୍ତେ ଗୋଟିଏ କିମ୍ବା ୪ ଲୋଗୋ ପ୍ରସ୍ତୁତ ହେଉ। ଫଳରେ ଭିତରକନିକାକୁ ଭାଗ କରି ଲୋକଙ୍କୁ ଚିହ୍ନଟ କରାଇବା ଅଥବା ଅବିଭକ୍ତ ଭିତରକନିକାର ଅସ୍ମିତାର ପ୍ରଚାର ପ୍ରସାର ହୋଇପାରିବ।
ପ୍ରଭୁପ୍ରସାଦ ମହାପାତ୍ର,
ପରିବେଶବିତ୍, ମହାକାଳପଡ଼ା
ଜିଲାବ୍ୟାପୀ ଆନ୍ଦୋଳନ ହେବ
ଭିତରକନିକାର ଲୋଗୋ ବଦଳିଯାଇଛି। ଏହି ବଦଳାବଦଳିରେ ଭିତରକନିକାର ଅସ୍ମିତାକୁ ନଷ୍ଟ କରାଯାଇଛି। ପ୍ରଥମ ଲୋଗୋରେ ଅଲିଭ ରିଡ୍ଲେକୁ ସ୍ଥାନ ମିଳିନାହିଁ। ସେହିପରି ଦ୍ୱିତୀୟ ଲୋଗୋରେ ପକ୍ଷୀ, ନାଲି କଙ୍କଡା ଆଦି ନାହାନ୍ତି। ପ୍ରଥମ ଓ ଦ୍ୱିତୀୟ ଲୋଗୋରେ ଡଲଫିନ୍ ସ୍ଥାନ ପାଇଛି। ବନବିଭାଗ ଲୋଗୋ ପ୍ରସ୍ତୁତିରେ ଅସମାନତା ପ୍ରଦର୍ଶନ କରିଛନ୍ତି। ଏ ନେଇ ଜିଲାପାଳଙ୍କ ସମେତ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ଦୃଷ୍ଟି ଆକର୍ଷଣ କରାଯାଇଛି। ଲୋଗୋ ନ ବଦଳିଲେ ଜିଲାବ୍ୟାପୀ ଆନ୍ଦୋଳନ ହେବ।
ପ୍ରଦୀପ କୁମାର ଦାଶ,
ରାଜ୍ୟ ସଭାପତି, ଜନଶକ୍ତି ପାର୍ଟି
ଲୋଗୋର ରେଜିଷ୍ଟ୍ରେଶନ ଜରୁରୀ
ପରିବେଶ ସୁରକ୍ଷା ଆଇନ ୧୯୮୬ ଅଧୀନରେ ଲୋଗୋର ଗୁରୁତ୍ୱ ଅଧିକ। ଏହି ଲୋଗୋ ସ୍ଥାନୀୟ ପରିବେଶ ସୁରକ୍ଷା ସହିତ ସଂରକ୍ଷଣ ସମ୍ପର୍କରେ ସୂଚନା ଦେଇଥାଏ। ଆଧୁନିକ ଯୁଗରେ ପରିବେଶ ସଚେତନତା ପାଇଁ ଲୋଗୋ ଜରୁରୀ ହୋଇପଡିଛି। ଏହାଦ୍ୱାରା ପରିବେଶ ସମ୍ପର୍କରେ ସଙ୍କେତାତ୍ମକ ହେଲେ ମଧ୍ୟ ବୃହତ୍ ଉଦ୍ଦେଶ୍ୟ ସାଧନ ହୋଇଥାଏ। ଲୋଗୋର ରେଜିଷ୍ଟ୍ରେଶନ ନ ହେଲେ ଏହାର ସୁଯୋଗ ବ୍ୟବସାୟୀ ଉଠାଇବେ। ଭିତରକନିକାର ଆକର୍ଷଣ ସାରା ବିଶ୍ୱରେ ଅଛି। ଏହି ଲୋଗୋକୁ ବ୍ୟବହାର କରି କେତେଜଣ ବ୍ୟବସାୟୀ ଟୁରିଷ୍ଟଙ୍କୁ ଠକି ପାରନ୍ତି। ସେହିପରି ଭିତରକନିକା ଗୋଟିଏ ବର୍ଷରେ ୪୮୦ କୁଇଣ୍ଟାଲ ମହୁ ଉପତ୍ାଦର କ୍ଷମତା ରଖିଛି। ମହୁ ଭିତରକନିକାର ଲୋଗୋରେ ବିକ୍ରି ହୋଇପାରିବ। ତେବେ ଲୋଗୋ ରେଜିଷ୍ଟ୍ରେଶନ ହୋଇ ନ ଥିଲେ ବ୍ୟବସାୟୀ ସୁଯୋଗ ନେବେ।
ଆଇନଜୀବୀ ସରୋଜରାଜ ସିଂହ, କେନ୍ଦ୍ରାପଡ଼ା
ପ୍ରଶାସନ ଲୋଗୋ ବିବାଦ ସୃଷ୍ଟି କରିଛି
ଲୋଗୋ ଆଢ଼ୁଆଳରେ ଅର୍ଥ ହଡପ ଯୋଜନା ଥିବା ଅସମ୍ଭବ ନୁହେଁ। ଇତିମଧ୍ୟରେ ନୂତନ ଲୋଗୋରେ ଟୋପି, ମଗ, ଟି-ଶାର୍ଟ ଆଦି ପ୍ରସ୍ତୁତ ହୋଇଥିବା ସୂଚନା ମିଳିଛି। ପୁରୁଣା ଲୋଗୋରେ ଥିବା ସାମଗ୍ରୀ କେତେ ପରିମାଣରେ ଗଚ୍ଛିତ ଅଛି ଓ ନୂତନ ଲୋଗୋ ପ୍ରସ୍ତୁତି ସହ ନୂଆ ସାମଗ୍ରୀ କିଣା ସମ୍ପର୍କରେ ସୂଚନା ଅଧିକାର ଆଇନରେ ତଥ୍ୟ ମଗାଯିବ। ଏହାବ୍ୟତୀତ ପୁରୁଣା ଲୋଗୋରେ ଭିତରକନିକାକୁ ସୁରକ୍ଷାକୁ ପ୍ରାଧାନ୍ୟ ଦିଆଯାଇ କଞ୍ଜରଭେଶନ ଇଜ ଆୱାର କନସର୍ନ ଟ୍ୟାଗ ଲାଇନ ଥିଲା; ଯାହା ନୂତନ ଲୋଗୋରେ ଦେଖିବାକୁ ମିଳୁନାହିଁ। ଖରସ୍ରୋତା ପାଣି ଉଠା ବିବାଦକୁ ସମ୍ଭାଳି ପାରୁ ନ ଥିବା ଜିଲା ପ୍ରଶାସନ ପୁଣି ଏକ ନୂଆ ଲୋଗୋ ବିବାଦ ସୃଷ୍ଟି କରିଛି। ଜିଲାବାସୀ ପ୍ରଶାସନର ଏପରି ମନୋଭାବକୁ କେବେ ବି ବରଦାସ୍ତ କରିବେ ନାହିଁ
ପ୍ରତାପ କୁମାର ପାଢ଼ୀ,
ସାମାଜିକ କର୍ମୀ, ପଟ୍ଟାମୁଣ୍ଡାଇ
