କୁନ୍ନୁର,୯।୧୨: ତାମିଲନାଡୁର କୁନ୍ନୁରରେ ହେଲିକପ୍ଟର ଦୁର୍ଘଟଣା ପରେ ସିଡିଏସ ଜେନେରାଲ ବିପିନ ରାୱତ ଜୀବିତ ଥିଲେ। ଏପରିକି ସେ ତାଙ୍କ ନାମ ମଧ୍ୟ କହିଥିଲେ। ଉଦ୍ଧାରକାରୀ ଦଳ ଦୁର୍ଘଟଣା ଗ୍ରସ୍ତ ହେଲିକପ୍ଟର ପାଖରେ ପହଞ୍ଚିବା ପରେ ଦୁଇ ଜଣଙ୍କୁ ଜୀବିତ ଉଦ୍ଧାର କରିଥିବା କହିଛନ୍ତି। ଉଦ୍ଧାରକାରୀ ଦଳର ଏନସି ମୁରଲୀ କହିଛନ୍ତି ଯେ ଆମେ ଉଦ୍ଧାର କରିଥିବା ୨ ଜଣଙ୍କ ମଧ୍ୟରେ ଜଣେ ବିପିନ ରାଓ୍ବତ ଥିଲେ। ନିଜ ଧିରେ ଧିରେ ନିଜ ନାମ କହିଥିଲେ। ତେବେ ଡାକ୍ତରଖାନା ଯିବା ବାଟରେ ତାଙ୍କର ମୃତ୍ୟୁ ଘଟିଥିଲା। ଜୀବିତ ଉଦ୍ଧାର ହୋଇଥିବା ଅନ୍ୟ ଜଣଙ୍କୁ ଆମେ ଚିହ୍ନଟ କରିପାରି ନ ଥିଲୁ ବୋଲି ସେ କହିଛନ୍ତି।
ଉଦ୍ଧାରକାରୀ ଦଳଙ୍କ କହିବାନୁସାରେ, ସିଡିଏସ ରାୱତଙ୍କ ଶରୀରର ନିମ୍ନ ଅଂଶ ଜଳି ଯାଇଥିଲା। ତାଙ୍କୁ ଉଦ୍ଧାର କରାଯାଇ ଏକ ବେଡସିଟରେ ଗୁଡ଼ାଇ ଆମ୍ବୁଲାନ୍ସକୁ ନିଆଯାଇଥିଲା। ଏନସି ମୁରଲୀ ଅଗ୍ନିଶମ ସେବା ଦଳର ଜଣେ ସଦସ୍ୟ ଥିଲେ, ଯିଏ ସୂଚନା ପାଇବା ପରେ ହିଁ ଘଟଣାସ୍ଥଳରେ ପହଞ୍ଚିଥିଲେ। ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ଜଳୁଥିବା ବିମାନର ଧ୍ୱଂସାବଶେଷ ଲିଭାଇବା ପାଇଁ ଦମକଳ ଗାଡ଼ି ଇଞ୍ଜିନ ନେବାକୁ କୌଣସି ରାସ୍ତା ନ ଥିଲା। ନିକଟସ୍ଥ ଘର ଓ ନଦୀରୁ ପାଣି ଆଣି ସ୍ଥାନୀୟ ଲୋକ ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଥିଲେ। ଏହି କାରଣରୁ ଉଦ୍ଧାର କାର୍ଯ୍ୟ କଷ୍ଟସାଧ୍ୟ ହୋଇପଡ଼ିଥିଲା।
କାଟେରୀ ଗାଁର ଲୋକମାନେ ପ୍ରଥମେ ଘଟଣାସ୍ଥଳରେ ପହଞ୍ଚିଥିଲେ। ଉଦ୍ଧାରକାରୀ ଦଳ ହେଲିକପ୍ଟର ଦୁର୍ଘଟଣାଗ୍ରସ୍ତ ସ୍ଥାନରୁ ୧୨ ଜଣଙ୍କ ମୃତଦେହ ପାଇଥିବାବେଳେ ୨ ଜଣଙ୍କୁ ଜୀବିତ ଉଦ୍ଧାର କରିଥିଲେ। ବଞ୍ଚିଥିବା ଉଭୟଙ୍କ ଅବସ୍ଥା ଗୁରୁତର ଥିଲା। ପରେ ଜୀବିତ ଉଦ୍ଧାର ହୋଇଥିବା ଦ୍ୱିତୀୟ ବ୍ୟକ୍ତିଙ୍କୁ ଗ୍ରୁପ କ୍ୟାପଟେନ ବରୁଣ ସିଂ ବୋଲି ଚିହ୍ନଟ କରାଯାଇଥିଲା। ଭାରତୀୟ ବାୟୁସେନା ଦୁର୍ଘଟଣା ଗ୍ରସ୍ତ ହେଲିକପ୍ଟର ବିଷୟରେ ଉଦ୍ଧାରକାରୀ ଦଳଙ୍କର ନିରନ୍ତର ମାର୍ଗଦର୍ଶନ କରୁଥିଲା। ଘଟଣାସ୍ଥଳଠାରୁ ପ୍ରାୟ ୧୦୦ ମିଟର ଦୂରରେ ଥିବା କାଟେରୀ ଗାଁର ବାସିନ୍ଦା ପୋଥମ ପୋନ୍ନାମ ଚପରଟି ଦୁର୍ଘଟଣାଗ୍ରସ୍ତ ହେବାପରେ ଏକ ବିସ୍ଫୋରଣ ଶବ୍ଦ ଶୁଣିଥିଲେ। କାଟେରୀ ବାସିନ୍ଦା ଜିଲା ଅଧିକାରୀଙ୍କୁ ସୂଚନା ଦେଇଥିଲେ, ଏହା ପରେ ସେହି ଅଞ୍ଚଳରେ ବିୁଦ୍ୟତ କାଟ ହୋଇ ଉଦ୍ଧାର କାର୍ଯ୍ୟ ଆରମ୍ଭ ହେବା ସହିତ ପୋଲିସ କର୍ମଚାରୀ ଏବଂ ଉଦ୍ଧାରକାରୀ ଦଳ ମଧ୍ୟ ପହଞ୍ଚିଥିଲେ।
